هبطنا كامل لتحت في ريسيبسيون باه نروحوا للدار خاطر اصيل قالهم منسحقش حتى وحدة تقعدلي هنا . ركبنا مروحين كيما جينا بعد حنا قربنا نوصلوا عيط اصيل لولاد خالي قالوا رجعهم ملقيناش الدم بالاك وحدة فيهم عندها نفس الزمرة وتقدر تتبرعلو . عاود رجعنا من نفس الطريق . دخلنا شافنا الطبيب وسقسانا على الزمرة ظهرت غير انا لي عندي نفس الزمرة معاه AB-. بيسك زمرة نادرة قالولي معندك حتى مرض قتلهم لا . ولاوا حكموني غير انا والباقي رجعوا للدار . بقيت غير انا وولاد خوالي كامل من غير عاصم وعبد القاسم لي رجعوا للدار مع البنات . . دخلتني الطبيبة للشمبرة لي راح تنحيلي فيها الدم . قاتلي راح تقعدي معانا للصباح المريض راه قراف وقادر يحتاج بزاف دم . قتلها معليش ركبتلي الابرة لي تنحي . وقاتلي تكسلي باه مدوخيش . لقيت اصيل دخل . خرجت الطبيبة وهو قعد مقابلني انا غير شفتوا بكيت . قالي علاه راكي تبكي وجعاتك .درتلوا براسي لا قتلوا مسلم راح يعيش ياك مش راح يموت كيما ماما منيش حاباتوا يموت تعيش دير حاجة خليه يعيش . هبط راسوا قالي كلشي بيد ربي سبحانو . بقيت نشوف معاه حتى هو يا حليلو مسكين خوه هو وياه كي توام نهار كامل وهوما مع بعض في الخدمة في الدار مام حتى كي يتقابضو زوج دقايق ويرجعوا مع بعض كلي ما صرا والوا باين راه غايضوا خوه بزاف . كملت تعمرت الصاشي لولة تاع الدم دخلت الطبيبة نحاتها وعلقتلي وحدة اخرى. قالها مش بزاف عليها زوج ما يصرالها والوا . قاتلي الله غالب المريض محتاج بزاف دم وهنا مكانش الزمرة تاعو ، بصح متخافش مايصرالها والوا جيست قادر دوخ شوي ، لازم تاكل باه تريكيبيري برك ، وراح نحكموها للصباح اونكا تصرى حاجة . قالها معليش وقف قالي نجيبلك جي تريكيبيري بيه ما بين ما كملتي ونجيبلك لعشا . قتلوا صحا مطولش عليا ولا عيط لوسيم يبقا معايا منيش حابة نبقا وحدي . تخنزر فيا قالي منطولش . وخرج شوي ورجع لقاني في حالة العرق يصب مني وجهي عاد ورقة قطرة دم مكانش صفاوني . قدم عندي قعد بجنبي في سرير حط يدو على خدي قالي صفا جوليا . قتلوا امممم راني بردانة ودايخة . قالي اصبري دوك نعيط للطبيبة تجي تنحيلك بزاف عليك هكا . عيطلها جات نحاتلي وهو عطالي باه نشرب الجي . دخل مروان يجري قال لأصيل اصيل اجريييي مسلم حبس قلبوا . خرجوا يجروا في زوج وانا من الخلعة خرجت نجري وراهم شعري طالع في السما الطريق نشوف فيها فلوا من الدوخة وصلت وين كانو لقيتهم مع الطبيب سمعتوا قالهم فاتت سلامات ادعيو متزيديش تصرالوا . غير سمعت هدرتوا جيت مخبوطة على وجهي دخت على طولي في الارض . من وراها فقت لقيت روحي في الشمبرة لي كنت فيها بالسيروم في يدي .
