ميل راسه ذيب يناظرها وتكلمت العنود : رحت مع صقر وريم لانها كان عندها موعد عند نفس الدكتوره ووقت نزلنا بندخل جو رجال تهجمو علينا فجأه ماندري ليه ووش السبب والامن الي بالمستشفى مسكوهم وتأكدو اننا بخير و ماتضررنا وطلعونا
سكتت تناظر ذيب الي يناظرها بذهول وصدمه مع عصبيه ومسكت كفه : والله ماطلعت مكان ثاني بس الموعد ورجعنا وهذا حنا مافينا شي
ذيب هز راسه يمسح دقنه : و الضربه هاذي وش تسمينها ؟
ميلت شفايفها العنود تناظره وكمل : وش قالو ردو لكم عنهم
رفعت اكتافها العنود ووقف ذيب بيطلع ومسكت يده ترجعه وتكلمت تناظره : ارتاح ونام بعدها تروح
ذيب : كيف ارقد بعد الي عرفته
العنود بحزن : غايب عني ثلاث ايام وانا مشتاقه لك تجي وتروح كذا ما جلست معي ؟
ذيب ابتسم يناظرها وهز راسه : البسي باخذتس ونروح للقصر
ابتسمت العنود وطلع ذيب ومشت تاخذ عباتها ولفت من تكلمت شادن الي سكرت الباب : طلع معصب قلتي له ؟
ميلت شفايفها العنود تهز راسها : عرف ماقلت له شاف الضربه ؟
عضت شفتها شادن تغطي فمها وهمست : والنزيف ؟
هزت راسها العنود : ماقلت له لانه بينجن لو عرف
شادن : الدكتوره منومتس في المستشفى يوم تقول لاتحركين ولاتسوين شي كيف تاتروحين هناك ؟
رفعت اكتافها العنود تعدل حجابها : خفت ارفض ويعرف
تخصرت شادن تناظرها متوتره واخذت عباتها وخطاها وتكلمت العنود : بتروحين معي ؟
هزت راسها شادن : لا ابخليتس تجلسين عندي
ناظرتها العنود بقل حيله وتقدمت تنزل معها
نزل يشوفهم يسولفون وتكتف يناظرهم ولفو عليه وتكلم يناظر صقر : ردو لك عنهم ولا ؟
لف عليه صقر ورفع حواجبه : من ؟
عقدو حواجبهم اصيل وجراح يناظرونه وتكلم
ذيب : لاتسوي نفسك ماتدري شفت الضربه بعيني وعرفت سببها
عض شفته صقر يناظره ورفعو حواجبهم اصيل وجراح بعدم فهم وسكتو يناظرونه معصب وتكلمت شيخه توقف : يابوي اهدا ومايصير خاطرك الا طيب
ذيب ناظر امه : يمه يتهجمون على زوجتي ويضربونها وتعكر نفسيتها عشانهم وتبين اهدا
ارتاحو لانه مايعرف عن النزيف وضحك ناصر : وترا جاها نزيف يعني ورعك بغى يودع
فتح عيونه ذيب يناظره ولف يناظرهم بصدمه وتكلمت شادن تناظر ناصر : ياجعلك بالمقص الي يقص لسانك من قاعته
مشاعل تخصرت : لاتدعين على اخوي ؟
شادن لفت عليها : اكلي تراب
ذيب : يمين بالله مايجلس ولا واحد فيهم متعافي
وقف صقر يوقفه وتكلم ذيب رافع اصبعه : صقر ابعد عني
هز راسه صقر : لا ماني مبعد تراهم في السجن ويتحاسبون تروح وش تسوي ؟
ذيب بغضب : انت انهبلت وش ابسوي يعني ابثور فيهم
شادن تقدمت تمسك ذراع ذيب : ذيب اسمعنا دقيقه بس
سكت ذيب ياخذ نفس وتقدمت شيخه : انت الحين معصب وجنونك راكبتك اهجد وارتاح وبعدها تصرف
هز راسه ذيب يمسك راسه : قسم بالله مدري كيف انتم مرتاحين
شادن اشرت : العنود هذي هي مافيها شي وولدك طيب حتى الدكتوره كشفت عليها وقالت انها بخير وان كان منت مصدق رح اسئل الدكتوره وشف وش تقول
ذيب : مهب ماني مصدق السالفه عند انهم مدو يدينهم وضربو وان سكتنا الهم الحين بيتمادون
صقر هز راسه : حنا ماسكتنا لهم سلمناهم للشرطه يشوفون شغلهم معهم
مارد ذيب الي مسك راسه يفركه ورجع يدخل البيت بدون اي كلمه وتكلمت شيخه : خلوه يرتاح
هزو روسهم وانحنت شادن تاخذ الزبيريه الي قدامها ورفعتها ترميها على ناصر الي يشرب شاهي
وفز ناصر من انكب الشاهي عليه وطاحت البياله وشدت على يدينها : امممه ودي ان البياله داخله حلقك وسادته
مسكو روسهم يضحكون منها وتكلم ناصر : وش النهايه ؟
انحنت تاخذ الثانيه ورفعتها ترميها له : انطم
اشر لها ناصر انه بيسكت ولفت تناظر مشاعل وهي رافعه الزبيريه ورمتها وراء مشاعل الي انحنت ومسكت قلبها : مجنونه انتي ؟
شادن تخصرت : ارتاحي مانجنيت بس خفت عليتس من الصرصور وذبحته عنتس
سكتو يناظرونها وتكلمت زينب : كنتس تماديتي على عيالي ؟
لفت تناظرها شادن وتكلم حاكم الكبير الي متكي وماد رجوله ورافع اصابعه يتكي راسه عليها ويضحك : شادن روحي روحي وانا ابوتس
تنهدت وهزت راسها شادن ورفعت ذراعها على كتوف العنود تمشي معها
اخذو نفس يشوفونها رايحه وتكلمت مشاعل الي تتلفت : وين الصرصور الي تقوله ؟
انحنو يضحكون منها وتكلمت الجده سلمى تاخذ نفس : قومي قومي
وقامت مشاعل تاخذ الاغراض ودخلت
