في الرياض وتحديداً قصر راشد
فتح الاصنصير وطلع يدخل صالة الطعام ناظر الطاوله وعليها انواع المعجنات ابتسم وتعدلت صمود ( الخادمه ) مسكت كفوفها وقالت : صباح الخير
هز راسه يجلس على الكرسي : صباح النور وين العنود ماصحت ؟
صمود : لسا ماصحيت بروح اصحيها
هز راسه وتقدمت صمود تصب شاهي في كاس وتعطيه وقالت : هني وعافيه
راشد : الله يعافيك .... ابتسمت تطلع تدخل الاصنصير وتضغط زر جناح العنود وبعد ثواني فتح وتقدمت
دقت الباب وانتظرت شوي ورجعت تدق ماوصلها رد وفتحت الباب تتقدم ناحية السرير وتنادي : العنود العنود
فتحت عيونها بانزعاج وقالت : وشو
تقدمت صمود تفتح ستاير الغرفه من كانت ضلام : جدك ينتظرك عالفطور يالله قومي
جلست العنود ولفت تاخذ جوالها تشوف الساعه وهزت راسها : زين اطلعي
هزت راسها صمود تطلع وتسكر الباب ووقفت العنود وهي تتمغط ولبست شبشبها وتقدمت تدخل دورة المياه وتاخذ شور سريع
بعد دقايق طلعت تلبس وبعد ماخلصت ناظرت شكلها في المرايه وابتسمت ترمي لنفسها بوسه وتطلع
............................................
* الديره *
في بيت عقاب والي يكون البيت الكبير في الديره تجمعو عياله واحفاده عنده يفطرون مع بعض وطبعاً الرجال والعيال جهة والحريم والبنات في جهة
وكانت ذي من عادات بيت عقاب والي يكون الكل مجتمع وقت فطور و غدا وعشاء في بيته ومن بعدها يشوفون اشغالهم
نزلو الفطور وسمو بالله وبدو يفطرون وكان فطورهم المعتاد ( قرص و حليب )
وبعد دقايق من الهدواء عقاب لف على حاكم : متى بتودي نياقك للمزاين ؟
حاكم : المزاين بعد اسبوعين بشوف بكره او بعده يمكن اوديهم
عقاب : الله الله بالمركز الي يبيض الوجهة
حاكم : والله مدري يبه شكل ه المره ماني باخذ المركز الزين
لفو عليه وكمل يقول : بيدخل معي منافس والصدق ان انياقه احسن بزود ولاا معروف بينهم وقد دخل المزاين قطعت مرات بس السبع سنين الي راحت مادخل وبيرجع هالمره
عقاب : اهم شي علفت نياقك ؟
حاكم هز راسه بايه وقال عقاب : اجل اترك الباقي ماتدري يمكن نياقه هريانه وانت نياقك سمان وتاخذ المركز
حاكم : الله يرزقنا
الكل : امين
وقف بعد مانفض يده وقال : الحمدالله تبون شي ؟
حاكم : رح وانا ابوك يم النياق اعرف احوالها واحلبها
ذيب وهو يمسح يده : ابشر يبه .... ورفع يده يسلم قبل يطلع : مع السلامه
الكل : مع السلامه - بحفظ الله - الله يستر عليك
طلع ولف عقاب على سطام وسعيد وقال : وانتم وين بتروحون ؟
سطام وسعيد ناظرو بعض وقال سطام : انا بودي مهره اهلها بتزورهم وبروح اشوف شغلي
ورد سعيد : وانا زيه
عقاب بغضب : الحين انتم ماتستحون وتتركون هالشغل وتدخلون مع ابوكم وتعاونوه في نياقه ولا شفتو اصغركم معه قلتو خلاص نسلمه وناخذ راحتنا
سعيد : يجدي انا مالي في الابل ولا ادانيها وذيب يحبها ودام ماهو متوظف يجي ويساعد ابونا
سطام : صادز وحنا ماتركنا ابونا معه حتى في السكن
حاكم : خلهم عندي الي اطيب منهم بس روحو شوفو اشغالكم وامسكو فلوسكم لاتطيرونها في الي ماله داعي
سطام وسعيد ناظرو بعض بصدمه وقالو بصوت واحد : ابشر يبه
عقاب لف على نياف وصالح وسيف وصقر وقال : وانتم منتو رايحين تفتحون الدكاكين ؟
لفو كلهم وهزو روسهم وقامو يستئذنون وطلعو
شيخه تنادي : ي صالح
صالح : لبيه يمه
شيخه : اسمع سلمى بتعلمك الاغراض المطلوبه وجبها
صالح : ابشري يمه .... وتقدمت سلمى تعلمه الاغراض
وطلع عقاب مع قايد والباقين ماعدا راكان
رزان شافت مابقي من العيال غير ولدها راكان قالت : وتعال انت اعلمك المقاضي
شيخه : وراء ماعطيتيها صالح يجيبها مع طريقه
رزان : تبينها تختلط مع اغراضتسن وتاكلن نصها لا يروحي ماهي انا الي ينلعب علي
شادن كانت وراء امها وسمعت الكلام وتقدمت وهي تقول : هي انتي حدتس عاد امي ماينرفع الصوت عليها
رزان ضحكت بسخريه ومشت بعد ماقالت : روحي بس انتي وامتس
شيخه ل شادن : وليه تطولين لسانتس عليها ماني موجوده واعرف ارد
شادن وهي تاخذ الصحون من امها : شسوي يمه قهرتني ه السعلوه
شيخه مشت وهي تستغفر وشادن اخذت صحون الفطور ودخلت تغسلها مع سلمى
ومهره واريج طلعو مع سطام و سعيد
............................................
