نضت الصباح على صوت الطبطيب في الباب علابالي بلي ماما راحت تخدم واسمهان تقرى تسمى لازم انا لي نفتح . مشيت فتحت لقيتها صحبتي لأنتيم رؤيا هي اكثر وحدة وقفت معايا ولقيتها ديما معايا . قتلها وش غير الخير راكي مبكرة عندي ليوم . فاتت للدار وقاتلي ارواحي ارواحي راهم بعثوني ليك . قتلها شكون . قاتلي باينة شكون عليلوا مكانسيا قالك هزي عليا وشبيك راميتني في ثقيل . قتلها اففف من نيتك منوضتني على الصباح على جال عليلوا، ديجا روحي قوليلوا قاتلك جيجي صاي فضت بيناتنا مدابيه ميزيدش يديرونجيني . قاتلي من صح راه قالي بلي قال ليماه تجي تخطبك وانتي ياك كنتي تمشي معاه عاجبك الحال . ضحكت قتلها يهديك ربي انا جيجي الزين ولاطاي نتزوج بهداك ، كنت معاه غير كي كان مقلشني بالفليكساج والمصروف بصح درك صاي كرهتوا ولقيت خير منو . قاتلي حرام عليك جيجي الراجل راه حابك تاع صح وش فيها ادا تزوجتي بيه علابالك بيه يحبك ويموت عليك . قتلها شفتي هداك الحب لي يهدر عليه يبلوا ويشرب ماه انا منأمنش بحاجة اسمها الحب انا نأمن بحاجة اسمها دراهم وحاجة اسمها la belle vie . قاتلي الله يسهل عليك بصح والله ماراهي عفسة درتيها حرام عليك . قتلها غاضك اتزوجي بيه انتي هداك ما خصني غيرر نتزوج ميكانيسيا ويعيشني في خربة مع يماه ديجا مزلت صغيرة على الزواج راني غير 19 . وقفت قاتلي ملا علاه طمعتيه من لول ، المهم انا راني رايحة . قتلها ميغضكش الحال عليه من لول راكي تعرفي العقليه وهو لي لصق فيا وبقا يحاول المهم لعشية نروحوا ندورو كيفكيف . قاتلي اوكي على الربعة نعدي عليك . هي خرجت وانا رجعت للشمبرة تاعي بقيت نشوف وش راح نلبس لعشية هبطت لخزانة كامل وبقيت نقيس ونشوف مع روحي اي حاجة تجيني شابة بصح يا ريت كون جيت نلبس الحر والدوريجين ونعيش كيما يعيشو لبنات المرفهين الطونوبيل حابسة في الباب تاع الدار و اللبسة كل يوم من زي . كملت وجدت وش راح نلبس وروحت الكوزينة نفطر ملقيتش الخبز هزيت الصوارد وخرجت من الدار للحانوت نشري حتى حبسني عيليوا . قالي هكدا يا الرخيسة يا بنت لحرام يا المترياليست درتلك الشان وقصدتك للدار اخرتها تقوليلي مبقيتش نديرونجيك . قتلوا اسمع حدك لهنا تزيد كلمة نفرج فيك امة محمد كامل وايه متزيدش تدور بيا وديرونجيني راك منيتك حاب تتزوجني وتسكني في هديك الخربة مع يماك والله لا ضحكتني انت مش من مستوايا وين توصلني شوف روحك وشوفني انت متوصلش حتى لقرايتي فهمت ومتزيدش تقطعلي طريق . قالي انا مش من مستواك علاه قبلتي تكوني معايا من لول ولا لقيتي شكون يفورني عليك اكثر مني نسيتي ليامات لي كنت نمدلك بالمليون وزوج نسيتي الشي لي خسرتوا عليك كامل بصح اشفاي عليها يابنت الحرام اشفاي عليها مش وحدة كيفك للتمسخر بيا سمعتي عندها الحق يما بنت لحرام تقعد بنت لحرام وباينة راح تحبي لحرام كيف يماك . .قتلوا تزيد كلمة نسمعك وسخ وذنيك بيك بيماك بعدني بعدني ناقصني غير انت على صباح ربي وادا عندك حق عندي روح اشكي واحد ما راه حاكمك . كملت مشيت وخليتوا واقف ملڨري غاضني بصح هو لي خرب فيا واحد ما قالوا دور بيا من لول علابالو بيا هادي عقليتي . شريت الخبز ورجعت للدار فطرت ودوشت . كملت جات ماما وقت الغدا . دخلت شافتني قاتلي مقريتيش ليوم قتلها لا مقريتش قاتلي شوفي وش مدتلي لي نخدم عندها لبسة تاع بنتها تهبل راهي تجي قدك . فتحت الصاشي وبقات تجبد في اللباسي من الصاشي وانا دمي عاد يفور . قاتلي هاكي قيسي . قتلها علاه راكي ديري هكدا علاه ياك قتلك انا منلبسش لبسة الناس فهمتي منلبسش ، مكفاش تنضفيلهم في خماجهم وليتي تطلبيهم حتى في اللبسة والماكلة علاه راكي تدلي في روحك وذلي فيا معاك انا كرهت كرهت كرهت حياتي بسبابك انتي . قاتلي جوليا علاه راكي تقولي هكدا انا والله ما طلبتها هي لي عطاتهملي وحدها قاتلي اديهم لبنتك الصغيرة راهي كيف بنتي وش فيها هي اختك تلبس نورمال وجامي تشكات ذ وزيد ادا على الخدمة ياك المهم حلال مراني ندير في العيب مراني ندير في الحرام. ضحكت قتلها هداك وش خصك غير تزيدي تخدمي لحرام باه تكملي عليا مكفاش انا لي جبتيني بالحرام . هزت يدها وضربتني بكف قاتلي هاد الهدرة متزيديش تعاوديها . قتلها علاه راني نكدب انا الناس كل علابالها بلي أنا بنت حرام جرايرك انتي وياه عادوا يعيطولي بنت لحرام انتم تغلطوا وانا نخلص الله يلعنكم للزوج. دخلت للشمبرة تاعي وخبطت الباب .
