يدي تترعد سخانة بدات تطلع معايا يهدر معايا منيش قادرة نركز معاه نقولوا غير ايه ايه تقولولي وش بيا معلاباليش حاسة جسمي عاد غريب عليا منيش قادرة نتحكم يدي ترجف رجلي كيف كيف قلبي يدور حاسة عروقي يحرقو تقول فيهم لاسيد . حتى هو فاقلي قالي وشبيك جوليا . قتلوا والوا عييت وبردت نروحو . عنقني بيدو يمسح على كتفي قالي ايه روحي اركبي نلم لحوايج ونجي . خليتو وطلعت للطنوبيل نشوف معاه وعقلي معلاباليش وين قلبي يخبط بطريقة انورمال غمضت عينيا ندعي في ربي تجوز الحالة لي راني فيها تفكرت هدرة عليلو يعني راه يصرالي هكدا من لادروق يعني قادرين يفيقو بيا كون يشوفوا حالتي حكمني خوف وخلعة كيفاش ندير شفتوا كمل وطلع . شاف معايا وديمارا حسيت بيه حط يدو على رقبتي قالي راكي تعرقي . قتلوا ايه السخانة . قالي بصح راكي ترجفي وشبيك جوليا ادا حاسة روحك مكيش مليحة نعيط لريان تلاقينا في الدار . مفقتش مع روحي كرزت عليه قتلوا وانا لازمة على سناني قريب نطرطقهم راني لاباس عليا اصيل مظلش تسقسي فيا متعاملنيش شغل راني مهبولة . قالي خلاص بالعقل مقتلكش راكي مهبولة جيست تحيرت عليك برك . كي قالي هكدا فقت مع روحي بلي كنت نعيط عليه راح نكشف روحي هكدا وشبيا ، مسحت على رقبتي من العرق قتلوا مكانش قصدي نطلع صوتي عليك سامحني جيست تعبت وراسي وجعني راني حابة غير نرقد حط يدو على خدي قالي معليش بيبي علابالي بلي مش بقصدك . قدمت عندو حطيت راسي على كتفو وتمخششت فيه . تنهد قالي والله ما راني حاب نروح للخدمة ونخليك قلبي مراهش مهنيني من جيهتك . قتلوا معليش ياك هاد المرة وصاي قتلوا تولي تديني معاك . قالي ان شاء الله . وصلنا للدار هبطت انا لولة غير حطيت رجلي في الارض راحلي ليكيليبر حكمت في الباب تاع الطونوبيل جا عندي يجري حكمني قالي وشبيك راكي دايخة . قتلوا لاجيست نعسانة طريق مارانيش نشوف فيها حابة نرقد . بقا يشوف في وجهي حسيت مش مصدق هدرتي من لول للاخر قالي معليش ملا احكمي فيا نطلعك . دخلنا للدار وانا حاكمة في دراعو لقيناهم نصهم رقدو غير مرت خالي ومسلم ساهرين في الصالة رميت عليهم السلام وكملنا طالعين .دخلت للشمبرة دخل معايا قالي روحي ريحي ، صباح نجي ليك قبل ما نروح . هو خرج وانا تنفست بقيت ندور في بلاصتي خلاص مقدرتش رحت للخزانة نجري جبدت الصاشي نشوف فيها ومترددة هدرتو دور في راسي ، جسمي تغلب عليا مقدرتش نزيد نحمل الحالة لي راني فيها فتحت الصاشي وغمضت عينيا بلعت وحدة وعاود خبيتها وين كانت .
