لبست قشي وهبطت نفطر ليوم نضت بكري باه نروح نقرى بعد ما جبتها شهر كامل وانا في الدار . لقيتهم كامل قاعدين يفطرو ساميت مسلم وقعدت شربت حليبي بالشيكولة والكرواسون كملت وقعدت نستنى في وسيم باه يوصلني معاه كي كمل خرجنا وركبنا . صونا تلفوني عرفتوا شكون عادتوا من لي راح كل يوم يعيط لوقت هدا قبل ما يبدا الخدمة هزيت عليه ، كان عيطلي بالاكام . قالي صباح الخير قتلوا صباح النور . قالي وين راكي قتلوا راني مع وسيم في الطونوبيل راح يوصلني للجامعة . قالي فوتهولي نهدر معاه . عطيتو التلفون بقا يوصي فيا عليا قالوا مدام راهي تفوت في الامتحانات انت لي تديها وترجعها متخليهاش تروح وحدها . قالوا كون متهني راهي معايا . رجعلي التلفون قالي فطرتي . قتلوا ايه فطرت ، وقتاه ترجع راه فات شهر سيبو ياك قلت شهر برك . قالي مزال مش باين وقتاه يطلقونا بالاك نبقى ثلاث شهر . قتلوا كيفاش هادي ثلاثة ياك قلت شهر برك بزااف . ضحك قالي واش زعما توحشتيني. قتلوا والله لا توحشتك صح . سمعت صوت مرا تهدر معاه منعرف وش قاعدة تقولوا. قتلوا مع شكون راك تهدر . قالي راه وقت الخدمة دوك راهم يعيطولي من بعد ونعاودلك . كوبا رجعت التلفون للساك شفت مع وسيم لقيتوا يخزر معايا ومضيق عينيه . قتلوا وشبيك تشوف معايا هكدا . قالي وقيلا عدنا عرس الصيف هدا . لعبتها نية في الهبال قتلوا عرس شكون . ضحك قالي عرسي انا وياك راكي تتبهلي عليا جوليا ، وش كاين بيناتكم . دورت وجهي الهدرة تلفتلي قتلوا شكون تقصد قالي ديري روحك نية هكاك راني فايقلكم . وصلني هبطت قالي كي تكملي عيطيلي نرجعك . دخلت فوتت الامتحان ملڨري ما راني فاهمة فيها والوا المهم كتبت اسمي خرجت من الامتحان قعدت في فوايي كليت بيتزا وبقيت نستنى ما بين ما كمل وسيم باه يجي يروحني .شوي وعيطلي قالي راني نستنى فيك في باركينغ . هبطت نمشي كانت بعيدة شوي على الفوايي . انا نمشي نحس في طونوبيل تبع فيا دورت شفتها طونوبيل كحلة فيمي ، خفت شوي من بعد قلت بالاك راهي تمشي برك زربت في المشية حتى وصلت عند وسيم كي درت ملقيتش الطنوبيل ورايا تنهدت ركبتني الخلعة منها . ركبت معاه وصلني للدار وهو رجع للجامعة . دخلت لقيت لبنات ونسا خوالي مجمعين قدام تيلي تاع الصالة يتفرجوا قعدت معاهم شوي من بعد طلعت لشمبرتي بدلت حوايجي وقعدت فوق سرير هزيت تلفون عيطتلوا ، كوبا عليا عرفتوا يكون يخدم باين بقيت نستنى شوي وعاودلي عدلت شعري وهزيت قالي رجعتي للدار قتلوا ايه رجعت راك خدام قالي لا راني كملت دوك وش درتي فيها ليوم قتلوا والوا كتبت غير اسمي برك علابالك ما راني فاهمة فيها والوا باينة بلي راح نفوت راتراباج . قالي في راتراباج زيري روحك باه تنجحي خير من تعاودي عام كامل قتلوا ايه ان شاء الله حقا شكون لمرا لي كانت تهدر معاك قبيل قالي زميلة تخدم معايا. قتلوا اممم يخدمو معاكم النسا قالي باينة كيما اي خدمة فيها رجال ونسا . قتلوا مالا حتى انا ندخل نخدم معاك . ضحك قالي منعرف شكون لي راح يقبلك بالاطاي لي عندك هادي مونش بالي . عدلت التلفون بالمخدة ووقفت قتلوا شوف لاطاي هادي يقولوا عليها الناس مونش بالي يا حنوني هادي لبنات راح يموتو باه يخدمو طاي كيفها . جبد قارو قالي اممم حنونك . ضحكت ورجعت قعدت قتلوا حكمتي غير الكلمة هادي من هدرتي كامل . قالي كي نجي و نتفاهمو عليها . بقينا نهدرو قريب زوج سوايع حتى نعست باه كوبا . لغدوة كيفكيف صبحت بكري باه نروح نقرى وصلني وسيم كيف العادة فوتت ليه ليه وخرجت هبطت للفوايي كليت بيتزا كملت ، قلت نروح نمشي وحدة وحدة نستنى وسيم في الباركينق . هبطت نمشي كانت الوحدة تاع العشية حسيت بنفس الطونوبيل تمشي ورايا درت شفتها نفسها تاع لبارح زربت في المشية ودرت في الدورة جبدت التلفون عيطت لوسيم هز عليا قتلوا وسيم وينك قالي راني جاي قريب نوصل . قتلوا وسيم ازرب تعيش كاين طونوبيل من قبيل وهيا تبع فيا . قالي وشنو وش من طونوبيل وين راكي انتي اقعدي في بلاصتك حتى نجي . قتلوا ازرب تعيش . قالي متخافيش زوج دقايق نكون عندك صاي راني في الرونبوان . كوبيت بقيت واقفة في بلاصتي نستنى نحسب في الوقت بالثواني حتى حسيت بواحد حط حاجة على خشمي وفمي غمني بيها ، ماجيت نتحرك فشلت دخت .
