خالي كي عاد رايح قال لماما غدوة ندي لبنات يتعرفوا على العايلة وعلى خوالهم وولاد خوالهم وراح نحكمهم عندي في الدار حتى تبراي ويفرج ربي ، قاتلوا ماما وزعما يقبلوهم منيش حابة بناتي يسمعوا كلمة مش مليحة ادا راح يجرحوهم بكلامهم ومايعاملهمش مليح غير مكانلاه يتعرفوا عليهم . قالها خالي هدرتي انا هي لي تمشي من ليوم بناتك هم بناتي وراح نعيشهم في داري كيف بناتي وديجا حتى هم عندهم الحق في ورث جدهم وجدتهم. قاتلوا ماما لعمال على ربي . شاف معايا وتبسم قالي بنتي تقدري توصليني الطونوبيل قتلوا ايه معليش . خرجت من الشمبرة وانا نسوق في الكرسي المتحرك تاعوا لقيت ولادوا في زوج قاعدين يستناو فيه .شاف فيهم قالهم روحوا على رواحكم دوك تهبطني بنتي والشوفار يستنى فيا . هبطتوا وهو يسقسي فيا على قرايتي وش من تخصص نقرى ووين نقرى . كي خرجنا برة لقينا طونوبيل بالشوفار تستنى فيه . حكملي يدي قالي من اليوم انتي بنتي حتى يدي ربي امانتوا انا معاك ظالمة ولا مظلومة ورجع همي في هاد الدنيا اني نحي هاد النظرة لي راني نشوف فيها في عينيك . نكذب كون نقول بلي ماثأثرتش بكلاموا اول مرة نحس بأهتمام من النوع هدا . قتلوا ربي يخليك .قالي غدوة راني نجي عندكم غدوة الصباح واذا مقدرتش نجي راح نبعث اصيل يجي يوصلكم للدار باه تتعرفوا على العايلة ان شاء الله .قتلوا ان شاء الله . عاودت رجعت عند ماما لقيت اصيل مزال واقف وحدوا . غير جيت ندخل حكمني على دراعي قالي شوفي هنا غدوة تقولي لبابا بلي مش حابة تعيشي معانا وحابة تبدلي الولاية وتروحي من هنا . قتلوا لا منقولش انت معندك حتى دخل فيا . قالي يا تسمعي كلامي وتروحي من هنا يا أقسم بالله نكرهلك معيشتك فهمتي راكي صغيرة مراكيش قدي . قتلوا صحيت راك عارف روحك بلي ششارف مالا علاه راك جايبها عڨابي روح أخطيني .قالي بنت لحرام ليام بيناتنا وتشوفي بعينيك الشارف وش يدير فيك. . بقيت نشوف معاه ودموع في عيني حابة نفهم علاه راه يحڨر فيا غير انا ياك حتى اسمهان اختي علاه جامي هدر معاها . قتلوا نحي يدك عليا . طلق يدي وهو يشوف مع عينيا دخلت عند ماما شافتني قاتلي وشبيكي .قتلها ما بيا والو قاتلي ملا علاه حالتك هكدا . عيطت عليها قتلها تبقاي تسقسي قتلك ما بيا والو . عاودت خرجت دخلت للتوالات بكيت فرغت قلبي وروحت للدار في الطريق لقيت عليلوا قالي جوليا راني مزلت في كلمتي اقبلي برك ونجي نخطبك علابالك بيا نحبك .قتلوا لا انا مانقبلش بواحد كيفك أصلا من اليوم متزيدش تشوف وجهي هنا يعني غير انساني اوكي . قالي شوفي يا تقبلي بيا يا نفضحك تصاويرك راهم عندي . ضحكت قتلوا افضح على روحك الناس كل علابالها بيا بلي أنا هكدا . قالي اشفاي عليها مليح راح تندمي .