ناظر العيال محاوطينه يمين ويسار ويسولفون ويضحكون وتنهد يبتسم وهو من تركهم ابوهم وراح ماطلع من البيت وماقابل احد واذا طلع مايسمع غير حذف كلام عليه وعلى اخته وامه تنهد يناظر رجوله وهو يتمنى لو يقدر يمشي او يحركها بس
رفع صوته صالح من قربو عند الدكه ( جلسه مزينه بالسعف وتكون بعيده شوي عن البيوت يتجمعون فيها عيال الحاره بعد الظهر او فالليل وفيها جميع الفعاليات
اختاروها بعيد عن البيوت عشان مايزعجون اهل الحاره )
رفع صوته سيف من شاف عيال الحاره في الدكه : جاكم ضيف يالربع
دخلو بالكرسي في الدكه ووقفو العيال يسلمون على ضاحي الي يرد عليهم بابتسامه
وجلسو العيال حولينه
وقال هادي بلحن وهو يصفق : راضي وين الشاهي يا راضي
ضحك راضي الي جالس وقدامه الدافور وقال : دقايق بس وينزل لك احسن شاهي
جلال وهو يتكي : العلوم
غيث بضحكه : علوم ولا رياضيات
ضحكو العيال وتقدم سيف يوزع بيالات الشاهي ومد بياله على ضاحي الي يناظرهم وقال : مانبي رسميات خلاص انت واحد منا
ضاحي ابتسم واخذ البياله
لفو على الي دخل الجلسه وقامو سلمون عليه وبعد ماسلمو تقدم ضاحي وقال : الله يعز مقامك لاكن ماني قادر اقوم اسلم معهم
تقدم ظافر يسلم على ضاحي وقال بابتسامه: معذور معذور
وبعد السلام جلس ظافر وقال : اهه يعيال ياشينها
ابتسمو العيال وقال ذيب : عاد جلال يسئل تو عطنا
ظافر تكى وقال باندفاع : امنه الي ربي ماحط فيها ذرت امان
ضحكو العيال وقال صالح : كفختك
ظافر بعصبيه : تخسى
طاحو يضحكون العيال وقال هادي وهو يضحك : بس اسلم وش مسويه
ظافر : جننتني ياعيال جايتني وتقول اخطبني
فتحو عيونهم بذهول وقال ظافر : قلت مهو على كيفتس وانا مادانيتس وتبيني اخطبتس .... سكت يناظر العيال وقال ذيب وهو يكح اثر الضحك : كمل تكفى
ظافر وهو يقلدها : افهم ياظافر يولد جمعه انا ادانيك ومرقد الليل افكر فيك
ضحكو العيال وظافر معهم وقال : يعيال دورو لي صرفه تكفون
صالح وهو يمسح دموعه : عندي الحل
لف عليه ظافر بتركيز وقال صالح : قل خليتس مره سنعه ونظيفه ولاتلقفين على الناس وابشري
ظافر ضربه برجله وقال : مادانيها افهم لو تصير احسن حريم الديره ماخطبتها
طاحو يضحكون العيال وبعد دقايق سكتو وقال غيث وهو يضحك : I can not afford it ( ماقدر اتحمل اكثر )
لف ظافر عليه من سمعه ولفو عليه العيال وقال ظافر وهو يناظر غيث : ياشيب عيني صدز
ضحكو العيال مره ثانيه وقال ظافر : بتلقون لي حل ولا امشي
راكان وهو ياخذ نفس : عندي حل
لفو عليه العيال وقال ظافر ويده على فخذه متكي : اسلم
راكان وقف يتبعد شوي وقال : اخطبها وحط شرط ماعاد تطلع ولا تقابل احد الا اذا تسنعت
ظافر ناظره بعصبيه وقال : انت تفهم ولا ماتفهم
هادي : صح كلامه ترا
ذيب بضحكه : واذا وافقت على شرطه واذا رجع للبيت دبغت فيه
ضحكو العيال وقال ظافر : هذي المشكله
صقر : صدق الي قال ابو طبيع مايجوز عن طبعه
ضاحي : اسمع عندي حل وانت براحتك
لفو عليه وقال ظافر بقل حيله : اسلم
ضاحي : اذا رجعت تنق عليك هددها انك بتعلم رجال الديره بكلامها هذا وانهم بيطردونها وبيطردون اخوها معها
ظافر تكى يفكر في كلامه ورفع راسه يناظرهم وقال : واذا ماسمعت الكلام
نياف : مارح ترجع وبتخاف تقابلك حتى
ذيب : صح وهي اصلن تخاف من جدي والروس الكبار
ظافر ناظرهم شوي ووقف بفرح يبوس راس ضاحي وقال : هذا العقل الصاحي مهي عقولكم
وطلع يركض يدور امنه
وقال ضاحي بابتسامه : الله يعينه
راضي : اي والله نشبت له نشبه
ريان : هي ماخلت الديره بكبرها ترتاح منها تبيها تخلي ظافر يرتاح
جلال ضحك وقال : اثريه جايب راسها اجل ماترقد الليل تفكر فيه
نياف بضحكه : والله توقعاتي ماترقد دايم والنوم ماطب عينها
ضحكو وقال ضاحي وهو منحني ينزل كاسته : واضح انها خارشتكم
غيث بضحكه : ابشرك ماسلمنا منها
صالح : وكل ماعندها تكفيخ
ضاحي رفع كتوفه : والله انا ماقد قابلتها بس من كلام اختي وكلامكم عرفتها
صقر : احمد ربك
ضاحي ابتسم وقال سيف بعد ثواني : الله يستر هذا راح يدورها ويهددها ماندري لو كفخته
راكان : ماتوقع دامها تدانيه ماهي مكفخته
وقف ذيب ولفو عليه وقال نياف : وين
ذيب وهو يلبس زبيريته : باخذ ابوي وبروح يم العزبه مواعدين ناس بيجون
صقر : طيب اسمع مر جدتي وخذ السطول الي عندها ودها العزبه يبيها العامل
هز راسه ذيب وطلع
وغيرو محور حديثهم وكملو سوالفهم
............................................
