ترف بفرح : متحمسه باقي اسبوع عن زواجكم
شادن : انا فرحانه لانها مهيب مزعجتني وانا راقده
وحزينه لانها بتروح وتخلي الكرف الي
سلمى ضربتها : احسن تسنعي خلي الرفاله عنتس
عاليه بضحكه : اسحبي مشاعل تكرف معتس
هزت راسها شادن بتكشيره : لا الله يرحم امتس اكرف بس لاتشوفها عيني
ترف بضحكه : عاد ماتخلي حركاتها
سلمى : انا مادابل كبدي الا انها تاتلزق في ذيب وتفك لسانها على اوخيتي واني ماقدر افزع واكفخها عنهم
شادن : سمنانه الملعونه وانا نحيفه ماقدرها
عاليه بضحكه : جيبي العنود معتس
شادن بابتسامه: ابتسلف كعبها عشان اذا لمحت مشاعل اللخها ابه
ضحكو البنات يناظرونها وتكلمت عاليه : يزين كعبها كشخه وكعب خالتها اهه يبنات يموت
سلمى ناظرت ترف : خلو الثياب وعاينو فالرجلين
ضحكت ترف تهز راسها وتكلمت عاليه : كلهن يقطعن القلب .... ضحكو البنات يناظرونها
بعد العشاء والسوالف والضحك ونظرات الحقد والكره الي صارت
طلعو شياب الديره والعيال والحريم وبقو عقاب وعياله واحفاده فالمجلس مع مشاري والعيال
لف عقاب يناظرهم جالسين وناظر عياله الي يسولفون وتكلم بهدواء وهو يناظر مشاري : سمعنا ان بنت اختك مخطوبه صحيح هالكلام ؟
لفو يناظرونه الكل وهز راسه مشاري بابتسامه يمسح كتف بندر الي جنبه : مخطوبه لولدي بندر
ابتسم بندر يناظرهم وسكت عقاب يناظر بندر
ولفو من تكلم قايد : من متى ؟
مشاري : من قبل وفات المرحوم
عقاب : ومتى العرس
مشاري لف يناظر بندر الي ناظره وتكلم : ابوي توفى قريب ونبي ننتظر وقت
هز راسه عقاب يسكت ويناظرهم
ولفو من دخلت العنود وتقدمت تجلس جنب مشاري وتكلمت بفرح : وحشتوني
ابتسمو يناظرونها مشاري والعيال ورفع يده مشاري يمسح ظهرها و يحظنها وتكلم : والله انتي الي وحشتيني ي دلوعتنا
كيف حاك ؟ زينه ؟
هزت راسها العنود تناظر عقاب والباقين وتكلمت : الحمدالله. مع انو فيه مضايقات وتدخلات تصير بس ماشي حالي الحمدالله
ابتسم مشاري يناظرها وناظرت بندر من تكلم : قبل ثلاث ايام رحت للقصر وقالي ابراهيم انك طلبتيه
هزت راسها تبتسم : بغيته في كم شغله وزينها
سكتت ثواني تناظرهم وتكلمت بهدواء وبغصه : كيف القصر والمزرعه شفتوهم
هزو روسهم من تغير صوتها ووقف عادل وتكلم : المزرعه لاحد يقرب لها صارت محتواي
ضحكت العنود تناظره : انا محرصه عليهم مايدخلونك
ضحكو يناظرونها وتكلم عادل : مايزيدون المشاهدات الا اذا صورت في المزرعه
ناظرهم مصعب : الصبح يبوني افتح بث ومحددين مايبون الا المزرعه
ضحكو يناظرونه وتكلمت العنود : انتم معاكم فلوس ماشاءالله بأجرها عليكم
مصعب طلع صرافته : معك شبكة؟
ضحكت ترفع يدها : تحويل ينفع
هز راسه مصعب يضحك وتكلم بندر : عليهم بفلوس طيب انا
سكتت تناظره ثواني ولفو يناظرونه وتكلم : بلاش صح
العنود هزت راسها : انت تدفع دبل الي يدفعونه
فتح عيونه بندر بوسع وتكلم : افا نودي من متى واحنا كذا
ابتسمت العنود تناظرهم وتكلمت وهي تناظر بندر : عيونك توترني ياخي خلاص كلكم بلاش يالله
عادل ومصعب وبندر وعايش صرخو بفرح يوقفون وتكلم عايش : اي كفو اسمعي كلام زوجك المستقبلي
