ابتسم يبوس راسها : ولا منتس
تنهد يحضنها واخذت نفس تطفي جوالها ونامت وماطول ذيب ونام بعدها
برا كانو بنفس جلستهم الي ينتظرون رد والي يسولفون والي يدعي ل سلمى ومرت ساعات ماحسو بالوقت ولفو من اتصال وشهقت شادن تشوفه رقم امها : امي الي تدق
اخذته ساره بسرعه وردت : هاه بشوي
شيخه بفرح : ابشرتس ي ساره ولدت جابت بنت
تنهدت ساره وتكلمت : الله يبشرتس بالجنه وينها الحين ؟
شيخه : داخل طلعت وخليتها ترتاح
ساره هزت راسها : جايين
شيخه : لا خلوكم بكره تعالو هي تعبانه الحين بكره يمدي تروق
هزت راسها ساره : ه مع السلامه
سكرت تناظرهم يناظرونها وتكلمت : ولدت جابت بنت ابتسمو الكل بفرح وفزت شادن تحضن صالح : صرنا خوال
ابتسم صالح يحضنها ورفع صوته ذياب : مبروك الحفيده ي ساره ويا حاكم
هزو روسهم بابتسامه يردون : الله يبارك فيك
ساره دخلت تبشر امها وفزت شادن من تذكرت : بروح ابشر ذيب
ضحك حاكم يهز راسه : روحي وعقبال نفرح فيه
هزت راسها شادن تروح وتكلم ذياب : ماشاءالله اجل ذيب امتزوج ؟
هز راسه حاكم : اي والله اخذن العنود بنت قايد
هز راسه ذياب يهمس : ماشاءالله
وسكتت نوف تناظرهم بصدمه من زواج العنود الي تو تعرف عنه وتأكدت ليش خافت لانها حامل
سكتت تناظر الباقين بصدمه وسكتت
طقت الباب تنتظر رد ثواني وطلع ذيب وهو يفرك عيونه : وراتس ؟
شادن ضربت كتفه : صحصح وعلمني وش البشاره عشان ابشرك
ذيب تكى : اخلصي وش عندتس ؟
شادن بقل صبر : سلمى ولدت وجابت البنت
فتح عيونه ذيب يناظرها وضحكت شادن تحضنه : صرنا خوال لاول مره
ذيب : في ذمتس
هزت راسها شادن : والله
لفت ترجع للباقين
ولف ذيب يدخل الغرفه : سلمى ولدت
ابتسمت العنود تناظره : جابت بنت
هز راسه ذيب يطفي النور : فرحانين برا ماتسمعين الصياح
هزت راسها العنود براحه ورجعت تتمدد وترجع لنومتها
وذيب معها بتعب
........................................
وطبعاً مرت ثلاث شهور ونص من بعد عيدهم مع ذياب واهله وبنت سلمى الي سموها ( لمى ) وصار عيدهم عيدين وفرحانين فيها ورجعت سلمى تقضي نفاسها عند اهلها وهادي يجي بين فتره وفتره وحريم داخلين يقهوون ويباركون واهل ذياب بعد عودتهم باسبوع رجعو لديره بهديه ل سلمى وبعد ماسوو الواجب رجعو لبيوتهم بس مانقطع التواصل بينهم
والعنود الي وضح بطنها اكثر وصارت في الشهر الثالث وكانت فرحانه في بنت سلمى وتلعبها وتدعي ربي يرزقها ببنت
وريم الي بعد العيد عرفت انها حامل وكانو الكل فرحانين ان الاخبار الزينه تجيهم بين فتره وفتره والافراح كثرت عندهم وزواج طافر وامنه تم وفرحو فيهم وعيال الديره ماكانو يخلون حركاتهم وصارو يقولون ل ظافر كيف كان وانه قال لو تصير احسن حريم الديره ماخذها
وظافر كان يقول لهم : الحياه قسمة ونصيب
وكان مرتاح معها وهو ماكان متوقع بتكون كذا لانه للحين يحس في امنه انها العصبيه والدفشه الي قبل بس تغيرت وكثير
واليوم يكون يوم الجده سلمى لانها خلصت الحداد والكل يحتفل وفرحان لها ومدلعينها وصارت تقدر تطلع وتروح وتجي
