لفت تناظرهم العنود ثواني وأشرت : هذا هو مجلس الرجال ارتاحو هناك
فتحت الباب تدخل وتكلم صالح للبوديقارد : انتم هنا وهي الحالها في البيت ؟
هز راسه البوديقارد يناظرهم ورفع يده بمعنى تفظلو وتقدمو يمشون معه
دخلو المجلس يتلفتون واشتغلت الانوار كلها وفتحو عيونهم بذهول من جمال المجلس وتصميمه تقدمو يناظرون صورة راشد على الجدار ولفو من دخلو الخدم بالفرش والبطاطين وابتسم سيف : خدمه خمس نجوم
جلسو ع الكنب يناظرون المجلس وتكلم ذيب : وين الحمام ؟
تكلمت الخادمه : بتطلع من هون عاليسار
هز راسه ودخلو الخدم وتكلم صقر : فهمت شي ؟
ذيب هز راسه ب النفي : يسار بس المهم صلات الفجر ماصليناها صلو ورقدو
هزو روسهم يناظرون المجلس ودخل ذيب وراه صقر وصالح جهة الحمامات وتكلم صالح بذهول : هذا ابرقد فيه مهب حمام
صقر : من الكرم حاط الحمامات ثمانيه والبخيل الي عندنا حاط في كل بيت حمامين وبيبانها متكسره
ضحك ذيب يناظره وتكلم صالح بضحكه : الكل واحد حمام عددنا
صقر : والله انك صدقت شكلي ابرقد فيه
ذيب : خلو السوالف عنكم و وضو لصلاه
صالح : تكفون ادعو ان ربي يفكنا من الديره ونسكن في بيتاً كذا
هزو روسهم بتسليك وتكلم صقر : اذا مات عقاب وقتها ادع هالدعوه
هز راسه صالح وسكت
وبعد ماصلو الكل تقدمو عند الفرش ونامو بتعب وارهاق
ناظرهم مجتمعين على الفطور وتكلم : وين العيال ؟
حاكم : من البارح ماعيناهم ؟
الجده سلمى: هماك مرسلهم يجيبون البنت اصبر عليهم
عقاب : يمديهم لقوها مغير من المرضعه فيهم مير اسمع يحاكم نفطر ونخلص ونروح للعزبه تلقاهم متسدحين فيها
هز راسه حاكم وتكلمت ساره : يمه تبين احنيتس شوي ولا بكره
الجده سلمى: لا والله الا حنيني شوي عشان يصبغ لونه
ساره هزت راسها : وانتي يشيخه ؟
شيخه هزت راسها : ايه انا ابتحنى معتسن ذكرني لانسى
ساره هزت راسها تفطر وبعد ثواني وقفو عقاب وحاكم وطلعو والحريم بدو يجهزون لزواج هادي وسلمى الي يكون اليوم الثاني
طلعت تجلس فالحديقه وتناظر الزرع والورود والشلالات وتقدمت صمود تنزل الفطور على الطاوله وابتسمت العنود تناظرها : مشتاقه لاكلك
ابتسمت صمود : صحة وهنا يقلبي
مدت يدها العنود وبدت تفطر ولفت من طبو عليها العيال وتكلم راكان : حياة التجار وفطورهم
صدت العنود تشرب شاهي ولفت من تكلم صالح : نجلس ؟
العنود وهي تناظر الفطور : اجلسو
جلسو العيال يناظرون الفطور وتكلم سيف : ماعندكم قرص ؟
ابتسمت العنود تناظر صمود الي ضحكت وتكلمت : ماعمرها سوت قرص. تعرفين ؟
هزت راسها صمود بالنفي : اسمع فيه بس ولا مره سويته
سيف بابتسامه : جربيه صدقيني تسحبين على الفطور هذا
صقر : احمد ربك واكل وانت ساكت
راكان اشر : وش هذا ؟
صمود : مرتديلا
عقدو حواجبهم يناظرونه وتكلم صالح : وش يعني ؟
