بعد ما قبلت باه نعقد في دار خاطر هدا حقنا سقسيت مرت خالي قتلها هدوك لي قاعدين في الصالة كل ساكنين هنا .قاتلي ايه راكي تشوفي الدار كبيرة مشاء الله جدك قالهم تقعدو كل تعيشوا هنا في هاد الدار ودعوة الشر لي يخرج منها علابالي بلي راكي تشوفي فيهم بزاف بصح مع الوقت توالفي بيهم وتلقاي راحتك معاهم . قتلها ان شاء الله .بقات تعدلي لي شعري قاتلي ضهرتي صح كيما حكالي عليك اصيل. قتلها وش حكالك عليا . ضحكت قاتلي متحطيش في بالك يجي نهار وين هو يقولك وش حكا عليك . وسوستني بصح علابالي راه حكالها عليا غير بالشر باينة هادي قتلها ميهمنيش وش يحكي ، أصلا انا قررت غير ترتاح ماما وترجع صحتها راح نروح نكمل قرايتي في ولاية خلاف .قاتلي علاه .قتلها التخصص لي راني حابة نقراه هنا مكانش بزاف .قاتلي الله يسهلك في واش راكي حابة من النضرة لولة دخلتي قلبي وراح تكوني وحدة من بناتي . رجعنا هبطنا للصالة قلت لخالي بلي راح نبقاو عندو حتى ترتاح ماما ومن بعد ساهل فرح بينا بزاف اما العائلة كاين فيهم لي فرح وكاين لي معجبوش الحال . وصل وقت الغدا قعدنا كل في الطابلة تاع الماكلة مزلت مش متقبلة بلي هدا شعب كامل راه عايش في هاد الدار وانا راح نعيش معاهم . شفت مع اسمهان تبان راهي بدات تتأقلم معاهم و مرة على مرة يهدرو معاها كلمة وهي ترجعلهم . اما انا حاستهم كل متجنبيني ومتحسسين مني ،ويشوفوا معايا تقول من جاية من كوكب آخر. حطو الغدا نطق خالي قالهم احسبوا حساب مسلم واصيل راهم جايين . شوي وصح شفتهم داخلين يهدرو بيناتهم بقيت نقارن فيهم ببعض هم صح يتشابهو بزاف اما ، مسلم يبان ضحايكي ووجهو بشوش اما اصيل يبان من وجهوا شراني ووعارة تتقاطر من وجهوا ويبان من هداك النوع لي عينوا زايغة . اما في الجسم كاين فرق بيناتهم اصيل جسمو اضخم من مسلم وباين بلي كبير عليه في العمر .مهم دخلوا مسلم قدم ديراكت باس راس يماه وخالي .اما اصيل ديراكت حكم بلاصتوا بلا ما يهدر معاهم شاف معايا وطلع حاجبوا ، دورت وجهي وهو مزال يشوف معايا اما مسلم جا قعد مقابلني تبسملي قالي راكي هنا .درتلوا براسي ايه وسكتت . فات هداك الغدا رهج كل ما نطلع راسي تجي عيني في عين اصيل نلقاه يتخنزر فيا مخلانيش نقعد براحتي . والباقي قاع يتهامسوا ما بيناتهم ومرة على مرة يهدرو مع اسمهان لي قاعدة بجنبي غير مسلم لي كي طيح عيني في عينوا يتبسلمي كأنوا يطمن فيا . كي كملنا رجعنا قعدنا في الصالة قلت لمرت خالي تقدري توريني التوالات . قالت لريمة نوضي وصلي بنت عمتك للتوالات . ناضت قبلي مشيت ولحقتها وصلتني تبسمت معايا قاتلي تعرفي ترجعي وحدك ولا نستناك. قتلها صحيتي روحي على روحك . هي راحت وانا دخلت غسلت يديا وخرجت لقيت هداك كوشمار حياتي واقف يستنى فيا متكي على الحيط ومربع يديه قالي راني نشوفك قاعدة فرحانة واش عجباتك القعدة عندنا . خزرت فيه وطلعت حاجبي قتلوا قصدك القعدة في دار جدي لي عندي فيها حق كيفي كيفكم ايه عجبتني بزاف . مسح على شواربو بصبعوا وتبسم قالي وش قتلك انا . قتلوا وش قتلي معلاباليش . قالي معليش ادا نسيتي نعاود نفكرك قرب مني قالي منزيدش نشوفك هنا هادا آخر تحدير ليك ولا راح ندير شرع يدي فيك . قتلوا دير لي تقدر عليه ، وديجا علاه راك حاطني بين عينيك هكدا ولا خايف . تبسم بأستهزاء . قالي من واه راح نخاف . قتلو تخاف لا نسحرك بزيني كيف لي قبلك وتجيني راكع بين رجليا تطلب في رضايا . شعل فيا ضربة وحدة خنقني وخبطتني مع حيط حسيت ضهري تكسر هزني حتى مبقيتش نحس بالارض تحتي وليت نضرب في يدو النفس تقطع فيا عينيا خرجوا قالي بنت ال#&&# صبري فض معاك راح تجيني انتي راكعة تطلبي في السماح اشفاي على هدرتي مليح . لحق علينا مسلم وريمة على هديك اللقطة جا عندو مسلم يجري قالوا اطلقها وشبيك هبلت راح تقتلها اطلقها . طلقني على آخر روح هادي ثاني مرة يخنقني فيها . طحت على ركابيا نسعل روحي حسيتها راح تخرج جاتني ريمة باه تطمن عليا كي راحت عليا شوي فتحت عينيا لقيت روحي راكعة على ركابيا قدام رجليه طلعت راسي بالعقل لقيتوا يشوف معايا بحقد . مسح على شواربو بصبعوا وتبسم قالي راح تخلصيها غالية اشفاي عليها . نكذب كون نقول مخفتش على روحي منو يبان يقدر يدير كلش من خزرتوا يعني في دار مليانة غاشي خنقني قريب ما قتلني كون يحكمني وحدي منعرف وش يدير . وقفتني ريمة قاتلي راكي مليحة قتلها ايه . قدم مسلم بقا يشوف في ليطراس قالي وش درتيلوا حتى عملك هكدا . شفت معاه قتلوا وحدو انا كنت في توالات خرجت لقيتوا في وجهي . خزر معايا قالي باينة على نفس الموضوع تاع المرة لي فاتت قتلوا ايه. شاف مع ريمة قالها متقولي لحتى واحد وش شفتي صحا خويا قاتلوا ايه علابالي كون متهني . قالها طلعيها معاك للشمبرة تاعك اعطيها تغطي رقبتها من ليطراس .
