شوي وشفت طنوبيلتو ڨارات بحدانا وجا غير شفتوا وقفت قتلوا ملقيتي حتى حل باه تتتهنى مني غير تخرجني مهبولة ونداوي والله اعلم وقتاه تحطني في سبيطار تاع المهابل. حكمني على دراعي قالي اقعدي لا نضربك بزوج كفوف تشوفي النجوم الناس تشوف معانا اقعدي دوك نفهمك. نطرت يدو قتلوا معندك ما تفهمني الهدرة مش معاك الهدرة مع خالي دوك نقولوا كلش . قالي زعما راح تخوفيني بيه ولا واش قتلك اقعدي متقلقنيش بلا طوايش . هزيت ساك تاعي وشفت معاهم لزوج قتلوا انت حسابك مع خالي ، وانتي مدام راه مدايرك الكلبة تاعو من ليوم منعرفك متعرفيني . خليتها تشوف مشوكية وجيت ماشية حكمني من يدو ودورها قريب راح يكسرها قالي اطلبي منها السماح دوك . قتلوا لا . عاود دورلي يدي قالي قتلك اطلبي السماح منها ولا اقسم بالله نضربك هنا قدام الناس متقلقنيش . قاتلوا خليها اصيل نورمال راهي كي اختي علابالي تقلقت كي مقلتيلهاش عليا نورمال موالفة عيديو عليا حالات اكثر من هكا . قتلها متقارنينيش بالمهابل لي يجيو باه يتعالجو عندك . دزني شوي بيدو قالي اغلقي فمك يالله اطلبي السماح . قتلها اسمحيلي من بعد شفت معاه قتلوا تندم عليها . قالي طيري للطنوبيل دوك نجي تتحركي هكا ولا هكا رجلك نقصهالك . رحت وخليتهم ركبت في الطونوبيل وهو نشوف فيه منعرف وش قاعد يهدر معاها من بعد هو جا وهيا شاورتلي بيدها ودارتلي باي كلبة . مع ركب هز يدو في وجهي قالي كون ما جيتش خالق بلي يدي متتهزش عليك كون راني كسرتلك فمك على الكلمة لي قلتيهالها . قتلوا غاضك الحال عليها ، ملا نزيد نعاودها لك . قالي اغلقي فمك لا نغلط فيك صح. سكتت دورت وجهي نتفرج من الكارو ودموعي يطيحو غاضتني الحشوة والكدبة يقولي حبيبتي نديك تشوفيها وهو مديني عند طبيبة . حسيت بيه حبس . شفت معاه قالي بلا ما يغيضك الحال درت هدا الشي في مصلحتك . قتلوا وينا مصلحة انك تهبلني تركبلي لهبال تاع بسيف . قالي انتي متفهميش راكي تشوفي في روحك نورمال ، كاين وحدة في عمرك هكا تخمم ترمي روحها من فوق كيما درتي انتي لبارح . قتلوا قتلك مكنتش راح نرمي علاه متفهمش والله كنت نكدب برك . قالي تكدبي وانتي حطيتي رجلك في هوا قدام عيني كون ملحقتكش على آخر دقيقة كون راكي رميتي روحك تاع الصح ، يا سيدي نصدقك في هادي وتاع تجرحي يديك وتحبي تشوفي الدم هادي تجيك نورمال قولي هدا تخمام يجيك عادي . سكتت ودرت وجهي . حسيت بيه حكملي وجهي ورجعوا عندو قالي شوفي فيا متعرفيش شحال راني خايف عليك جوليا . شفت في عينيه قتلوا من واش خايف عليا من شكون . قالي خايف عليك من روحك ، انتي عندك ميول تحبي تأذي روحك تخمامك مش نورمال قادر في أي دقيقة تأذي روحك وبأسوء طريقة . دورت وجهي قتلوا وصلني للدار ولا نهبط نحكم تكسي نروح وحدي . ديمارا كملنا الطريق ساكتين غير وصلنا هبطت ديراكت حكمت شمبرتي وغلقت الباب مزدتش خرجت .