صمود : لحم متبل نفس النقانق بس اكبر
ذيب بهمس : شرهتس على الي يعرفه
سكتو يفطرون ودخلت صمود وبعد دقايق صمت لفو من تكلم للبوديقارد: عادل ومصعب برا
هزت راسها العنود : دخلهم
هز راسها يفتح لهم البوابه وناظروهم داخلين بسياراتهم للمواقف ونزلو يتقدمون عندهم وقفو يناظرونهم وابتسمو : صباح الخبر
العنود : صباح النور
تقدمو عادل ومصعب يسلمون على العيال وجلسو يناظرون العنود : متى جيتي ؟
العنود : الصبح
مصعب : قالت لنا نجود
سكتت العنود وتكلم عادل : بندر رجع امس
رفعت نظرها عليه العنود ولفو يناظرونها العيال وتكلمت : وين ؟
عادل : اتصلو عليه يجي المانيا يكمل البعثه وماقدر يردهم
هزت راسها العنود تناظر العيال الي يناظرونها وصدت ووقف عادل يركض لسيارته وناظروه باستغراب وبعد ثواني تقدم عندهم وهو فاتح السناب ويصور وبيده كيسة هدية وتكلم وهو يتقدم عن العنود : وهذي هي الامانه وصلت عند حبيبتك
ابتسمت العنود تاخذ الكيس وقلب الكام عليه وتكلم : اجحدها وقل مانفع
نزل الجوال يرسل المقطع ل بندر وناظر العنود : له يومين يدور لك هديه ويادوب حصلها افتحيها
هزت راسها العنود ونزلت الكيس تفتحه وطلعت بوكيه زهور التوليب ابتسمت تقربه من انفها وتشمه ونزلتها عالطاوله تطلع البوكس نزلت الكيسه تحت الطاوله وحطت البوكس مكانه وفتحته تطلع العلبه المخمليه منه فتحتها وابتسمت تناظر عقد الألماس دمعت عيونها وهي تناظره ورفعت كفها تلمسه ولفت من تكلم عادل : عقد الماس
ابتسمت من سمعت صوت بندر : يلوق عليها والله
مصعب اخذ بوكية الزهور يوقف عند عادل وتكلم : اخس يالرومنسيه توليب
ضحك بندر من شافه معه وتكلم : رجعه
ضحكو عادل ومصعب و مدت يدها وتقدم عندها عادل بالجوال ولف الكام عليها وتكلم بندر بفرح : ياهلا كيف الحال
العنود : الحمدالله وانت ؟
هز راسه : بخير اسف ماقدرت اكلمك على طول رحت في اول رحله
العنود : معذور. وشكراً ع الهديه
بندر : مابينا ان شاءالله تلبسينه في زواجنا بعد مارجع
سكتت العنود تناظره
وناظرت العيال الي يناظرونها وناظرت الجوال وهزت راسها بدون اي كلمه واخذ الجوال عادل وتكلم : انت قليل ادب خليت البنت تشتاق لك وحزنت
بندر : والله مهو قصدي وبكلمها انا بس بطلع الحين
هز راسه عادل : يالله طمنا عليك
هز راسه بندر يقفل وناظرهم : وصلت الامانه وتطمنى عليك بروح لدوامي
مصعب : وانا استئذن
هزت راسها العنود تناظرهم لين طلعو وناظرت العقد قدامها ورفعت يدينها تسكره وتمسك البوكيه وناظرتهم يناظرونها ووقفت تتكلم : طولتو
اخذت الهديه تدخل وقامو العيال يطلعون راجعين ل الديره
نزلت نظرها ليدها تناظر الخاتم ولفت تناظرهم مع البلكونه طالعين تنهدت تناظر مكان جلوسهم ودخلت تنزل عباتها وحجابها وتفتح التلفزيون وتجلس عالكنبه تتابع ١٠٪
وتفكر ٩٠٪
