رجعت مرت خالي رقدت معايا حتى الصباح باه فقت ، هزيت تلفوني نشوف في الساعة لقيتها 12 تاع النهار اوو كيفاش بقيت راقدة لحتى هاد الوقت ، دخلت مرت خالي قاتلي جوليا نضتي صباح الخير قتلها. صباح النور قاتلي رقدتي مليح ياك لبارح . قتلها ايه يعطيك الصحة على لبارح كنت محتجاتك صح . قاتلي متقوليش هكدا من لي جيتي لهاد الدار راكي بنتي . قتلها ربي يخليك لينا . قاتلي امين وش جيت نقولك عيطلك اصيل مهزيتيش ولى عيط عندي قالي قوليليها كي تنوض توجد روحها دوك نجي نديها . قتلها وين راح يديني . قاتلي والله ما علابالي كي يجي ونسقسيه المهم انتي وجدي روحك بالاك على الورق تاع الجامعة . قتلها ايه معليش على قداه قالك نجي . قاتلي مع الغدا . نضت دوشت شفت روحي في المراية تخلعت عينيا قريب راح يتغلقوا تالمو تنفخو من البكا ، لبست سروال كارڨوا وهودي اوفر سايز شعري خليتوا مطلوق كيما راه ، لبست أديداس بيضة وهبطت لقيتهم حطو لغدا . قعدت معاهم ، اسمهان غير تشوف فيا بنص عين وتشنف علابالي كي عيطت عليها لبارح ،شفت بلاصت مسلم فرغانة . سقسيت مرت خالي قتلها مسلم مزال ما رجع قاتلي مزال عيط لبارح في ليل قال بالاك نجي بالجمعة وراه قالي سلميلي على جوليا قتلها يسلم عليه الخير ربي يعينوا . حطو لغدا ،دخل اصيل من برا قال سلام عليكم . رجعنالوا جا قعد في بلاصتوا تغدينا انا مكليتش بزاف غير دقت برك ، كمل هو قالي ادا كملتي هيا نروحوا وقفت قتلوا نجيب الساك تاعي ونجي. قالوا خالي وين رايحين قالوا مديها باه تريقل اوراق تاعها تاع الجامعة . نطقت اسمهان قاتلوا واش هادوا لورق ميخلاصوش ، كل يوم طالعة هابطة عليهم . تخنزر فيها سكتت . شاف معايا قالي هيا جيبي ساك تاعك خلي نروحوا هداك هو الوقت .طلعت جبت الساك وتلفوني وهبطت . خرجنا ركبنا وديمارينا قتلوا وش من ورق هادوا لي تهدر عليهم قالي لا ورق لا والوا رايح نتلاقا مع ريان قلت خلي تجي معايا خير من تبقاي في الدار ولا لا . قتلوا انت رايح تتلاقا مع حبيبتك وانا لاه . قالي هيا لي قاتلي جيب معاك جوليا توحشتها عجبتني القصرة معاها المرة لي فاتت .قتلوا علاه مقوتليش في الدار على الأقل نلبس لبسة كيما الناس نوجد روحي ، نروح نتلاقاها هكدا بحالتي هادي . قالي وشبيها حالتك راكي نورمال . قتلوا شوف حالتي وتقولي نورمال شوف شعري كيفاش داير . شاف معايا و بقا يعدلي فيه بيدو من قدام قالي وشبيه شعرك لباس عليه. قتلوا رجعني رجعني للدار ديجا شكون لي قالك حابة نخرج ليوم انت تخطط في بلاصتي من زي راسك . قالي اصبري دقيقة قارا الطونوبيل على الجنب ونحا الكاسكات من راسوا وحطهالي في راسي . ضحكت قتلوا وش راك دير . قالي ها صاي راه تغطا شعرك لي هبلتيني عليه . قتلوا تتمسخر اصيل شوف قدماه جاتني كبيرة على راسي . قالي اصبري برك دوري دوك نريقيلهالك تولي قد راسك . دورت راسي بقا ينقصلي فيها حتى عادت قدي قالي هاه دوري ترا نشوف . دورت عندو بقا يعدلي فيها من قدام على وجهي قالي هاه جات شابة تهبل زادت فيك النص . جبدت لمراية نشوف قالي وش رايك . قتلوا اممم عجبتني قالي سيبو درك نروحوا. درتلوا براسي ايه .