نزلت من الاصنصير وتقدمت لصالة الطعام وقالت بفرحه : صباح الخير ع الحلوين
راشد : ياهلا صباح النور والورد والياسمين
ابتسمت تبوس راسه و تجلس جنبه ع الطاوله وتفطر وقالت بابتسامه : واضح اني تأخرت
راشد : مستعجل ولا انتظرتك لين تجين
العنود : وش عندك مشغول ؟
راشد: اي والله بودي الابل للمزاين عشان المنافسه
العنود : اروح معك ؟
راشد هز راسه ب لا : مايحتاج بس بوديها عشان الكشف وش تخطيطك اليوم ؟
العنود : بروح النادي وبعده جمعة عند خالتي عذبه
راشد : تحتاجين السواق ؟
العنود هزت راسها ب لا وقالت : بروح بسيارتي
راشد وقف وتقدم يبوس راسها وقال : انتبهي ل نفسك
العنود بابتسامه وهي تفطر : من عيوني
وقف من تذكر ولف عليها وقال : وش صار عن القعود الي ذاك اليوم ؟
العنود : كلمت راعيه وقال وصل سومه ٢٥ مليون وقلت ايام واكلمك وقفلت
راشد : شفتيه انتي ؟
هزت راسها ب لا وقالت : لا بروح اشوفه بعد ماطلع من عند خالتي
راشد : شوفيه وان كانه زين اشتريه
العنود : ابشر
ابتسم ولف يطلع جناحه
والعنود كملت فطورها لين خلصت واخذت جوالها واتصلت على رقم راعي القعود
تكت تنتظر الرد وبعد ثواني رد وقالت : الو السلام عليكم
حاكم : هلا وعليكم السلام ورحمة الله وبركاته
العنود : كلمتك امس عن قعود للبيع
حاكم : اي نعم موجود القعود الحين
العنود : طيب ماعليك امر ممكن ترسل الموقع بجي اشوفه العصر
حاكم : حياتس الله
العنود : الله يبقيك .... سكرت وقامت تتجه لجناحها وتلبس وتطلع
حاكم لف على ذيب الي وقف عنده وفي يده طاسه كبيره فيها حليب وقال : بترجع بعد ماتوديه
ذيب : والله ماني متأكد. ليه تبي شي ؟
حاكم : القعود العصر بيجون يشوفونه ناس ويمكن ينباع لهم
ذيب : زين اجل بجي قبل العصر بترجع معي ؟
حاكم : ايييه مير خذ الجوال وعطهم موقعنا
هز راسه ذيب وحط الطاسه في الصندوق بعد ماثبتها وغطاها باحكام وركب وابوه جنبه وقال وهو عاقد حواجبه : مافيه ابراج هنا بشوف اذا حصلت ارسلته
حاكم : اهم شي لاتنساه
هز راسه ذيب ومشو راجعين للديره
الي تبعد عنهم ١ كم
............................................
نياف لف على صقر وقال : بروح عند صالح وسيف تبي اجيب لك شاهي
صقر : لا يرحم امك شاهي مع هالحر
نياف ضحك وطلع يمشي للقهوه دخل وشاف ابوه وجده جالسين ويتقهوون تقدم عند صالح و سيف والي كانو مسؤولين عن القهوه دخل بينهم وقال : وش عندهم مجتمعين ؟
سيف : والله علمي علمك
صالح : ماصرت استغرب هذي قعدتهم كل يوم
نياف ناظره بذهول ورجع بيروح لهم ووقفه
صالح : لاتجرب جربت قبلك وانطردت
نياف : كنت بقعد معهم بس هونت
سيف : من فالمحل ؟
نياف : صقر عطني شاهي وماء بارد
سيف هز راسه وتقدم يعطيه واخذه نياف وطلع
دخل المحل ورفع صوته يقول : ارحبببببو
لفو هادي وغيث بابتسامه وردو : البقى
نياف سلم عليهم وبعد السلام والسؤال عن الحال قال نياف : وش هالمفاجئه ؟
ابتسمو وقال غيث : وين الباقين ؟
نياف : كلن في شغله عمتي فالبيت ؟
هادي : اي والله نزلناها وجينا مير اسمعو بنروح نسلم على الباقين ونرجع للبيت نلقاكم هناك
نياف وهو يناظرهم : تم. كم باقي للصلاه ؟
صقر رفع ساعت معصمه يشوفها : ربع ساعه
نياف هز راسه واستئذنو هادي وغيث وطلعو
............................................
قبل دقايق في بيت " عقاب "
طق الباب ودخلو ساره وترف وعاليه وراها وهم يقولون : ياهل البيت - فيه احد
الجده سلمى : اي ياهلا والله تعالن ادخلن مافيه احد
تقدمو ترف وعاليه يركضون يبوسون راس جدتهم ويدها وبعدو وسلمت ساره على امها وقالت : وين الناس البيت هادي
