لحقنا للسبيطار انا نشوف برك ، وسيم غير يسب في اسمهان هو من بكري ميحملهاش ويقول نروح نديرلها ونديرلها . هزني دخلني لداخل شمبرة جات الطبيبة تجري قاتلوا وشبيها قالها عندها زوج ضربات في راسها ولا ثلاثة زوج الصباح ووحدة قبيل على 9 . قاتلوا كيفاش ثلاث ضربات هادي كيفاش صرات قالها اخدمي خدمتك ومتحوسيش تفهمي . قتلوا منقدرش نفهم وشبيها ولا نفوتها حتى تقولي على الأقل نوع الضربات ادا راهم اكسيدو ولا . قالها لالا تاع الصباح خبطات وتاع قبيل طيحة على حافة الدرجة . قاتلوا معليش جات راح تهزلي راسي عيطت قاتلوا لازم راديو . جاو زوج فراملة داوني دارولي راديو سكانار .ورجعوني عند الطبيبة . وسيم مع مسلم ومرت خالي لحقوا برة في كلوار واصيل لداخل في الشمبرة معانا قاتلوا حضارات عندها ارتجاج كيفاش حتى لدوك باه تجيبوها نورمالمو تجيبوها الصباح كي تخبطت وش صرالها كي تخبطت . قالها داخت شوي وناضت . قاتلوا ستر ربي مصرالهاش نزيف داخل في راسها ولا كسر في جمجمة ملڨري هكا والارتجاج واعر بزاف لازم غير بالراحة والدوا . قالها ورقبتها راهي من قبيل كانت تقولي رقبتي مش قادرة توازن راسها خلاص . قاتلوا هديك فعصة لازم بالكولي تاع الرقبة تقعد بيه من شهر حتى ثلاث شهر ستر ربي مش كسر اني قتلك ربي لي سترها .دارتلي دوا ولي كالمو في سيروم وراحت دخلوا عندي لي كانو في الكلوار . مسلم غير شاف اصيل تلاصقو . مسلم يقولوا كيفاش هادي تخبطت زوج مرات على راسها الصباح ياك كانت معاك ما تقوليش انت لي ضربتها قول نعرفك مهبول بصح توصل بيك تضرب الطفلة على راسها . هو قالوا هكدا ولخر هاج عليه حكمو من تريكوه قالوا وش دخل &&& انت قول وش قودك نقتلها وانت تشوف معندك ما دخلت كبرت وليت تعلي صوتك عليا يا الطحان . ويماهم عادت تندب يا شومي يضرب في الطفلة على راسها حاب يقتلها مرت خالي متحبش عليا خلاص تعزني بزاف ربي يخليها . وسيم يفك بيناتهم . مسلم قالوا كبرت ايه قتلك جوليا منحبش عليها يتيمة في وسطنا امانة يا زحي وانت تضربها نسيت وعدك ، شفت روحك مش قدها اجبد عليها انا اولى بيها . زاد هبل لوخر قالوا ليوم &&&&&& . كلمة من نوع الرافيع لي قالها ما حشم من حتا واحد . لصقوا في بعض بصح اصيل لي كان حاب يضرب مسلم . وليت نبكي انا السبة لي راهم يتعاركو . وليت نعيط على مسلم قتلوا انا هو لي قلقتوا هو مضربنيش غير جا يبعدني تخبط راسي بركاو من العراك ربي يعيشكم . ولى حبس مسلم خرج مقلق وهداك يطير وينزل وحدو يفيبري رايح جاي يعيط وياكل في روحو يقولي انا اولى بيها منتا كبر عاد يهز صوتوا عليا . ومرت خالي غير تهدن فيه اصيل يرضيك وليدي بلعقل برك مكانش قصدو هو غير خاف عليها . قالها علاه يخاف عليها وش دخلوا في &&& هو . قاتلوا خلاص اصيل الطفلة مريضة زدتوا كملتوا عليها . شافني نبكي ولى سكت قالها نخرج ندير قارو ونرجع . قاتلوا عندك تعاركو برة . خرج وخلاها . جات مرت خالي قعدت حدايا قاتلي احكيلي كيفاش حتى ضربك . قتلها مضربنيش غلطة برك . سكتت شوي ورجع قالي زل عليك شوي . هزيت رأسي برك . قالي قاتلي الطبيبة تقدري تخرجي بعد نهارين . بقيت نهارين في السبيطار بصح وش نقول وجاع يقتل فيا غير بلي كالمو سيرتوا من عاد الراس منقدرش نتحرك يا ربي ادا رحت للتوالات برك هما كل يوم عندي كامل جاو شافوني غير اختي لعدوة مالقري هيا سبتي لي طحت على راسي بصح والله ما جات وما سقسات وما قالت اختي يعود كشما يصرى فيها غاضتني بزاف منها حتى وليت نبكي كون انا في بلاصتها والله ما نخليها دقيقة. صح منتفاهموش بصح مش لهاد درجة . اصيل معايا بدقيقة ميتحركش من عندي سيرتوا في ليل يبات عند الباب يعس ملڨري مكان والوا مفهمتش علاه يبات يعس . نهار لي راح نخرج جاني مسلم صباح جابلي قشي لي راح نخرج فيه . ثبتب مع وجهو ضربة زرقة جيهة عينو . قتلوا شكون لي دارلك هكا اصيل ياك . ضحك قالي موالف ما اكثر . بكيت قتلوا كامل بسبتي. قالي مش بسبتك ، انا لي يخرب فيك شغل فيا انا حتى لوكان اصيل نفسو مالقري علابالي هو امبوسيبل يأذيك . قدمت عنقتو قتلوا نحبك بزاف والله . قالي العزيزة تاعي هيا نوضي لبسي يجي اصيل يروحك . هو خرج وانا بدلت بسيف منقدرش نحرك راسي بزاف . كملت جا اصيل غير دخل عندي شنفت عليه. قالي غير الخير تقلبي في شنايفك عليا كليتلك عشاك . قتلوا علاه ضربتوا . قالي جا يشكيلك كي لولية . قتلوا متقولش عليه هكدا ومتزيدش تضربوا ولا حقرتوا كي يدو مكسورة . قالي ربحت اسيدي انا وليت حقار وانتي وليتي تملي عليا وش ندير ووش منديرش ، انتي وش دخلك بيني وبين خويا هو علابالو بالعقلية وميزعفش مني . قتلوا بصح حرام عليك ضربتوا. قالي ياسيدي راني رضيتوا انتي علاه غايضك هكا . قتلوا منحبش عليه . حسيتوا شغل شنف معجبوش الحال. قالي هيا لا راكي واجدة نروحك عندي خدمة . قتلوا واجدة سيبو . قالي ايه امشي . بقيت واقفة وهزيت يديا . قالي وشنو قتلوا هزني كيما جبتني . قالي والله رفاد انا نبقا هازك امشي راكي لباس عليك . قتلوا لا مزلت مريضة كي نمشي ندوخ وزيد هاد لاطاي لي عندك كاملة متقدرش ترفدني انا لي قد نملة بنسبة ليك . تنهد قالي لعمال على ربي قدم هزني قدمت راسي بستوا على خدو قتلوا حتا انت منحبش عليك . قالي وشنو قتلوا حتى انت نحبك بزاف واكثر منهم كامل والله أكثر حتى من مسلم بصح متقولوش يزعف . ضحك قالي انا لي غالط نتبع فيك مزلتي تلعبي على روحك.
