بعد ما وصلني للسبيطار قالي ابقاي في طونوبيل نروح نشوف الحالة كيفاش وانتي ما روحتي ما شفتي ما تعرفيهم فهمتي درتلوا براسي ايه هو دخل وانا بقيت في طونوبيل شوي وخرج قالي هو لاباس وهيا لي مضرورة بزاف . قتلوا صح وش قالولك علاها قالي طيحت بيبي وزيد فسدلها وجها راه كامل مطراسي .قتلوا ياك هو ما قال والوا عليا . قالي وش راح يقول يجرب يحل نكسرهولوا . قتلوا ملا علاه راك تخلع فيا من الصباح . قالي باه تنقصي من فعايلك تاع المهابل . قتلوا أيا الحمد لله بصح كون يسمعوا اهل فيفي كيفاش يقتلوها مسكينة . قالي وش دخلنا في عزرينها حنا واحد قالها روحي $$$$.قتلوا متقولش علاها هكا يك قتلك بسيف عليها . قالي بسيف ولا مش بسيف تحل مشاكلها وحدها ، وانتي بركاي من جياحة تاعك دخلي روحك في حوايج ما يخصوكش خلاص .قتلوا صحا هيا برك وصلني للاقامة قبل ما يقفلوا . قالي انسايها اقامة راني طحان لزدت خليتك فيها المرة الجاية منعرف وش ديري . سكتت وللى ركب ديمارا للدار طريق طويلة رسقيلت الكوسانة قلت نرقد احسن ديجا الخلعة تاع قبيل بقات في قلبي انا بديت نغفى شوي سمعت تلفونوا صونا هز قال وي عمري . انا سمعتوا قال وي عمري تقول واحد ضربني على قلبي بشفرة ، صوت انوثي تاع طفلة باين ما سمعتش وش قتلوا . قالها راني برة مش في الخدمة ، صحا من بعد اني نجي لعمري ،سكت شوي باين بلي هيا لي راهي قالها صحا راني نجي للدار على 10كيما المرة لي فاتت اوكي تهلاي .. هو كوبا واناتقول واحد جا وكواني كية في قلبي حسيت لحمي عاد يفور عليا وليت نهدر في قلبي علاه راني مقلقة يروح لوحدة ولا يروح لعشرة وش دخلني في جدو انا من بعد نقول علاه انا يحرم عليا في كلش وهو يروح يتمعشق ويعيش في حياتو وانا حارز بيا بقيت طريق كامل هكا ناكل في روحي حسيت لاطونسيو طلعتلي حتى قريب نوصلو فتحت عينيا شاف معايا قالي فقتي رانا قريب نوصلوا . شنفت عليه لا ايراديا قتلوا علابالي دورت راسي نشوف في طريق .قالي لا راكي دايرتها ڨد راسك وتزيدي تشنفي عليا منفوق . قريب راح نقولو روح قود عليا برك . حكمت روحي وسكتت وصلنا للدار دخلت وخليتوا برة يڨاري لقيتهم كيما راهم كامل في الدار مجمولين في الصالة مقصرين سلمت عليهم وذراري بوجرت مع معاهم غير مسلم لي مكانش . نطقت اسمهان قاتلي جوليا كيفاش حتى جيتي ياك روحتي غير بارح وقلتيلي بلي عندنا امتحنات. حسيتها محبتش كي رجعت قتلها انولاهم حتى سمانة جاية بالاك قلت نقعد هنا خير من لاقامة . خليتهم. وطلعت لشمبرة تاعي لبست بيجامة دومي مونش تريكو بالفيزو تاعو ومشطت شعري كوتشوفال وهبطت كان وقت لعشا لقيتهم كامل ديجا قعدو على الطابلة غير شافوني ضربو فيا كامل شوفة بنص عين غير مرت خالي وحيد لي قاتلي ارواحي اقعدي جوليا هاهي بلاصتك وين . قعدت كرسي لي بجنبي فارغ وبجنبي ثاني اسمهان ومقابلني اونفاص ديراكت اصيل . غير طلعت راسي شفت معاه خنزرني وطلع حاجبو . قلت وشبيه عزرينو هدا ثاني ينفخ في خنافرو عليا. هبطت راسي مع الصحن تاع الماكلة نسمع في مسلم مع دخل قال يا شكون لي هنا . طلعت راسي ضحكتلوا قالي ياااا الكبدة راكي هنا وقتاه جيتي جا ديراكت باسني على شعري قتلوا جيت قبيلا بصح متهدرش معايا راني منسيتش تاع الصباح . قالي انا لي ما نسيتش وراح تخلصيها .