طلعت من بيت خالتها بعد ماودعتهم وطلعت وراها نجود ركبت سيارتها وركبت نجود وقالت : وين الوجهة ؟
العنود : لنياق حاكم
نجود : اووو فيها نياق اجل بتفلينها
العنود وهي تناظر جوالها : نفسك في شي ناخذه قبل نطلع
نجود ضحكت وقالت : فاهمتني
العنود بابتسامه وهي توقف جنب الكوفي : انزلي جيبي لي ولك
نجود هزت راسها ونزلت
ولفت العنود على جوالها الي يرن ورد وهو يقول : هلا
العنود استغربت الصوت وقالت : اهلن راعي القعود
ذيب انصدم من كان صوت بنت ورد : اي نعم
العنود : تمام ابي الموقع ماوصلني
ذيب ناظر الجوال وهو يعرف للجوال بس مايعرف يطلع موقعه وسكت يناظر الجوال
وقالت العنود : طيب تدلني للخط وامشي معك
ذيب : طيب
العنود : دقيقه بس وارد عليك
ذيب سكت يسمعها وحط الجوال سبيكر وهو جالس فوق الوانيت
حطت جوالها سبيكر ونزلته تثبته في المسكه في السياره وتطلع جوالها الثاني ترد على جدها وتحط الجوال على اذنها : هلا جدي
راشد : هلا ابوي رحتي للقعود
العنود : هذا انا رايحه بس دقيقه انتظر نونو تخلص وبمشي
راشد : زين اذا احتجتي شي كلميني
العنود : زين باي
قفلت وجلست دقايق تناظر الطريق والكوفي
ولفت على نجود الي ركبت وقالت : كان طولتي زياده
نجود : نودي مره زحمه داخل
العنود اخذت طلبها وقالت وهي تحرك :
ذيب الي كان منسدح فوق الوانيت والجوال قدامه ويسمع صوتها الناعم وهي تكلم جدها مايدري ليه ارتعش جسمه وجلس وهو ماسك الجوال من قالت : الوو معي ع الخط ؟
ورد ذيب بتوتر : اييه معتس
العنود : طيب اوصف لي الطريق
ذيب بدا يوصف لها الطريق وبعد ثواني قالت : اسمع وش اسمك عشان اقدر اناديك وما اضطر اقول ياهيه كأن مالك اسم
ذيب حس بتوتر من طلاقتها ف الكلام معه وهي ماتعرفه وهو مايعرفها وخايف وقال : ذيب اسمي ذيب
العنود سكتت تناظر الطريق وبعد دقايق طويله قالت : طيب ياذيب وصلت للموقع بس فيه حوشين بعيده عن بعض شوي اي واحد فيهم ؟
ذيب وقف فوق الوانيت يناظر وقال : فيه وانيت احمر وانا واقف فوقه
العنود لفت تدوره وقالت نجود : اتوقع ذا شوفي
لفت العنود وقالت : لفيت بالسياره جهتك
ذيب : اي اي .... نزل من الوانيت وقفل الجوال يدخل العزبه ينادي ابوه
وقفت السياره ونزلت وهي ماسكه مشروبها البارد ونزلت معها نجود وقالت من شافت حاكم وذيب طالعين : سلام عليكم
ناظروها وردو : وعليكم السلام
العنود : ماطول عليك بس ممكن اشوف القعود
حاكم : حياتس الله
مشت مع حاكم ونجود معها يدخلون الحوش ( والي هي العزبه وفيها اربع خيام كبار وبيت شعر والشبك الكبير ل ابل و عنده وايت مويه وباقي الحوش تراب وشوي زرع )
وذيب وقف يناظرهم وقال بهمس : اخس يحاكم وش جابك عند هذول
مشى وراهم وهو يشوف و يسمع ابوه يوريهم القعود ويتكلم عنه
تقدم يوقف جنب ابوه وقالت العنود : سليم
حاكم : اي نعم سليم ومافيه اي اضرارر
العنود : كم وصل السوم
حاكم : ٢٥ مليون
العنود قربت عند القعود تتفحصه وقالت بعد تفكير : توكلنا على الله
