مر الوقت وهم من جلسه ل جلسه وسوالف وضحك
الين فتح المايك الامام ورفع صوته : صلاة القيام اثابكم الله
وقامو توضو وسيده على المسجد
وبما ان الحريم جهز عشاهم راحو يصلون وتركو البنات ينتبهون للعشاء
دخلت البيت وكان هادي ورفعت صوتها تدخل : ياهل البيت فيه احد
شادن بفرح : ياهلا حياتس البيت بيتس
طلعت لها شادن تحضنها وسلمت عليها سلمى وهي عاقده حواجبها من ثقل بطنها : الله يبقيتس ويعافيتس وين امي والباقين
ترف وهي طالعه : راحو يصلون محد فيه غير جدتي خالتي جهير قاعدين في الحوش
لفو من دخلت العنود تسلم على سلمى وعقدت حواجبها تناظرها : شفيك
سلمى وقفت وهي ماسكه ظهرها : ظهري ذبحني
سكتت العنود بخوف تناظرها وتكلمت شادن : اجلسي طيب لاتقومين
سلمى هزت راسها تمشي وطلعت تسلم على جدتها وجهير ورفعت صوتها تناظر البيت : شادن جيبي لي كرسي
طلعت شادن بالكرسي وتكلمت جهير : الله يسهل عليك
همست سلمى تجلس : امين
وقفو عند الباب يناظرونها وتكلمت العنود بتوتر : وجهها قالب من الالم
ترف : عندها موعد اليوم وراحت ومدري وش قالو لها
شادن : امشن بس وسوستن
بلعت ريقها العنود تجلس وترف وشادن رجعو للمطبخ
لفت من طلعو حفيدات جهير وتقدمت نوف تجلس معها وابتسمت العنود تتذكر اتصال سميره ولفت من تكلمت نوف : كيفك
هزت راسها العنود : بخير وانتي
هزت راسها نوف : الحمدالله يوم عرفت انك بنت عمي
ابتسمت العنود بهدواء وتكلمت نوف بحذر : ابشرك سميره تطحن ماتدري عنك وانا كلمت جدي مايقولها وصرفناها ماتجي
ضحكت نوف وتكلمت العنود : ولو عرفت خل تطحن اكثر ماهمتني
هزت راسها نوف : شخبار نجود وجمان ؟
العنود : الحمدالله
نوف بهدواء : يجونك ؟
هزت راسها العنود : اي اشوفهم بين فتره وفتره
ابتسمت نوف تناظرها ثواني وسكتت العنود تصد
صدت نوف تفكر وهي ملاحضه فيها شي متغير بس وشو ماتدري وخايفه تدقق اكثر وتنفر منها العنود لانها تعرف ان العنود ماتحب هالحركات وتستفزها
لفو من سمعو صوت الرجال والحريم وعرفو انهم خلصو صلاه وجا وقت العشاء ودخلو الحريم كلهم والرجال في مجلس الرجال مجتمعين وشادن وترف يدورون بالقهوه ودله رايحه للرجال ودله جايه واذا جت قالو جددوها ولا دفوها والبنات متنرفزين من هالحركه وان القهوه جديده ليه يجددونها وهي حاره ليه يدفونها وكانت هالحركه تصير في كل مناسبه وعزيمه ويكرهونها ( وانا ماسلمت منها 😂 تصير معكم ولا بس حنا ؟ )
تأففت تسمع صالح ينادي وطلعت : نعم
صالح : الله ينعم عليتس اخذي دفيها
شادن بعصبيه : وغير الدله تو راحت مسرع تبرد
صالح بعجله : اخلصي الرجال يحترون
شادن تخصرت : تعبت منكم عندك اغراض القهوه والنار دفها وسولهم قهوه
صالح : اعجلي
جت شيخه على صوت شادن : علامكم ؟
شادن : يمه تكفين شوفي القهوه حاره ويقول دفيها
شيخه : عادي اخذيها دفيها وعطيهم ومالتس الى الاجر
صالح : وامي صادزه
تأففت شادن تاخذ الدله من يده ودخلت تدفيها
نزلتها على النار وجلست تريح وتهف بطرحتها من الحر وكيف ان المطبخ فيه قدرين ظيف واحد للرز والثاني للحم والمطبخ مكتوم وحار
تأففت عاليه تحاول تشغل المروحه عشان تبرد عليهم وذي المره الرابعه الي تحاول فيها ومافيه نتيجه ولفت عليها شادن : يبنت انطقي خربانه ماتشتغل
عاليه طلعت : مقدر اتحمل
فزت شادن من انكبت القهوه وتأففت تاخذها وتزيدها وترجعها للرجال
وطلعت تجلس في الحوش معهم وتريح
ثواني ورفع صوته نياف : يولد جيبو العشاء
مسكت راسها شادن وتكلمت شيخه : ارتاحي ابروح اشوفه
هزت راسها شادن وقامو ترف وعاليه وساره يجهزون العشاء
ودخلو نياف وصقر وذيب وصالح ياخذون الاغراض يودونها ومن بعده الصحون وكانت اربع صحون
ورفع صوته حاكم : اقلطو على عشاكم
هزو روسهم يقومون يتعشون
وعند الحريم بالمثل