قعد بجنبي قاتلوا مرت خالي شفت جوليا نسيتنا. ضحك قالها جوليا تنسيني فيكم كامل .قالوا خالي احشم علينا وش لي كبدة هادي .عاد يضحك بالصوت قرصتوا على دراعو وهو مزال يضحك . نطق خالي قالنا ربي يدومك الضحكة واللمة ان شاء الله . قلنا امين طبس عليا قالي فريتوها يخي . قتلوا ايه اصيل تفاهم مع راجل خاف ما نطق حتى كلمة. قالي آخر مرة جوليا المرة هادي فاتت هكدا المرة الجاية متفوتش ومنضنش بلي اصيل راح يفوتها ، متقوليش راه ما دارلي والوا راه فوتها بالعكس راه يلم فيها باه نهار لي يحاسبك تتمناي الموت ومتلحقيهاش حقا ياك ما عملك والوا . قتلوا والوا عيط عليا برك شوي وسكت . شفت معاه نلقاه يشوف معانا بشوفة الموت سيرتو انا خفت منو ملڨري معلاباليش أصلا علاه راه يقرحلي بصح الصراحة خفت . رجعت ناكل وانا نتفادى نشوف معاه حتى سمعتو كيفاش خبط الطابلة بالمغرف ووقف نفض روحوا قالوا خالي علاه نضت اصيل . قالوا انا شبعت بصحتكم هز مفاتحوا وخرج ما شافش وراه تفكرت كي كان يهدر مع الطفلة قلت باين رايح عندها على هديكا مزروب الخامج . سماطلي العشا ، شربت تاي وسهرت معاهم شوي وطلعت للشمبرة تاعي شوي ونسمع في صوت العياط تحت الدنيا مقلبة صوت اصيل ومسلم يبان برة بحدا الباب مش في الدار مدريتش بروحي طرت من بلاصتي هبطت نجري مع وصلت لقيت اصيل دخل وردخ الباب وراه طاحت عيني في عينو شاف معايا وحد شوفة عمري لا راح ننساها وجا فايت طلع ديراكت لشمبرة تاعو وحنا كامل بقينا نشوفوا مع بعضانا واحد ما علابالو علاه تقابضوا مع بعض . شوي ولحق دخل مسلم بصح هو غير شافني طرشق بالضحك على قوة جهدو قلت في قلبي وش المهابل هادو واحد يشوفني يتخنزر وواحد يشوفني يضحك وسوسوني . حتى هو طلع اشمبررتوا وخلانا كامل نشوفوا فيه كي مهابل طلعت وراه طبطبت ودخلت قتلوا مسلم وش كاين علاه كنت تتقابض انت واصيل . تبسملي قالي علاجالك . دهشت انا قتلوا علاه علجالي لاه وش درت انا ولا مزال يهدر على الحكاية تاع الصباح . قالي لا حكاية وحدوخرا . قتلوا وش هيا . قالي والوا راني نقصر برك تقابضنا علجال الخدمة هدا ماكان . قتلوا يخي مضربكش المتوحش هداك . ضحك قالي وياااا كون يسمعك . قتلوا يسمع على روحوا ما يديرلي والوا ديجا من ماضربنيش على المصيبة لي درتها ليوم ميزيدش يضربني .قالي تسما علابالك بلي ليوم درتي مصيبة ، قتلوا صاي علابالي وأخر مرة نزيد نعاود ، هيا نخليك غدوة أن شاء الله. قالي ادا كشما جا وهدر معاك اصيل سمطيه مترجعيلو حتى كلمة اوكي . قتلوا علاه وش كاين . قالي ديري كيما وصيتك وفرات . درتلوا براسي ايه و خرجت مع خرجت لقيت اصيل في وجهي .