ضحكت العنود تناظرهم وضحك مشاري يناظرهم وتكلم بندر : انا اقولك خلي عليهم بأجار وانا بلاش
مشاري بضحكه : هو اذا انت رحت لازم هم يروحون
عادل ناظر بندر : ياخي زانت لنا اسكت
طلع لسانه بندر ل عادل ولفو على العنود من تكلمت وهي تناظرهم واقفين قدامها : بأي وقت روحو مارح يرفضون
مصعب : طيب كلمي مصطفى صاير مكان الكاميرات
عادل : اي والله صادق تفاهمي معه اذا لمح سيارتي من بعيد وقف على البوابه عشان مادخل
العنود بصدمه : مو معقوله مصطفى يسويها
هزو روسهم وتكلم بندر : من اخذتي المزرعه وهو متشدد علينا
استغربت العنود تناظر مشاري وناظرتهم
وتكلم عايش وهو يناظر عادل : وش جملتة الي يقولها لنا
ابتسم عادل يناظر العنود ويقلده : ماحتخشو الا بأمر من الاستازه العنود
ضحكو من تقليده وتكلمت العنود : تمام بكلمه يبعد عن البوابه ويدخلكم
ابتسمو العيال بفرحه وضحك عادل : اجلس يمصطفى بنخش غصب عنك
جلسو العيال يناظرونهم بفرح
ولف يناظر الجانب المصدوم والمندهش عقاب وعياله واحفاده الي يناظرونهم
ولف يناظر العنود الي انتبهت وابتسمت تناظره : تعبان بترتاح ؟
ابتسم من عرف انها فهمته وهز راسه يناظرها ووقفت تناظرهم : تعالو معاي بنرجع للبيت عشان ترتاحون
وقفو وناظرو عقاب وعياله وابتسم مشاري يرفع يده : اكرمكم الله
هزو روسهم يناظرونهم يطلعون ووقف قايد يطلع وراهم وتكلم عقاب : اجلس
لف يناظر ابوه باستغراب وجلس وناظر حاكم والعيال : اطلعو انتم
وقفو يطلعون وسكر الباب يلف يناظر قايد : عاجبك
سكت قايد يناظره وتكلم عقاب : تبيني ارضى عليك واسامحك وافتح الباب الي سكرته وترجع ولدي نفس قبل ؟
سكت قايد يناظره ثواني وهز راسه وتكلم عقاب وهو يرفع صوته : تبي ترجع ولدي ولا تجلس غريب في بيتك ولاعندك ابو وام واخوان ؟
هز راسه قايد : وش المطلوب ؟
عقاب هز راسه : فاهم مطلبي المطلوب تفركش خطبة بنتك وتزوجها لواحد من عيال عمها وترجع ولدي وافتح الباب الي بينا واسامحك
فتح عيونه قايد بصدمه : الله يهداك ماتسمع وش قال خالها قال مخطوبه لولده
عقاب بعصبيه : ماعلي منه اهم ترفض وتزوجها من عيال عمها
سكت قايد يناظره وطلع عقاب يتركة وثواني وطلع قايد ناظرهم جالسين في الحوش وتكلمت الجده سلمى : تعال ياقايد
عقاب بغضب : اطلع لبيتك
تنهد قايد يناظر امه وناظرهم وتقدم يطلع لبيته
لف يناظر هادي وغيث وتكلم : ابوكم وين ؟
هادي بهدواء : عنده شغل وبيجي قبل العرس بيوم
هزو روسهم وتكلم عقاب وهو يوقف : جهزو انفسكم لعرساً جديد
ناظروه بصدمه وتكلمت الجده سلمى : ماشاءالله من بيعرس
ناظرهم عقاب جالسين وأشر بعصاته على ذيب وتقدم يدخل تاركهم بدون اي كلمه
عقد حواجبه ذيب من اشر عليه وناظر ابوه وتكلمت شيخه باستغراب : ذيب
ذيب هز راسه بالنفي : مالي شغل ولا هرجت بحرف
حاكم سكت يناظرهم وتكلمت الجده سلمى: وراه اشر عليك طيب
رفع كتوفه ذيب يناظرهم مستغربين وناظرو حاكم الي يناظرهم ساكت وتكلم ذيب بعصبيه : هذاني قلت الكم يبى يزوجني غصب اذا مشى هالكلام على الباقين مايمشي علي
