منعرف كيفاه غفيت ولا نقولوا رقدت حتى سمعت الدقديق بالقاوي تحسب الباب راح يتكسر وصوت لعياط تحت ولبكا تخطفت من بلاصتي سابعة قلبي يرجف وصوت اسمهان ورا الباب تقولي جوليا افتحي وتبكي وصلت للباب فتحتوا وجهي حسيتوا جمد من الخلعة قتلها اسمهان وش كاين وش صرى بقات غير تبكي حكمتها من دراعيها قتلها انطقي وش صرى اهدري قاتلي مسلم دار اكسيدو في طريق وقالو مات مع صحابوا .قتلها وشنو شكون لي دار اكسيدو قاتلي راني نقولك عيطو لأصيل قالولوا بلي مسلم دار اكسيدو مع صحابوا ومات . هبطت نجري بالحفا في الدروج حتى وصلت للصالة لمزية مزلت بقشي تاع الخرجة بعد لقيت الصالة مقلبة لبنات كامل يتبكاو خالي وولاد خالي عاصم وعبد قاسم هازين التليفونات ويعيطو الباقي مكانش شكيت راحوا مع اصيل وصلت عند مرت خالي لقيتها نص دايخة تبكي وتعيط راح الغالي لحنين راح كبدتي تلحت فيها وانا نبكي قتلها طاطا وش صرا وين راه مسلم ياك غدوة نجي وين راه . قاتلي وليدي راح يا جوليا وليدي لحق عمتوا راح لي كان يقولي جوليا اختي راح لي كان كل يوم يوصيني نتهلا فيك راح كتافك بردوا مرة أخرى يا بنتي مات خوك يا ربي صبرني . انا غير نبكي ما فهمت والوا من شوك تاع ماما وليت نترعد وحدي نطق خالي قالها استهدي بالله يا مرا وادعي ما يصرالوا والوا مزال ما كان حتى خبر . بقينا قاعدين نستناو على نار مرت خالي محبتش تسكت هيا وخاوتوا قد ما هدنوها محبتش ، انا غير نشوف ونترعد وحدي من الخلعة عينيا ما نشفوش من الدموع هك شوي وعيطو لعاصم قالوالوا بلي جابوه لكلينيك بريفي قريب بصح خالتوا متعجبش بزاف قادر في أي دقيقة يروح فيها شفتهم رايحين خالي ومرتوا البنات لصقت فيهم نروح نحاول فيهم باه يديوني معاهم نطقت مرت خالي قاتلوا ندوها والوا حتى لبنات قالوا نروحوا تحشرنا كامل في زوج طونوبيلات تاع عبد القاسم وعاصم علينا غير نسا خاوالي لخرين في الدار . انا ركبت هكاك بقشي نفسوا وكلاكات تاع دار بلا فيستة مالقري كان البرد يقرم بصح والله ما حسيت بيه باقية غير ندعي في ربي منيش حابة نخسر انسان عزيز عليا عادت عندي فوبيا من الخسارة . وصلنا للسبيطار في رمشة عين كان ولد خالي يزرب يسوق فيتاس طلعنا كامل وين كانوا حاطينو في البلوك لقينا الدنيا معمرة بالغاشي سيرتوا رجال صحابو لابوليس كامل جاو وزيد شوي فاميلية تاع صحابوا لي داروا معاه اكسيدو .المهم غير شافنا اصيل حسيتو تهز وتحط من الغش سيرتوا كي شافنا حنا لبنات كامل جينا . كنا واقفين بعيد شوي على رجال جا ديراكت عدنا وش جاب ر#### كامل هنا حابين تهبلوني مع من جيتو نطقت اختوا قاتلوا حينا مع عاصم وعبد القاسم . شافهم جاين من البعيد غير وصلوا ناض يعيط قالهم انتم $## باه تخمموا جايبين طزينة تاع بنات لكلينيك وعلابالكم بلي الدنيا مسركلة بالرجال راح يركبكم الطحين ولا كيفاه . قالوا عاصم اصيل مش وقتها الهدرة هادي . قالوا وقتها ونص دوك تروحهم من جبتهم مانيش ناقص همهم انا . نطقت انا قتلوا ما نروحش قبل ما نشوف مسلم . شعل فيا قالي شوفي روحي ن####من جيتي منيش ناقص ### هنا . من بعد شاف عاصم قالوا يالله اديهم عليا من هنا . . هو جا راح يهدر وخرج الطبيب من البلوك راحولوا كامل يجيو بصح حنا لبنات بقينا بعاد قالهم راهو في يد ربي حنا درنا لي علينا لباقي على ربي من هنا لغدوة تبان . طاحت مرت خالي تعدد ولبنات خواتاتوا كيف كيف غير يتبكاو انا غير نشوف بالعين ،حنا هكاك وخرج الطبيب تاع صاحبوا لي كان معاه قال لماليه بلي ولدهم مات . الكلينيك قلبوها منضر الله لا يشوف فيه مومن حسيت قلبي ضرني تاع الصح المواجع كامل تحيرت عليا جنازة ماما بين عينيا حسيت بيد تحطت عليا جيت نشوف لقيتوا وسيم وليد خالي قالي جوليا وشبيك من قبيل وانا نهدر معاك وانتي مش معايا هيا اهبطي لتحت لبنات كامل هبطو باه تروحوا. درتلوا براسي ايه وانا نشوف مع ام الطفل لي مات مسكينة قريب تاكل الارض .
