فات شهر بالتمام خرج مسلم من السبيطار بعد ما تعافا شوي بصح مزالت ذراعوا ورقبتوا مضرورين ، مسكين زيد قالولوا كون تبقى حالتك هكدا يخرجوك من الخدمة ، انا الشهر كامل فوتوا ساعات طالعة هابطة عند مسلم في السبيطار نطل عليه ولا في الدار مع مرت خالي ولبنات ،تقربت منهم بزاف سيرتوا ريمة وبنات خالي وحيد . الولاد ثاني كيف كيف تقربت منهم أصلا هما حسيتهم بداو يتقبلوني بيناتهم نورمال . اصيل علاقتي معاه انا ومقدرتش نفهمها لحد الان ميفوتش نهار بلا ما نتناقروا وندابزو وتنوض بيناتنا بصح بعد زوز دقائق نرجعوا نورمال كلي ما صرى والوا كي نحتاج حاجة نروح عندو هو لول يخرجني نحوس نشري لي بغيتها ، ملڨري يتحكم فيا ويعس فيا على غلطة ، انا ساعات نتنرفى منو ساعات يعجبني الحال نقول ياك انا كنت حابة شكون لي يخمم عليا ولقيت الحمد الله ما يفوتش نهاري بلا ما نشوفوا فيه ونهدر معاه . اسمهان جبدت روحها عليا كلي ماراهيش اختي ملڨري جربت قداه من مرة نفهمها بلي ما كاين والوا بيني وبين اصيل بصح هيا سيبو جبدت روحها ما تهدر معايا ما تجمع معايا ما تسقسي عليا حتى انا كي شفتها هكدا جبدت روحي عليها هيا من لول انا وياها منتفاهموش وعقليتنا مش زي بعض ، بصح ساعات نحسها راهي تخططلي لحاجة ربي لي يعلم وش هيا .
صباح جديد نضت باه نروح للجامعة ، رجعت الجامعة تاعي لي هنا تهنيت من الاقامة وتمرميد والبعد بالمعارف في شهر قدرت نبدل الدوسي تاعي ونرجع هنا بفضل اصيل طبعا . دوشت ولبست جيب سيري جلد تحت الركبة بشوي لونها مارو وبيل دومي مونش لونوا باج دخلتوا فيها مع باسكات بيضة طلقت شعري درت شوي ڨلوس وهبطت باه نفطر . دخلت للصالة لقيتهم نصهم مكانش غير خالي ومرتوا ولبنات واسمهان لي قاعدين يفطرو . صبحت عليهم ردولي . شاف معايا مسلم جبد الكرسي الفرغان لي بجنبو قالي ارواحي لكبيدة تاعي اقعدي حدايا . ضحكت على كلامو هو ديما هكدا يتربج بيا نهار ما قال اسمي كي ناس لي يسمعوا يهدر هكدا يقول هادي حبيبتوا ولا مرتوا . رحت قعدت بحداه . ولخر تڨرن تقول ضربو جن خبط المغرف فوق الطابلة قالوا انت مش راح تحشم على روحك نقعد نهدر مع ### . مسلم تبسم وفرات مرجعلوش انا ما فهمت والوا وشبيه هدا على الصباح لازم ديما ينوضها . هز روحوا وتخنزر فيا قلي راني نستنى فيك في الطونوبيل انتي مطوليش . وخرج مكملش حتى فطوروا . نطقت مرت خالي قاتلوا علاه هكدا مسلم تقلق في خوك على الصباح . شفت فيها قتلها لاه وش دارلوا مسلم هو منعرف عليه وشبيه تقول مجنون ناس تصبح زاهية وهو يصبح يشنف . ضحك مسلم قالي متعمريش راسك بيه افطري . قعدت نشرب في حليبي طاحت عيني في عين اسمهان حسيتها صح قاعدة تتحلف فيا تشوف فيا شوفة الموت معمرتش راسي بيها . كملت هزيت الساك تاعي وخرجت لقيتوا متكي على الطونوبيل ويستنى . رحت ركبت من لور شاف معايا قالي شوفار عند ###انا . قتلوا وشبيك تكفر على الصباح غير الخير