وقف يطلع وناظرو بعض ووقفت الجده سلمى وتنهدت : ابشوف اخرتها مع عقاب وش
دخلت تاركتهم وناظرت حاكم شيخه وتكلمت : تعرف شي
رفع كتوفه حاكم : مدري وش السالفه انا زيكم بس تعرفون ابوي انتم لازم كلامه يمشي
ساره : ذيب عصب عارف ان السالفه اجبار بس من البنت ؟
رفعو اكتافهم يناظرون بعض ولفو من سمعو صوت الجده سلمى ووقفو يدخلون وتكلمت الجده سلمى بعصبيه وهي تناظر عقاب : يأدمي خاف ربك البنت مخطوبه وتاتعرس وانت بتمشي كلامك عليها
عقاب بغضب : بس عاد انا ابغى كذا ويبى يصير عجبكم ولا معجبكم
لفو من تكلمت ساره : وش السالفه ؟
ناظرتهم الجده سلمى موجودين ومسكت راسها : ابوكم كبر وانهبل يبى يزوج العنود من ذيب والبنت ماهي حول ذيب
ناظرو عقاب بصدمه وتكلم حاكم : يبه الله يهداك محد راضي عن هالزواج
عقاب بغضب : بالطقاق انا ابي ازوجهم وبكيفي واجبار بعد
ارتحتو
ساره : يبه الحياه مهب كذا لازم نتشاور معهم مايصير نربطهم في شي مايبونه
عقاب : ومتى صرنا نشاورهم هذاهم هادي وسلمى بيعرسون وماشاورناهم والباقين نفسهم ويبى يمشي كلامي
رضيتو ولا مارضيتو
سكتو يناظرونه وطلعو تاركينه وهم عارفين راس عقاب يابس ومايقتنع بسرعه
تنهدت الجده سلمى تناظره معصب وتكلمت : كلامك مشى على الضعاف الي مايردنك بس انت الحين دخلت نفسك بين اثنين مهم بضعاف ويبون يردون ويتكلمون ويرفضون فكر فيهم انت اكثر واحد تعرف ذيب مايرضى هالشي والعنود في اربع ايام عرفناها اجراء من ذيب ومنك واذكر وش جراء بينك وبينها وكلامها الك .
لفت تطلع تاركته وهي تفكر في العنود الي عارفة انها مارح تسكت وبتوقف في وجهة
..................................
طلع يركب الوانيت ولف من طق الدريشه وفتحها يناظر صقر الي تكلم : شفيك معفوس
ذيب هز راسه : اركب اركب
ركب صقر وشغل ذيب ماشي وطالع من الديره وتكلم صقر باستغراب: وش فيك يأدمي اقلقتني
ركب صقر وشغل ذيب ماشي وطالع من الديره وتكلم صقر باستغراب: وش فيك يأدمي اقلقتني
ذيب : وفيه احد يرتاح للي يبى يصير
عقد حواجبه صقر : عسى ماشر
ذيب وقف عند العزبه وناظر فيه : جدك يبى يزوجني
رفع حواجبه صقر يناظره وكمل ذيب : بأجبار نفس حركاته دايم
صقر : من تعيسة الحظ ؟
هز راسه ذيب : مدري منهي بيلقاله وحده يلزقها فيني مهب جاي يشاورني منهي
صقر تنهد : نطلع من سالفه ندخل في سالفه
هز راسه ذيب ينزل ونزل وراه صقر يدخلون العزبه تقدم يتكي على شبك الابل يناظرها ووقف جنبه صقر وتكلم : من تتوقع ؟
ميل شفايفه ذيب يناظر الابل ورفع راسه للسماء : يارب ماتكون مشاعل
ضحك صقر كمل ذيب : ابلشتني بعمري هالادميه مدري افتك من اخوانها ولا منها
صقر نزل راسه على الشبك وناظره : عاد جدك مايدانيها ماتوقع هي يمكن من الثانيه
رفع كتوفه ذيب : المهم اني ماسمح يمشي كلامه علي وبس
صقر سكت يناظره ثواني وتكلم ذيب : الضيوف عندكم ؟
هز راسه صقر : مدري كيف نياف وسيف رقدو وسوالفهم وضحكهم معبيه البيت
ذيب بابتسامه: احس حبيت جوهم قلوبهم على بعض يدارون بعضهم
صقر بضحكه : لو نسلم من جدنا دارينا بعضنا
