صقر : عشان الي اولا
هزت راسها بعدم اهتمام : مايزعل اصلن
صقر : طيب ليه ماناظرتيني يوم جيت
ريم رفعت حواجبها تناظره وفتحت يدها توريه : عشان ذا تعكر مزاجي مالك دخل انت
رفع حواجبه صقر يناظر الحرق الي بيدها وناظرها : وانا احسبه عشاني ماعايدتس
هزت راسها ريم بابتسامه : شوفتك عيد انت مايحتاج
ابتسم يناظر يدها : ومن وش ذي ؟
ريم وهي تناظر الحرق : من الكوايه بعد ماطلعت للبنات قالت جدتك اكوي برقعي واكلتني
رفع حواجبه يمسك يدها ينفخ عليها وتقدم يبوسها بهدواء وتكلم : تعورتس ؟
هزت راسها تناظره : كانت بس الحين لا
ضحك يناظرها ثواني وتكلم : نامي وراتس كشخه شوي
هزت راسها تغمض عيونها : ونام انت
نزل راسه على المخده يشوف الحرق ثواني وماطولو ونامو
العصر صحو الكل على صوت حاكم الي صحى من بدري وشاف انهم نايمين من التعب وتركهم يرتاحون وانتظر ساعات لين اذن العصر وشاف انهم ماصحو و وقف يصحيهم وهو يطق الباب وينادي الين ردت عليه ترف الي توها صحت على صوته ورفع صوته يقول : يالله يابوي اصحو الوقت ماش وقت
سكتت تناظر البنات متسدحات ونايمين وهزت راسها : ابشر يخالي ابقومهم
هز راسه يشوف العيال طالعين من المجلس وهم متقروشين والي يتثاوب والي يتمغط ورفع عصاه بمزح يضغط بطن صالح الي يتمغط وارتفعت الفنيله عنه
وفز صالح يتلفت وضحك حاكم : صحصح وانا ابوك وراك صلاة
هز راسه صالح يفتح المويه يغسل عشان يطير النوم وطار
وبداء يتوضى ولبس ثوبه وهو يشوف العيال يتوضون ولف من تكلم عزيز : مافيه مغسله ثانيه
هز راسه صالح : للأسف مافيه انتظر لين يجي دورك
كشر عزيز يتكي ودقايق وخلصو الكل وطلعو للمسجد وكانو ذياب وحاكم وقايد جالسين في صف وعندهم من شياب الديره ويسولفون وكبرو يصلون الظهر لان فاتتهم ومن خلصو اقام الامام وكبرو يصلون العصر
في البيت كانت ساره في المطبخ تزين الغداء وكانو متأخرين فيه بس لازم يتغدون ويغدون الباقين عشان يصحصحون ومالحقت تجهز له من التعب ونامت ومن صحت شافت الاحسن تسوي لهم مغموسه ( رز ابيض وفي طاسه في نص الصحن سمن بري ولبن ، يارب فهمتو )
المهم رجعو وتغدو وبدو يروقون وهنا قامو البنات يتجهزون لان مابقي وقت ويأذن المغرب ولازم بعد المغرب يكونون جاهزين عشان يبداء العيد والحفل
والعيال بالمثل بس كانو يجهزون القهاوي ويدورون ويشبون النار عشان يسوونها
وكانت من عادتهم في كل عيد هم يجهزون القهاوي وحتى فطور العيد عندهم وماكانو الحريم يسوون شي لانهم تعبو في رمضان والعيد يكون راحه لهم ومايتدخلون في شي غير الشايب يالي عيده اليوم تدخل زوجته وبناته عشان الطبخ وكذا الباقي مايتدخلون فيه
وكانت من عادتهم في كل عيد هم يجهزون القهاوي وحتى فطور العيد عندهم وماكانو الحريم يسوون شي لانهم تعبو في رمضان والعيد يكون راحه لهم ومايتدخلون في شي غير الشايب يالي عيده اليوم تدخل زوجته وبناته عشان الطبخ وكذا الباقي مايتدخلون فيه
وكان العيد اليوم عيد ابو راضي بما انه شيخهم هو اول يوم
ويترتبون بعدها الي يحط عيده غداء والي عشاء براحتهم والي يوزعها صدقه كلن وحلاله
والرجال في حوشهم والحريم في حوشهم وكلن موجود كبير وصغير
شغلت السماعه ورفعت اعلى صوت واشتغلت شيله العيد المعتاده عندهم : العيد هل وياهلا ، يامرحبا يامسهلا ، وعايدو كل الملا ، وكل عام وانتم بخير
