قالي علاه راكي تحوسي دوك . حابة تبقاي هنا باه تلقاي راحتك وديري رايك ، بصح متحلميش بيها انا نوقفك كي شوكة في البلعوم وبسيف عليك تمشي قدامي . قتلوا والله ما راني خاجتها من هنا وايه نبقا هنا وندير واش نحب وانت ما عندك حتى دخل فيا . عض على شواربوا قالي معليش . بقا يتلفت من ومن قلت دوك يكففلي وتجيني ضربة من كاش بلاصة حتى نشوف فيه طار على كونتار تاع تريسيتي هز كرسي وخبطو فيه قاع خيوطو خرجو عيطت خفت عليه لا يضربو التريسيتي الضو راح ضربة وحدة الدنيا ضلامت صبعك متشوفيهوش . تلفتلي قالي ابقاي دوك هنا. هز المفتاح تاع الباب كان محطوط فوق الطابلة وجا خارج . ماجيت نهدر نسمع فيه غلق عليا بالمفتاح من برة .