ذيب بتكشيره : جدك ماعنده قلب عشان يحس
ضحك ذيب يناظره ولفو من تكلم عمار ( العامل ) : ايش سوي هنا ؟
ذيب : وش يخصك انت
عمار : انا فيه نوم يالله برا
رفعو حواجبهم يناظرونه بذهول وتكلم صقر بعصبيه : مابقي الا انت تطردنا اقول اذلف لاربطك ف الوايت
لف عمار يدخل غرفته وسكر الباب وتكلم ذيب : لسانه طولان هالايام
صقر عض شفايفه يناظر الغرفه وتكلم : سكر الباب في وجهي الملعون والله ماخيه
ضحك ذيب يناظره معصب وتكلم : اتركه عنك تعال
صقر هز راسه يدخل عند الشعير والبرسيم يدور : حلفت ماخليه
ابتسم ذيب يناظره وبعد ثواني طلع صقر وبين يدينه سطل ووقف يطبل ويغني : لا يالرفيق الوافي المزيون ، خلك على عيني تداريها ، لا تسلك الفرقى علي بالهون ، النفس تعشق نفس ساقيها
ضحك ذيب يناظره واقف ويطبل ويغني ولف من انفتحت الغرفه وناظر صقر : النحشه
لف صقر يركض وراء ذيب ودخلو وحده من الخيام ورجع يطبل صقر ويرقص ولفو من دخل عمار وتكلم : مجنون انتى انا فيه نوم
لف صقر يناظر ذيب المبتسم وطبل يكمل : ترضى علي كلمة المجنون ، عقبك تراني مبتلش فيها ، اسفه كلام الحاسد المرشون ، النار تحرق كل ما فيها
تخصر عمار يناظر صقر الي يردد الكلمات ويطبل ولف يناظر ذيب الي يضحك ويردد معه
ناظرهم ثواني وطلع يدخل غرفته تاركهم
ضحك يضرب كف صقر الي مده له وتقدم يطل من الباب : دخل غرفته
صقر ابتسم: خله مايقدر يسوي شي
ذيب لف عليه : يحرش جدي علينا
طلع لسانه صقر بعدم اهتمام : خله
ذيب : تبى نروح للدكه يمدي الشباب فيها
صقر رفع كتوفه : براحتك تبى نروح رحنا
هز راسه ذيب : اجل اتركهم وتعال نضبط شاهي الحين ونتكي تحت القمراء وتعلمني بعلومك
صقر بتنهيده : اههه بس
ذيب وهو يدور بين الاغراض : انا حاس فيك لك ايام منت طبيعي ويشغلك شي بس تلهي نفسك عنه
هز راسه صقر : بس مدري كيف ابداء
ذيب وهو يشب النار : ابداء فالي يعجبك
صقر جلس : الا وش سوو مع مسفر ؟
عقد حواجبه ذيب : سمعت من راضي انهم طردوه بس ماقال شي ثاني. سامع شي انت ؟
هز راسه صقر : ماسمعت
ذيب وهو يحط الشاهي على النار : اجل السالفه فيها مسفر
ابتسم صقر : ضاحي يوم علمنى قال انه بياخذ ريم معه طيب ولا غصب صح ؟
هز راسه ذيب : صح
صقر : طيب ليه ما يزوجونها واحد من عيال الديره عشان تجلس عند امها واخوها ومحد يقدر ياخذها
رفع حواجبه ذيب يناظره وابتسم نص ابتسامه : واحد من العيال بس تحديداً صقر
ابتسم صقر يصد وسكت يناظر النار وتكلم ذيب : لاتجيني من وراء التريلات ادخل فالموضوع
صقر : ياخي وش اسوي قلت ابشوف من يناسبها من العيال ومن تقول
ذيب مسك الكاسة : تبي ارنك ابها اهرج
صقر تربع يناظره وتكلم يقوله سالفتة وقت دخل المطبخ عشان ياخذ عشاهم وخلص ورفع حواجبه ذيب : اثريك يوم ماتعشيت شايف لك شوفه
رفع كتوفه صقر يناظره : عيوني انا مالي شغل
ضحك ذيب يناظره : بس تدري ماتوقعتك خفيف كذا
صقر ناظره بصدمه وتكلم : ماني خفيف وش هالكلام يعني ماتعرفني انت
ذيب : الا والله اعرفك وحافظك بس صدمتني