نايض هايج علينا . قالي اهبطي اركبي القدام وسكري فمك . هبطت قتلوا شوف ادا مش حاب توصلني نروح وحدي بلاما تبدا تشنف على جدي على الصباح . تخنزر فيا قالي اركبري خيرلك . ركبت لقدام وسكتت. ديمارا يسوق تلفت شفت معاه مقلق غير ينسق كي لحنش زيد لقا السيركيلاسيو في الطريق كلا روحوا قريب يجهل بسيف ما وصلنا غددلي قلبي بالتنڨريش قارا قالي علاه قداه تكملي ليوم نجي نروحك ولا نبعثلك وسيم . قتلوا معلاباليش علاه حتى تشقي روحك دوك نكمل نروح وحدي . قالي قتلك لا تاع نروح وحدي غير انسايها كي تكملي تعيطيلي انا ندبر راسي . قتلو ايه . جيت هابطة من بعد درت ليه مديت يدي قداموا قتلوا هات . قالي وش . قتلوا دراهم فضلي المصروف . جبد من جيبو وهو يهدر وين راكي ديري فيهم فهميني برك ياك غير لبارح مديتلك . قتلوا شريت بيهم مكياج هيا هات برك راني طولت على الكور . قالي قداه تحتاجي . لي في يدو كامل خطفتهملوا قتلوا هادو يكفوا حتى لغدوة تزيد تمدلي . قالي غدوة تطلبيني نتعرى عليك راكي تقمري بيهم هادو راهم يعيشوا عايلة شهر كامل وانتي تلعبي بيهم في نهار . طرشقت بالضحك بستوا على خدو بزربة قتلوا مرسي يا المشحاح هبطت وخليتوا . دخلت قريت نص نهار كملت ، عيطتلوا شوي وهز عليا . قالي الو وي . معبيتش بروحي قتلوا يا يما على هديك لافوا تقتل . سمعتوا ضحكتوا . باه فقت مع روحي قالي علاه عيطي ولا عيطي باه تقوليلي لافوا تاعي تقتل . قتلوا عيطتلك به نقولك كملت تجي عندي ولا نروح وحدي. قالي احكمي بلاصتك دوك نجي . قتلوا صحا مطولش عليا . كوبيت ووقفت في الخرجة نستنا فيه . شوي وجا فايت عليا واحد بالطونوبيل أودي بيضة باين كاسبها جديد وحاب يصيد بيها حبس قدامي هبط الكارو قالي لاطاي مانكا يا جدك . شفت فيه بوقوص يهبل بصح اصيل خير منو . كون جيت كيما بكري يا حصىرا من لي صيدتو . دورت وجهي عليه . شفتوا هبطت وجا قطع طريق وجا عندي قالي علابالك عجبتيني فضيتي فيا يا المكسيكية ارواحي معايا ونقلش. شفت معاه طلعت حاجبي قتلوا خويا غير روح سون سمير خير ما نديرلك التبهدايل . قالي متلعبهاش وطيحيلي خشينة علابالي حتى انا عجبتك ارواحي معايا ومش راح تندمي . قتلوا هادي لخرة غير روح خويا فوتني خيرتلك راجلي راه جاي منيش حابة المشاكل . ضحك قالي نعرفوه القالب تاع راجلي وما راجلي شاف مع يدي قالي ومتزوجة بلا خاتم جديدة هادي . انا بدا يلعبلي على المورال وخفت يلحق عليا اصيل. قتلوا متفهمش قتلك روحي فوتني متفهمش اخويا ولا راك حاب نطيحلك قالي على الأقل اعطيني نميرو والله لا عجبتيني صح . ولاح يدو حكمني على يدي وقربلي . ما جيت نقولوا بعد عليا نشوف في طونوبيل اصيل دائرة في رونبوان باه يجي لطريق وين واقفة انا يا ربي شافني . دزيتوا قتلوا غير روح والله لا جا ليوم يقتلك ويقتلني . هداك شافنا الرونبوان حرقها ولوخر كي شافوا رايح يجري ركب طنوبيلتوا وقلع . واصيل لحقوا ديراكت .
