مع رجعت لبلاصتي رقدت وغطيت راسي لوجاع محبش يحبس يديا عادو يرجفوا عاودت شربت حبة ووليت كيما كنت حتى وزل عليا شوي وغفيت من فطنت فتحت عينيا شفتوا قاعد مقابلني غمضت عينيا بالخف قلبي رفرف شحال راني متوحشاته شحال راني متمنية نعنقو ونشكيلو الشي لي صرالي ،نشكيلو شحال راني موجوعة ملڨري معنديش الجرئة حتى نشوف في وجهو بعد الحالة لي وصلتلها تفكرت كيفاش كان يسقسي في الطبيبة على حالتي واسكو كاين اغتصاب ولالا وش من وجه راح نقابلو بيه على الأقل الباقي معلابلهمش بالتفصيل وش صرالي مش كيفو هو علابالو الطبيبة قالتلو كلشي . قالي راح تبقاي هكدا علابالي بيك نايضة . غصة لصقت في حلقي تخنقت من البكا بلى صوت غير الدموع يهبطو ، مرجعتلوا حتى كلمة . وقف راح للتاقة شعل ڨارو ، قالي شكون هو تعرفيه جوليا قولي ، تعرفيه ياك . بقيت كيما راني هدا لي كنت خايفة منو وش راح نجاوبوا مفقتش حتى كيفاش جا جبدني من دراعي جابني قاعدة قالي راني نهدر معاك قولي تعرفيه ، دوك تحكيلي كلش وين داك ووش دارلك وكيفاش داك نسحق تحكيلي كلشي . طاحت عيني على عينيه حمورة لي ساغن وجهو كحال يبان مكرز تالمو مقلق حتى سنين عادو يديرو في صوت كي راص عليهم من الغش. خلخلني من دراعي قالي انطقي اهدري شكون هو . نطقت بسيف قتلوا معلاباليش منعرفوش منيش متفكرة . قالي كيفاش هادي مراكيش متفكرة كيفاش داير اوصفهولي وانا نجبدو من تحت لرض صحا قوليلي وين داك وين كان حاكمك . قتلوا منعرف معلاباليش ما شفتش . كان يهدر ومكرز يرجف من تقلاق تالمو خفت منو بينتها ديراكت بلي راني نخبي عليه . حكمني على دراعيا في زوج ويعيط قالي راكي تخبي جوليا راكي تخبي وتكدبي علابالي بلي علابالك شكون غير قولي راني نقتلك متزيديش عليا راكي متعرفيش هبالي كيفاش داير غير قولي وهنيني وهني روحك . وانا حكمت غير كلمة وحدة حتى باه نخترع كاش كدبة مقدرتش من الخلعة قتلوا معلاباليش منعرفوش . كل ما يسقسي نقولوا نفس الهدرة ويهيج عليا شفتوا عاد كي مهبول هكاك يهز ويخبط هدوك الكراسة جابهم فتات الزجاج تاع التاقة كيف كيف من بعد ولى ليا انا ضربة فيا وضربة في المراية ضربة فيا وضربة في الخزانة ، ويعيط قالي قولي بلي راه صاحبك وخدعك وتخبي عليه خايفة لا نلقاه قولي راكي خايفة عليه . دخلوا يتجاروا لبنات كي شافوه هكاك وحدة ما حبت تقدم ، علابالهم بيه مش في حوالوا حتى طلع مسلم بعدوا عليا هداك مكبش قالي يا تقولي الصح يا والله نقتلك . انا غير نشوف مقدرتش حتى ندافع على روحي مشوكية غير نشوف مكنتش نتوقع بلي راح يديرلي هكا على ذنب معندي حتى دخل فيه عندو الحق عليلو كي قالي كون نفضحك كل راح يصدقوني لمزية مقلتش بلي هو لي خطفني سينو راح يصدقوه هو .جبدو مسلم عليا يعيط عليه انت هبلت سيبو تقطعولك الخيوط #### تضرب الطفلة وهيا مريضة انت مريض في مخك راك زاطل ولا وشبيه ### قول . مرت خالي جات ليا معنقتني وتدعي عليه قاتلوا تحميتو في الطفلة انت والبراني وش خليتو فيها حبيتوها تموت قول اصيل هادي هيا الامانة هكا ديرلها . بقا يشوف معايا كشغل مراهش في عقلو مسح على وجهو وقال لمسلم اطلقني خلاص بيسك كان حاكمو قالوا مسلم والله ماني طالقك قالوا خلاص مسلم قتلك اطلقني راني مكالمي خلاص . بعد يديه عليه قالوا اخرج اصيل الطفلة مريضة مش ناقصها هبالك تفكر وش قاتلك ريان قبيل . منعرف كيفاش سمعلوا وخرج ديراكت.
