فتح عيونه نياف يركض مع السلم
وعضت اصابعها ود من استوعبت ان طرحتها مو معها واخذت اقرب جلال لها وطلعت مع السلم وراه
دخل يشوفهم متجمعين عليها وصرخ فيهم يبعدون وبعدو وتقدم ياخذ عباتها ويشوفها تبكي بدون صوت لفها بعباتها وشالها ونزل يركض بها وطلعت شيخه وراه ركض
طلع يشوف الاسعاف وصل ووقف ينتظرهم ينزلون لها السرير ونزلوه وتقدم ينزلها واخذوها يدخلونها الاسعاف ودخلت معها شيخه الي تسمي وتقراء عليها وهي تبكي
طلع الاسعاف وركض نياف يركب سيارته وركبو معه قايد وصقر وطلع وراهم
وقف من دخلت سيارة ذيب الي توه جاي من المهمه ووقف يناظرهم باستغراب وضرب بوري من ملامحهم ونزل الدريشه وتكلم نياف بسرعه : العنود اخذوها للمستشفى
عقد حواجبه ذيب يدعس بنزين ويدينه ترجف
دقايق ووقفو يشوفونهم نزلو العنود ودخلوها
ودخلو وراهم
مسك راسه يناظرها متمدده على السرير وناظر امه الي مسحت كتفه وتكلم : وشفيها يمه تكفين علميني ؟
شيخه : وقت ولادتها يايمه ادع الله يسهل عليها
انكتمت انفاسه يناظر امه بخوف وهمس يدعي ل العنود
لانت ملامحهم من طلع صراخ العنود ودمعت عيون ذيب يناظر باب الغرفه بخوف ورجفه ومسحت كتفه شيخه تهديه
دقايق طويله وهم على حالهم الين طلعت الدكتوره تناظرهم وناظرت ذيب الي تكلم : اهرجي وش صار
الدكتور بابتسامه : الف مبروك جابت توأم ولد وبنت
لانت ملامح ذيب ونزلت دموعه يناظرها بصدمه وهمس : والعنود ؟
الدكتوره : الحمدالله ولادتها سهله بس هي متخوفه وصحتها زينه الحمدالله
ابتسم ياخذ نفس وناظر امه وتكلم بفرح ودموع : يمه تؤام يمه
هزت راسها شيخه تناظره فرحان : الله يحفظهم ومبروك
ابتسم ذيب يحضن امه ويبوس راسها ولف يسلم على قايد ونياف وصقر الي يباركون له
تنهد تنهيده طويله وناظر الممرضه يسئل عن غرفة العنود ودلتهم عليهم
اخذ نفس يدخل وابتسم بهدواء يشوفها نايمه وتقدم يجلس بطرف السرير ويناظر يدها فيها المغذي وانحنى يبوس جبينها ثواني طويله تعبر عن كل الي بداخله
بعد يناظر ملامحها التعبانه سكت يتأمل ملامحها ثواني
وابتسم بوسع من فتحت عيونها وهمس يقول : رجعت ابيتس تبشريني عنتس وبشروني باغلى اثنين منتس
ابتسمت بتعب تناظره وهمست : شفتهم ؟
هز راسه بالنفي وهمس : ليه ماقلتي لي ؟
العنود بهدواء : شفتك مُصر تبي ولد ويوم عرفت خبيت قلت بخليه مفاجئه
ابتسم بوسع ذيب وكملت : تكفى جبهم بشوفهم
هز راسه ذيب يأشر على عيونه ولفو من طق الباب ودخلت شيخه وتعدل ذيب يوقف
وتقدمت شيخه تسلم على العنود وتبارك لها وتكلم ذيب : ابشوفهم واجي
هزت راسها العنود بهدواء وفتح الباب ذيب يشوف قايد ونياف وصقر برا وتكلم بابتسامه : ادخلو لها وبشوف عيالي واجي
ابتسمو من كلمته الاخيره وتكلم قايد : يتربون بعزك
همس ذيب : امين
مر من عندهم رايح ودخلو عند العنود
وقف ياخذ نفس ويناظر من شباك الحضانه بلهفه وطلعت الممرضه ومعها اوراق : العنود
هز راسه ذيب وتكلمت الممرضه تناظر بدلته : وش تصير لها ؟
ذيب : زوجها
هزت راسها الممرضه تعطيه اوراق وتكلمت : لازم تعبي البينات ذي
هز راسه ذيب وفتحت الباب ودخل
نزل الاوراق على الرف يناظر الاطفال الي وراء القزاز الشفاف وناظر الممرضه من طلعت تسحب سريرين وعض شفته من تركتهم عنده
سكت يتأمل احجامهم الصغيره ويناظر الاساور الي بيدينهم وحده باللون الازرق والثانيه باللون الوردي ورفع يده بحنيه يمسك يدينهم ويشوف حجمها الصغير في يده ولف من تكلمت الممرضه : ب تحملهم ؟
هز راسه بالنفي بخوف وناظر يده الي ترجف من فرحته وتكلم : باخذهم عند امهم
هزت راسها الممرضه تسحب اسرتهم طالعه
وطلع وراها ذيب وهو يشوفهم يتحركون وتنهد يكمل طريقه