مد يده صقر ياخذ الكاسه بعد ماصب و يشرب شاهي
وتكلم : الله يسامحك ي عقاب سكرت الباب وماعاد جتنا مطبقيه
ابتسم ذيب : عاد تدري اليوم جابت قرصان على كيف كيفك
تنهد صقر يناظره وتكلم : بقي منها شي ؟
ضحك ذيب يضرب فخذه وتكلم : لا والله مابقي بس ابشر مره ثانيه اذا جابت ارسلك منها
سكت صقر يشرب وكمل ذيب : ولا اقول ابرسها هي الي تجيبه الك بس خلك عند الباب
صقر ابتسم يناظره : لا تفشلني معها
هز راسه ذيب ورفع راسه يناظر السماء والنجوم
وفز من صرخ صقر : لايكون هي الي بيزوجكيها جدك
سكت ذيب يناظره ويفكر وميل شفايفه : ماتوقع هي
صقر : من جدك توقع الي ماينتوقع
ذيب بابتسامه : اذا هي عاجبتك نفس ماتقول بتعجبني انا بعد
ناظره صقر بصدمه وضحك ذيب : استهبل لو هي صدق بوقف بوجة عشانك واحطك بدالي
ارتاح صقر وتكلم : اشوا بس للحين ماندري من هذيك الله يستر لاتكون هي بنهبل واثور في جدك
ذيب : معليك بثور فيه قبلك المهم شفت ابو جلال اليوم
هز راسه صقر : بيثور في النمر بس وقفو له
ذيب رفع حواجبه : بس ماقتنعت فيه
صقر : وقفت قدامه وقالت مالك حق تذبحه هاذا ملكي اكيد الها
ذيب : بس مايخافون منه
صقر هز راسه : متعودين عيال النعمه كذا مايخافون
ذيب سكت يفكر وتكلم صقر : والله ياختي هاذي عليها جرائه ماشاءالله ترد عليهم ولا همها
ذيب : ماعاشرتهم نفسنا
هز راسه صقر يتكي وتعدل ذيب ينسدح ويحط راسه على رجول صقر ويناظر السماء
...........................................
طلعت تناظرهم فالمجلس وتكلمت : بروح دقايق واجي
عذبه : وين تروحين ؟
نجود : قريب مارح اطول
هزت راسها عذبه ورجعو يكملون فطورهم وطلعت نجود وناظرت صحبتها واشرت لها
فهمت عليها وهزت راسها تمشي معها بسيارتها
تقدمت تطق الباب ثواني وفتحت ريم ناظرتها نجود بابتسامه: سلام عليكم
هزت راسها ريم ترد وتكلمت نجود : جيت بوقت غلط ؟
هزت راسها ريم : لا حياك
تقدمت نجود تدخل وناظرت الجازي وضاحي وسلمت عليهم وردو ورفع يدينه ضاحي يحرك عجلات كرسيه يدخل وتكلمت نجود : دقيقه صحبتي برا ومعاها ممرضين بيجو عشان يشوفون وضعك
لف يناظرها ضاحي وناظر ريم وامه وهزت راسها نجود : دقيقه بس اناديهم
لفت تطلع وبعد ثواني دخلت ودخلو معها بعد السلام تقدمو الممرضين عند ضاحي يسئلونه كم سؤال ولفو يناظرون نجود وتكلم ممرض: ضروري يروح معنا للمستشفى عشان الاشاعه
لفت نجود تناظر ريم والجازي الي يناظرونها وتكلمت ريم : طيب نروح معكم
نجود : ارتاحو هنا انا بروح معهم واقولكم عن كل الي يصير
هزو روسهم ريم والجازي ولفو يناظرون ضاحي وتكلمت نجود : روحو للمستشفى وبجيكم
هزو روسهم وتقدم الممرض يدف كرسي ضاحي ويطلع فيه للأسعاف
وطلعت بعدهم نجود ناظرت شياب وشباب الديره واقفين عند الاسعاف وتكلم ابو ظافر : عسى ماشر وشفيهم مطلعينه
نجود : مافيه شي
تقدمت نجود تركض لبيت قايد ودخلت تناظرهم مكانهم وتكلمت : بتطولون هنا ؟
مشاري هز راسه : بنرجع العصر
نجود : تمام انا بروح للمستشفى ضروري
هزو روسهم وتكلم مصعب : مو معك اجازه ؟
التشبيهات في الانستاء ( rxoa.19)
