لقيت اصيل قاعد معايا في شمبرة كي شافني فطنت قالي لباس مراكيش دايخة قتلوا لا وش صرى قالي علاه حتا تنوضي من بلاصتك ، دختي قدامنا طاحلك السكر بزاف من قبيل وانتي دايخة. قتلوا ومسلم وش صرالوا قولي الصح متكدبش عليا . قالي الحمد لله مزال عايش من هنا لغدوة تبان. قتلوا الحمد الله ياربي ، شحال راهي الساعة قالي ثلاثة تاع الصباح . وقف جابلي الشاريو تاع الماكلة قالي متعشيتيش لازم تاكلي باه تركبيري . حطو قدامي وجا رايح . قتلوا خارج قالي ايه الطبيب عند مسلم لازم نروح نشوفوا منطولش ونرجعلك هاكي تلفوني كي تحتاجي حاجة عيطلي عند واحد من لولاد برك وسيم ولا مروان يجيو عندك صحا قتلوا ايه . هو خرج وانا كليت شوي جات الطبيبة نحاتلي السيروم من يدي . هيا راحت وانا وقفت مشيت نتسند على الحيط مزال فيا آثار تاع الدوخة خرجت مشيت حتى وصلت للبلوك لي حاطين فيه مسلم . جا اصيل عندي قالي علاه جيتي هنا راح تهبليني انتي علاه محكمتيش بلاصتك تحوسي دوخي كيما قبيل . قتلوا مليت وحدي لهيه وزيد ما تهنيتش على مسلم جيت نستنى معاكم هنا . قالي نجيب لمفاتح ونروحك للدار معندك حتى قعاد هنا . قتلوا منقدرش قاتلي الطبيبة لازم تبقاي للصباح قادر يحتاج دم . قالي ولاه انتي بقا عندك دم حتى تتبرعيلوا بيه صفاوك ، صاي متخافيش راني دبرتلوا قبيل دم من برة امشي تروحي للدار قتلوا لا تعيش حابة نستنى معاكم هنا معطانيش قلبي نروح ونخليه . قالي حتا كي تقعدي ما راح ديريلو والوا جوليا راه بين يدين ربي بصح متخافيش فيها خير قالي الطبيب راه يتحسن شوي بربي ان شاء الله منا للصباح قادر يكون لباس قتلوا خلاص مالا نستنا للصباح ونروح تعيش . تنهد قالي خلاص اقعدي هنا متبقايش واقفة . قعدت في الكرسي رجع عند لولاد منعرف وش قاللهم ولاو هبطو لتحت وهو رجع عندي قعد . قتلوا وين راحوا قالي سرحتهم يروحوا ياكلوا حاجة ولا يتقهواو بزاف عليهم من قبيل هوما واقفين هنا ماعندها حتا معنى وقفتهم يروحوا يروبوزيو خير هبطوا للقهوة تحت . شاف معايا لقاني مزالني نترعد قالي بردانة . درتلوا براسي ايه قالي وين راهي الفاست تاعك ولا جيتي هكدا . قتلوا جيت هكدا من الخلعة نسيت باه نلبس. قالي مفهمتش انا عاصم فواش كان يخمم كي جابكم كامل . شفتوا وقف نحا تاعوا حطها على كتافي ورجع قعد بجنبي . تكيت على كتفو ،عنقني بذراعوا . قتلوا علاه انا منحوسة هكدا لي نحبهم كامل يتأداو ولا يروحوا ويخلوني ، كون تصرى حاجة لمسلم صدقني حاجة فيا راح تدمر ومتزيدش تتصلح . شاف معايا قالي لهاد الدرجة تحبيه. قتلوا متصورش شحال حبو كبير في قلبي ،صح معنديش بزاف من لي عرفتوا أقل من تسع شهر بصح نحبو بزاف كان ديما راجل معايا من اول يوم شفتوا فيه و قبل حتى ما يعرفني انا شكون . حرك يدو على كتافي وشاف معايا قالي كون انا لي راني في بلاصتوا راح تخافي عليا وتدعيلي هكدا . من بعد تبسم وقالي بصح انا متحبينيش باينة راح تدعي عليا بالموت. قتلوا بعيد الشر عليك علاه تقول هكدا حتى انت و الله نحبك بزاف ، صح ساعات نقلق منك كي تبقا تعيط عليا بصح والله نحبك واصلا انا نحبكم كامل حتى من مروان بخنونة ونحبوا وعزيز عليا .طرشق بالضحك قالي شكون بخنونة . قتلوا مروان ولد ماماه. قالي كون يسمعك يعلقك من شوافرك قتلوا معندو ما يديرلي خواف على روحوا من نهار هددتوا انت مزادش دار جيهتي . قالي مش خوف قدر برك .
