شيخه استغربت : واهلتس وين ؟
ناظرتها بتوتر من الطاري : امي وابوي متوفين وانا صغيره وعشت مع جدي
ناظروها بحزن وهمسو : الله يرحمهم
هزت راسها تصد عنهم ودخلت رزان وسلمت تجلس وعيونها على العنود وابتسمت : كم عمرتس انتي ؟
ابتسمت العنود تناظرها : ٢٤
هزت راسها رزان وقالت ريم من شافت انها توترت : تقهوي
لفت تناظر البنات وابتسمت: انتم بنات حاكم ؟
ريم اشرت على سلمى و شادن: هذلي هن
ابتسمت العنود تناظرهم وناظرت ريم : وانتي بنت عمهم ؟
ريم هزت راسها واشرت على امها : لا جارتهن وهذي امي
لفت تناظر الجازي وصدت من قالت رزان : انا زوجت عمهن بس عندي اربع عيال ماكتب ربي اجيب بنت .... وناظرت البنات وكملت : ماجبت بنات واخذت كل الجمال لو بجيب بنت بتشاركني بجمالي
لفو يناظرون رزان بصدمه وسكتو ولفو على العنود الي ابتسمت تصد
حست ان الجو تكهرب من بعد كلمة رزان وابتسمت تسكت وتناظرهم وترد عليهم
وبعد العشاء والسوالف والضحك طلع راشد وطلعو الكل معه يودعونه حتى شياب الديره وعيالهم وتشكرهم راشد وتقدم يوقف عند ابراهيم ينتظر العنود وعينه على قايد الي متوتر يناظر الباب
لفو من انفتح الباب وطلعت العنود بحجابها بعد ماودعتهم ولفت تناظر الرجال واقفين وصدت تمشي مثل عادتها بشموخها وهيبتها وبيدها شنطتها ابتسمت من شافت راشد ينتظرها
وتقدم يركب مكانه ومن قربت عند السياره وتقدم يفتح لها ابراهيم وركبت يمين راشد ورجع يركب ابراهيم
لفت تناظرهم واقفين مكانهم يناظرونهم ولفت على جدها الي يناظرهم وعاقد حواجبه
مدت كفها تشد على كفه وهمست : عسى ماشر
صد راشد : الشر مايجيك .... وسكت
استغربت العنود من حاله وسكتت تصد وتناظر الطريق
..................................
دخل المجلس بعصبيه وجلس يشد على يدينه
رفع راسه من دخل ابوه وسكر الباب وتقدم يناظره : انت علامك قالب على الرجال تكلم تعرفه ؟
قايد ناظر ابوه وصد ياخذ نفس وقال : خوفي تعرف وتقب وتجبر حاكم نفس ماجبرتني وتفرق بينهم
عقاب عقد حواجبه يناظره : وش تقصد ؟
قايد وقف قدام ابوه : شفت الي طلعت معه اولا وطلعت تمشي قدامنا كلنا هي نفسها الي كنت خايف من القبيله بسببها هي الي بغيت تتبراء مني عشان محد يدري عنها
عقاب جمد مكانه وقال بعصبيه : اهرج زين
قايد : تذكر قبل ٢٤ سنه وش صار
جلس عقاب يفكر ولف عليه بصدمه من عرف
( نرجع قبل ٢٤ سنه )
دخل بيته وكانت فاطمه قدامه طايحه قدامه
جمد مكانه يناظرها بخوف وتقدم يحركها يمين يسار ابداً ماتتحرك مد يدينه يشيله ويطلع وسيده ع المستشفى
دخل الطوارئ وتقدمو عنده الممرضين ياخذونها وفي ثانيه اختفو من قدامه مسك راسه يناظر المستشفى والناس الي تناظره وجلس وهو يرجف ينتظرهم
وبعد دقايق طويله طلع له الدكتور وتكلم : من تكون ؟
قايد بتوتر : زوجها
الدكتور هز راسه يناظره متوتر : الصراحه الام ماقدرنا نسعفها ادع لها بالرحمه
ناظره قايد بصدمه ثواني وتكلم بخوف : والجنين ؟
الدكتور : الحمدالله البنت بصحه وعافيه بس لازم تكون فالحضانه اقل شي يومين
جلس قايد وهو ماسك راسه ويفكر كيف بينقل الخبر لهم واهله مايدرون
رفع راسه من طلعو بالسرير مغطى وجمد ثواني يناظره لين اختفى عن انظاره
ووقف يطلع من المستشفى بكبره ويركب سيارته ويمشي طريقه لبيت راشد وقف يناظر البيت ثواني ونزل يدخل
ناظر راشد الي طالع وتقدم يبوس راسه وناظره راشد وجهة ذبلان وتكلم : وشفيك حالتك كذا ؟
قايد : بتكلم معك في موضوع
هز راسه راشد يمشو معه وهو متوتر من شكله وبعد ماجلسو تكلم قايد : فاطمه ولدت
فز راشد بفرح يناظره وكمل قايد : لاكن توفت وبقت بنتها
جمد مكانه راشد يناظره وامتلت عيونه دموع يناظر قايد بصدمه وهمس قايد يدعي لها
وتكلم راشد بصدمه : انت متأكد ؟
هز راسه قايد ووقف راشد : الحين توديني المستشفى
وقف قايد وطلع معه وبعد ماتأكد راشد من الخبر وانتشر خبر وفاة فاطمه وبعد العزاء طلع قايد وبين يدينه بنته
وسيده على الديره وبعد دقايق وصل ونزل يدخل بيت ابوه وكان فيه بس امه وابوه الباقين مو موجودين
وقف يناظرهم جالسين يتقهوون ولفو يناظرونه وفزت سلمى بفرح : رزان ولدت
تقدمت عنده تناظر البنت بين يدينه وهز راسه قايد ب لا : بنتي من الثانيه
ناظرته سلمى بصدمه ووقف ابوه بعصبيه : انت وش تقول
جلس قايد على ركبه يناظرهم ونزل نظره للطفله الي بين يدينه : متزوج بالسر وتوفت وقت ولدت بنتي
شهقت سلمى تناظره جالس وتقدم عقاب : تبي تفشلني انت
قايد : ماسويت شي غلط والشرع حلل اربع
عقاب مسك راسه بعصبيه وتقدمت سلمى بتشيل البنت وصرخ عقاب : خليها
لفت عليه بفجعه وكمل : تقوم الحين وتذلف تشوف لهالبنت صرفه وان مارجعت بدونها منت بولدي ولا اعرفك
ناظره قايد بصدمه وتكلمت سلمى : يأدمي البنت يتيمه وين يوديها
عقاب بعصبيه : قسم بالله لن طلع الخبر ولا عرف فيه احد مايصير خير وانت قم اطلع من بيتي ورجع البنت اهم شي تقلعها وماحد يعرف فالموضوع
قايد نزل نظره للبنت بين يدينه وناظر ابوه : البنت بنتي ومالها احد غيري
عقاب : اجل مانت بولدي ولا اعرفك
سلمى شهقت تناظره بخوف وتكلم عقاب : تقوم تقلع البنت وترجع ولا لاترجع وخلك معها
وقف قايد وطلع من البيت بعصبيه وركب سيارته وطلع من الديره ولف يناظر البنت في فراشها وتصيح
وتأفف يكمل طريقه
وقف عند بيت راشد ونزل يدخل والبنت معه وطلعت له الخدامه وناداها تقدمت عنده ومد علها البنت وتكلم : وديها عند جدها وجدتها
هزت راسها الخدامه تدخل وطلع قايد راج للابوه وبيته