وقف العامل جنب ذيب من راحو وقال ل ذيب : من هاذا نفر ؟
لف عليه ذيب وقال : وانت وش يخصك فيهم اذلف لشغلك واخذ السطول الي ف الحوض
العامل هز راسه ورجع لشغله ومشى ذيب عند ابوه وقال : هاه شرو
حاكم بفرح وهو ماسك الشيك : شروو
ابتسم ذيب وتقدم يشوف الشيك والمبلغ وناظرهم من ركبو سيارتهم قربت عندهم وفتحت الدريشه وقالت : معليش بس من يوصل القعود ؟
حاكم لف على ذيب وقال : الحين بيركبونه ويجيبه لكم
لف ذيب بصدمه على ابوه وعطاه نظره حاكم وفز وبعد ماركبو القعود في الدنه ( الشاحنه حقت الابل ) ركب ذيب وطلع من العزبه عند العنود الي جالسه بسيارتها ضرب بوري ولفت عليه واشر بيده بمعنى امشي
هزت راسها ومشت وذيب والقعود وراها
اتصلت على جدها وقالت من رد : ابشر بالقعود ياراشد
راشد بفرح : كفو والله جبتوه ؟
العنود وهي تناظر مرايتها الاماميه : اكيد هذا هو وراي
راشد : اجل نتقابل في المزرعه
العنود : تم
سكرت ومدت يدها ل المسجل تشغل اغاني يسمعونها لين يوصلون
في الدنه ( الشاحنه حقت الابل ) فاتح شباكه ويسوق وراها يسمع صوت الاغاني طالعه من سيارتها وناظر حالته وقال بهمس : هي تسمع اغاني وطربانه وانا المسجل الي عندي مهو ب موجود والمكيف مايبرد .... وبتنهيده : الله يسامحك يحاكم
............................................
رجع حاكم ودخل مجلس الرجال وسلم عليهم وتقدم يسلم على خلف ( رجال اخته ساره ) وبعد السلام والسؤال عن الحال قال عقاب وهو يناظر حاكم : ماشاءالله الوجه منور اليوم
حاكم بابتسامه: اي والله بعت لي قعود
ناظروه بفرح وقال قايد : ماشاءالله الله يزيدك من فضله
عقاب بابتسامه : وبكم بعته ؟
حاكم الي ماكن يحب يذكر المبالغ الي يستلمها قال وهو
ياخذ فنجانه من سيف : خير الله واجد والحمدالله
هز راسه عقاب وهو يناظره وقال خلف وعياله جنبه : وبما ان اليوم الاخبار زينه جيناكم بطلب
لفو عليه وقال عقاب : حياكم الله
خلف : الله يبقيك يعمي وانا طلبي عند حاكم وماودي بالرد
لفو عليه وقال حاكم : ان كاني قادراً عليه ابشر
خلف لف يناظر هادي الي متوتر وقال بعد مالف على حاكم : والله جايين نطلب يد بنتكم الكبيره لولدي هادي على سنة الله ورسوله
ناظرو بعض وقال عقاب : هذي الاخبار الزينه وابد ماينرد لكم طلب
حاكم ناظر ابوه وقال : لكن انا باخذ راي البنت وارد لكم
عقاب : انت وش رايك ؟
حاكم وهو يناظر هادي : والله هادي رجال ونعم وماينرد بس
قاطعه عقاب وقال بابتسامه لخلف : وراي البنت من راي ابوها وهادي ماهو غريب علينا وولد عمتها
هز راسه حاكم وهو يناظرهم بتوتر وابتسم خلف وقال : وحنا جاهزين بالمهر وبكل شي
عقاب : اذا انتم جاهزين ليه ماتكون الملكه بعد يومين
خلف ناظر هادي ورجع ناظره : ماله داعي نستعجل وحنا بنعزم معارفنا واهلنا ورا ماتصير بعد ثلاث اسابيع
حاكم هز راسه : ايه بعد ثلاث اسابيع ازين
عقاب ناظر حاكم وناظر خلف وهز راسه ب طيب وسكت