كانت جالسه وبيدينها حنا ولفت من تكلمت سلمى الي جايبه الميك اب : عروس اليوم بنزوجتس
الجده سلمى ضحكت : ماطمعت افتك من جدتس تاتجيبين الثاني
ناظروها بذهول وضحكو وتكلم صقر : افا علامتس قلبتي عليه ؟
الجده سلمى رفعت يدينها بعدم اهتمام وضحكت وضحكو بعدها وتكلم حاكم : تحتري موته من سنين شكل
ضحكو من كلمته وتكلم حاكم الكبير بعصبيه : وش هالكلام ؟
حاكم فز يبوس راس جده : اسف معاد اعودها
الجده سلمى : خله يمزح عادي
جلس حاكم وتكلم هادي بضحكه : يجده خوفي سميتس تصير نفستس وماتفقدني اذا مت
لفت عليه سلمى وتكلمت الجده سلمى : ان مت انت فيه غيرك تبيها تكب حياتها عشانك
فتح عيونه هادي بصدمه وطاحو يضحكون الباقين وتكلم ذيب يناظر جدته : اهااا اجل فيه غير جدنا يجده ؟
الجده سلمى اشرت لهم بيدها ولفت على العنود : يامي وشنهي كلمتس امس ؟
ابتسمت العنود لان جدتها قالت خليتس فطينه واذا سئلتس قوليها : الملاك صعب الامتلاك
هزت راسها الجده سلمى تناظرهم : هذي هي
ضربو فخوذهم يضحكون وتكلم سيف : بس جدي ملكتس ؟
ناظرته الجده سلمى بنص عين : بس توني لهالحين شباب ماخرفت ومت معه
العنود وهي تفتح الكيس الي على يدينها : بسم الله عليك توك شباب اصلن بعيده عنك التخريفه
ابتسمت الجده سلمى تغسل يدينها عن الحنا وبعد ثواني رفعتها وتقدمت العنود تلفها وتمسحها ولفت تفتح الشنطه الصغيره وتطلع منها مناكير وكريم واخذت تمسح يدينها بالكريم وناظرت الجده سلمى تطلع كم لون : ايت تبين ؟
الجده سلمى بتفكير : كلها زينه بس ليه ؟
العنود ناظرتها : بزين يدينك بها
الجده سلمى هزت راسها : حطي الي تبين
سكتت العنود تناظر الالون ولفت من تكلم سيف : حطي الاحمر
ميلت شفايفها تناظره ثواني وضحك فارس : حطي احمر يمكن يشوفها عود يخطبها
ضحكت تشوف نظرت جدتها الي قالت : بعيده عن شواربه
ضحكو وتكلم قايد بضحكه : مابعد عقاب احد
هزت راسها الجده سلمى وطلعت الاحمر العنود بعد ماجربته على لونها وكان زين واخذت يدها تحط لها
دقايق وخلصت ترجع الاغراض مكانها وجلست ولفت من تكلمت شادن وهي شايله لمى الي تصيح : العنود ماعندتس شغل اخذيها عني
هزت راسها العنود تاخذها وابتسمت تلعبها وسكتت لمى وتكلمت العنود بطفوليه وهي ماسكه يدها تحركها : وسو ليه تسيحين
حركت يدها يمين يسار وضحكت لمى وابتسمت العنود تبوسها من حلاتها وكياتتها وجلسو نوره وسحاب عند العنود بابتسامه يشوفونها تلعبها وتكلمت نوره : ابي العبها
هزت راسها العنود تعلمها وتكلمت : شوي شوي لاتشدين
هزت راسها نوره تلعبها وابتسمت لمى ترفع يدينها وتحركها
وضحكو يشوفونها ممستانسه سكتت العنود تحاوط لمى وتنيمها وهي تغني لها وتكلمت سلمى : لاترقدينها تشغلني شوي
العنود بحزن تناظر لمى : حرام عليك بتنام مانامت من وقت
سلمى : خوفي ماترقد عني الليل وتزعجني
العنود هزت راسها : معليك اخذها عنك وتنامين
ميلت شفايفها سلمى : مني بصابره عليها اعرفها
هزت راسها العنود بالنفي تشوف لمى الي نامت وسكتت تمسح راسها بهدواء وتدخل في افكارها وهي مبتسمه