قتلوا دز معاهم لي تقدر ديرو بقالي غير نخاف منك انت عليلوا ولد الڨزانة .دخلت للدار فارغة غير انا وحدي قعدت في الصالة وغمضت عينيا نتفكر في هدرة اصيل ونخمم في حل علابالي مش راح يخليني في حالي حتى ندير وش حاب هو . قررت حاجة لي راح تريحني وتريح الناس كامل . جا الصباح وجدت روحي ورجعت عند ماما للسبيطار لقيت اسمهان واقفة مع اصيل وتهدر معاه . بقيت نشوف فيهم كيفاش يهدر معاها نورمال ويتبسم عادي . دخلت ديراكت عند ماما بلا ما نهدر معاهم .شوي وطلت عليا اسمهان قاتلي هيا باه نروحوا نتعرفوا على العايلة . هزيت صاكي وخرجنا هو يمشي القدام وحنا وراه وصلنا للطنوبيل تاعوا ركبنا في زوج من لور وهو يسوق ، مرة على مرة نطلع عيني في مراية نلقاه يشوف فيا علابالي راه يتحلف فيا باينة من عينيه . نطقت اسمهان قاتلوا عايلتنا كبيرة ولا صغيرة قالها كبيرة . قاتلوا ان شاء الله يتقبلونا نورمال . قالها متخافيش انتي بتقبلوك نورمال عرفتوا يمعني عليا انا بلي قادر ميتقبلونيش بيناتهم ولا أصلا ماراهمش قابليني بيناتهم .بقيت ساكتة ونتفرج من الكارو حتى دخلنا لكرتي يبان غير تاع المرفهين غير لي فيلا والطنوبيلات المركة ودنيا نقية فرق شاسع بين كرتينا لي نسكن فيه وبين هدا بقا ماشي حتى حبس قدام دار مش دار تقدروا نقولوا قصر قدامها جنينة صغيرة . قالنا وصلنا اهبطوا هبطنا انا واسمهان دخل هو وحنا دخلنا وراه لقينا خالي الكبير في الباب بالكرسي تاعوا غير شافنا فتح يديه فرحان قالنا اهلا اهلا مرحبا بيكم .سلمنا عليه قالنا هيا ادخلوا مرحبا بيكم من ليوم هادي داركم . دخلنا كلوار كبير ومنو ديراكت تقابلك صالة دخلنا ، لقيناها مليانة غاشي هادو كل ساكنين هنا ولا كيفاه . بقينا انا واسمهان نشوفوا معاهم وهم يشوفوا معانا وجوه اول مرة نشوفهم في حياتي منهم لي يشنف ومنهم لي متبسم ومنهم لي مش هاماتوا لحكاية من اصلوا وقاعد فوق قلبوا . قعدنا مقابلينهم قالهم خالي هادوا هما اسمهان وجوليا بنات فطيمة . وهم غير يكيلوا فينا بعينيهم حتى نطق راجل يعود في ربعينات قالنا مرحبا بيكم بيناتنا . نطق خالي لكبير قالنا هادا خالكم خليل وهو صغير. متزوج وعندو ثلاث ولاد زوج بنات وطفل (طفل عمرو 23سنة واسمو وسيم ولبنات وحدة 19 واسمها أسماء وصغيرة عمرها 16 اسمها ريمة )ومن بعد ورالنا الراجل لي قاعد بجنبو قالنا وهدا خالكم الثاني واسموا حميد متزوج وعندو زوج دكورا وطفلة (ولدو الكبير اسمو مروان عمرو 28 والثاني اسمو عبد القاسم عمرو 25 والطفلة عشرين سنة اسمها نجمة ). وقالنا هدا الخالكم الثالث اسمو سمير حتى هو متزوج وعندو زوج ولاد طفلة وطفل (طفل اسمو عصام عمرو 30وطفلة اسمها قمرة عمرها 24) . هو يهدر وانا غير