غير شافوها هكاك راحولها يجرو و كل واحد يرمي كلمة عليا وشبيك مهبولة علاه حرقتيها جنيتي هبلتي وهيا راح تفرفر في وسطهم تقولهم حرقتني شوهتني دارتهالي مكرة غايرة مني وانا غير نشوف مقدرت نستوعب والو كلش جا ورا بعضاه رجال مكانوش في الدار داها خالي لوسطاني للسبيطار وهو يسب يكفر كان راح يتلاح عليا يضربني كون مش مرت خالي وحيد لي وقفت في وجهو هو أصلا من لول يحب اسمهان أكثر مني . مرتو تسب من هيه هادي راهي مهبولة مخلصة كواغطها بلاصتها سبيطار لمهابل وانتم معيشينها معانا في دار امهم ماتت وحنا حصلنا فيه كل نهار ديڨا قايمة في دار بسبابهم قتلكم هادو لبنات يجيبو اخرتنا وقولو ما قلتش ، مام لبنات كل قعدو غير يشوفو معايا بتأنيب تاع علاه درتيلها هكا واحد ما وقف معايا ولا حوس يفهم وش صرى من غير مرت خالي لي كانت معنقتني وتهدئ فيا خرجتني معاها للشمبرة تاعي دخلنا للشمبرة ولات تقولي غير بلعقل عليك وش صرا فهميني وش دارتلك وش صرى ، انا والوا منيش معاها لي سمعتو كفا ووفا ، غير نبكي بسكات ونخمم ولات تهدي فيا وتقولي بالعقل عليك علابالي مش قصدك تحرقيها هدي روحك كي بقيت ساكتة وشافتني كالم قاتلي نخرج دقيقة نقول لخالك ونرجعلك متخرجيش من الشومبرة حتى نجي هيا خرجت وانا مزلت نسمع فيهم يتعايطو ويهدرو يسبو فيا مام لبنات كل جاو مع اسمهان غير ريمة قاعدة نقولهم باين بلي دارتلها حاجة سينو متحرقهاش ولا بالك قاستها غلطة . انا مهمتنيش هدرتهم ولا سبهم مكنتش أصلا نخمم فيهم كنت نخمم كيفاه بابا جا يحوس يشوفني ويكتبني على اسمو وهما خباو عليا سيرتو أصيل لي علابالو شحال متمنية غير نشوفو برك مقدرتش نركح في بلاصتي نضت ندور في شمبرة تخلطت عليا فرحة خوف وخيبة وزعاف كبير في قلبي وليت جبدت حبة دوا شربتها نكلمي بيها روحي من بعد هزيت ساك تاعي وخرجت منعرف لوين راني رايحة المهم نخرج محملتش الدار . مع خرجت من شمبرة تلفوني صونا شفت لقيتو اصيل عرفتها تكون وصلتهالو سخونة علابالي كوبيت عليه وغلقت التلفون هبطت لقيتهم متلمين في الصالة غير شافوني طاحو يسبو فيا سيرتو مرت خالي الوسطاني وبنتها مخلات حتى كلمة مقالتهاش يالملقطة يا بنت الحرام ، انا غير ساكتة مش خوف منها ولا قدر جيست مكنتش أصلا معاها راني نخمم وعقلي سارح بعيد . خليتها وجيت خارجة حكمتني مرت خالي وحيد قاتلي وين رايحة جوليا قتلها اطلقيني راني خارجة شوي ونرجع قاتلي ما عندك حتى خرجة بحالتك هادي ادخلي لشمبرتك قتلها قتلك اطلقيني راني خارجة ندور شوي ونرجع . ومرت خالي الوسطاني تقولها اطلقيها ل###$ توحشت الرجاجيل راهي رايحتلهم ملقاتش شكون لي وقفها عند حدها تعيا دير كيف امها .تلحت عليها راح نضربها قتلها متغلقيش فمك.عليا يا شيبة النار قولي متغلقيش فمك تهدري على ماما راهي اشرف منك يا كلبة . قبل ما نوصصلها تلاحت عليا نجمة دارتني تحتها قتلتني بالضرب مع لي كنت شاربة دوا وفاشلة دراعي مقدرتش نهزو فيها ولبنات وحدة مااقدمت ودافعت عليا كامل يتفرجو غير ريمة ومرت خالي لي يحزو بيناتنا حتى بردت قلبها باه طلقتني شنشفتني . بقيت في الارض نبكي من الحقرة وذل لي راني فيه وليت هزيت ساكي وخرجت والله ما نزيد نرجع لهاد الدار .
