طاح ليل وانا نصحا زوج دقايق وندوخ معلاباليش من واش يمكن من لادروڨ لي دارهولي في دمي ولا من ضربة تاع راسي مي ماكنتش نفرق ادا راني نايضة ولا راني دايخة ولا راقدة ساعات نفطن عليه يبوس فيا ولا يقلب فيا مي ما كنت ندير والو مخي ضائع مني . المرة لخرة حسيت بيه كي صب عليا الماء فتحت عينيا قالي اصحاي راه الوقت باه نرجعك . بقيت غير نشوف فيه للحظة نسيت كلش ضحك قالي راكي لاسقة معليش تصحاي وتتفكري هدرتي . جبدني من يدي قعدني قالي شوفي غادي نوصلك لداركم تجبدي اسمي نقطعك قولي بلي لي خطفوني جبدو اسم اصيل ولد خالك عندو عديان بزاف ومغاديش يعرف شكون فيهم كون يقولوا شفتيه ولا شفتي لبلاصة لي كنتي فيها قوليلهم ماشفتش فهمتي . بقيت غير نشوف فيه خبطني بكف حتى سال الدم من شفتي وخشمي . شاف معايا قالي هكا مليح وقف وحكمني من يدي يكركر فيا معاه خطوة منيش قادرة نديرها حالتي حالة تريكويا مقطع جيهة صدري كاملة بالغبرة من شعري لبستي . وصلنا للطنوبيل ركبني معاه من قدام وديمارا يسوق وحد الساعة باه دخلنا للافيل بيسك لبلاصة لي كنا فيها تبان بلي ريف قرية بعيدة على المدينة بقا ماشي حتى وصلنا للكارتي قالي بعد ثلاث ايام نتلاقاو مفهمتش هدرتوا ومهمتنيش المهم كي راح نرجع للدار غير نهار ونص تمنيت الموت فيهم وصل وين الباب فتح الباب ورماني وقلع بكل جهدو حتى خلى الغبرة وراه بقيت في الارض كيما راني وحد نص ساعة باه تحركت . كان ليل بالاك 12 ولا 1 تاع ليل وقفت بسيف طبطبت الباب فتحت عليا مرت خالي غير شافتني هزتها بعيطة من قلبها طحت عليها بعدها ما شفيت على والوا .
نسمع في صوتوا فتحت عينيا شفت روحي في شمبرتي في سريري دموعي هبطو ، تلفتت للباب مغلوق بصح الهدرة تسمع ، نسمع في صوت لمرا قاتلوا الارتجاج تاع راسها عاود رجعلها مي مش حاجة قراف بزاف بصح من حالة جسمها باين تعرضت لمحاولة اعتداء زوج مرات مي الحمد الله كانت محاولات برك يعني تقدر تطمن وعندها سوء تغدية نقص املاح وفيتامينات هادو كامل ميقلقوش بالدوا كلش يفوت مي الحالة النفسية لازم تكونوا معاها ان شاء الله فترة وتفوت . قالها راكي سور مكانش اغتصاب . قاتلوا لا كون مطمن مكانش راني قتلك محاولات برك من جراح لي في جسمها . سكت حسهم باين بلي راحوا مخي عاود تفكر كلشي القهرة و الحقرة لي راني حاسة بيها منقدرش نوصفها واحد ما يقدر يحس بيها كان جا عندي بابا كيما قاع لبنات منوصلش للحالة لراني فيها ، دخلت مرت خالي جات ديراكت عنقتني وتبوس الدمعة في عينها تقولي وش صرى في بنتي ياربي طفلة امانة مقدرناش نحافظو عليها . بكيت بقات نمسح على راسي تسكت فيا كلشي يفوت وتنساي الهم كي فاتت هكا سالامات راكي معانا دوك الشعرة متزيدش تقيسك لزتني لحضنها وانا مقلتش لالا بقيت بين يديها بصح كلمة مقدرتش نخرجها من فمي على قد ما حبت تهدرني مهدرتش ولات سكتت الصدمة تاع وش صرالي جاتني روتار بقيت في حضنها شوي نغفا ونفيق مخلوعة نقول بلي غير نحلم ومزال حاكمني نكوبس كلش يتعاود جيست ما نغمض عيني كي المنام نص لحوايج لي قالهملي مش شافية عليهم . المرة التالية نضت مخلوعة على صوت التكسار والعياط تقول القيامة قامت الصوت جاي من تحت فطنت مخلوعة نعيط على ماما حسيت قلبي فسخ . حسيت بمرت خالي تمسح على شعري قاتلي سمالله على بنتي بالعقل متخلعييش ماكان والوا . بقيت غير نبكي ونهترف بماما قاتلي متخافيش ماكان والوا صاي ارجعي ارقدي . ناضت تزرب باه تخرج قتلها وش كاين قاتلي والوا بنتي متخافيش دوك نبعثلك ريمة ولا اسمهان تبقا معاك. وخرجت صوت للعياط باقي ويقوا بصح منيش نفرز وش راهم يقولوا بصح صوت رجال . دخلت عندي ريمة جات قعدت بجنبي باستني على خدودي وعلى راسي قاتلي الحمد الله على سلامتك خفنا عليك بزاف جوليا فاتوا علينا نهارين الله لا يشوف فيهم مؤمن. تبسمت برك معاها مزالني تحت الصدمة قتلها وش عياط هدا وش كاين . تنهدت قاتلي والوا مكان والوا . قتلها جاوبيني وش قاتلي الولاد مدابزين مع بعض . قتلها علاه وش كاين وش صرى . قاتلي اصيل خويا جاتوا حالتوا ودابز معاهم ، من لي ملقيناكش وهو هكدا يدخل يدابز ويكسر يخرج كيفكيف وليوم دابز مع وسيم وضربوا قالوا انت هو السبة انت لي محطيتيش عينك ياك وصيتك عليها وقالهم كامل عندكم ذنب في لي صرالها علاه كي كنت انا هنا واحد ما قدر يدنى منها وكي روحت شهر مقدرتوش تحافظو عليها وطيحلهم الهدرة بزاف . سكتت شوي من بعد قاتلي راه مقلق بزاف كل يوم يدير هكدا من بعد يخرج وميزيدش يرجع حتى للصباح وعمي (على باباه ) طلعتلوا لاطنسيو منو لبارح قريب راح فيها .