نشوف ظهرو قبيلة عايشة في دار وحدة كيفاش ميغلطوش في بعضاهم سيرتو البنات يشبهو لبعضهم تقول عليهم ڨاع خواتات عندهم نفس الملامح . قالنا وانا راكم تعرفوني خالكم الكبير واسمي وحيد وهادوا ولادي (اصيل هو الكبير عمرو 35وبعدوا ولدي مسلم عمرو 30 وبعدو بنتي صوفيا عمرها 25 وبعدها بنتي لينا نفس عمرك 19 ) . نطق خالي حميد قالوا راك تعرف فيهم علينا ان شاء الله معول تسكنهم هنا فوق ما أمهم جابتلنا العار بكري وخلات لي يسوا ولي ما يسواش يضحك علينا ومرغت بأسمنا الارض بعد ما جابت طفلة بالحرام راك جايب بيناتها يكملوا المسيرة تاعها . قطعلوا خالي وحيد الهدرة قالوا اعرف ما تخرج من فمك لي صرا بكري راح في بكري هادوا من ليوم بناتي لي يقيسهم يقيسني وعندهم
حق في هاد الدار كيفهم كيفكم لي يغلط فيهم بنص كلمة يلقاني انا في وجهوا .سكت بصح بقا يشوف معانا بشوفات تاع غل وحقد . انا نار وشعلت في قلبي وانا نسمع فيه يهدر هكدا على ماما مقدرتش نسكت . وقفت قلت لاسمهان هيا . قالي خالي وحيد وين رايحة .قتلوا رايحة لدارنا . قالي هادي داركم . قتلوا لا مش دارنا ومتشرفين بيك خالي دورت لاسمهان لي مزالت قاعدة قتلها هيا انتي اوقفي رانا رايحين . قالي خالي معندكم حتى روحا يماكم وصاتني عليكم حتى تخرج من السبيطار .قتلوا يكثر خيرك بصح رانا قادرين على شقانا متكسرش راسك بينا . سمعت صوت وحدة قالت بنت حرام عندها كرامة .وضحكت شفت مع لي هدرت مرا كبيرة قاعدة بحدا خالي حميد عرفتها مرتوا .عاودت خزرت مع اسمهان لقيتها مزالت قاعدة غير انا لي واقفة . قتلها هيا . قاتلي جوليا اقعدي دوك نروحوا قتلها لا منقعدش هيا نروحوا .ناضت مرا هي لي تبان كبيرة فيهم ڨاع من بعد عرفتها مرت خالي وحيد قاتلي ارواحي معايا بنتي .بقيت نشوف معاها قاتلي هيا راح نوريلك حاجة من بعد روحي على روحك .مشيت معاها طلعتني في دروج من بعد دخلت للشمبرة فتحت الخزانة بقات تفركت حتى جبدت صندوق فيه وراقي قاتلي شوفي واقرايهم .بديت نقرا فيهم لقيتهم بلي جدي كتب جزء من هاد الدار غير ليا انا واسمهان وسمانا بالاسم في الوصية تاعو بلى ورث آخر اراضي وحوانت حتى هم عطانا فيهم جزء .قاتلي يعني كي نقولوا بلي حتا هادي الدار دارك يعني تاع الصح دارك علاه ى حتى تروحي تسكني في بلاصة اخرى وتخلي رزقك . سكتت قاتلي ادا راح تبعي هدرتة الناس وتتأثري بيها راح تتعبي بزاف في حياتك وانتي مزالك صغيرة قتلها لا اما انا مش حابة نبقى هنا أصلا دوك تخرج ماما من السبيطار ونرجعو لدارنا . قاتلي منا لهداك الوقت ربي يحلها بصح متكسريش كلمة خالك هو حابكم تبقاو عندو خايف عليكم. حطت يدها على خدي قاتلي على وجهي انا وخالك . درتلها براسي ايه قاتلي صحيتي بنتي .
