سكت يشغل السياره ويمشي ثواني ولف عليها من ماتحركت : منتي تقولين نفستس فيه اشوف ماتحركتي
ناظرت كوبها وبلعت ريقها من كمل : اكشفي محد يمتس والسياره مضلله
لفت عليه وهمست : محد يمي من اول
سكت يناظر الطريق وياخذ نفس ولف يفتح الدريشه من حس بكتمه وضرب بالمطب بدون قصد
فزت من ارتفعت السياره وانكب من كوبها وتكلمت بألم : احح حرقني
لف يوقف على جنب وتكلم : مانتبهت للمطب جاتس شي ؟
العنود وعيونها مليانه دموع من الم الحرق نزلت الكاس مكانه والحلا على جنب ورفعت يدينها ترفع الغطا عن وجهها وبعدت عباتها عن فخذها
ناظر وجهها ودموعها ورفع راسه يناظر حولينه وكان جنبهم محطه نزل يركض لها يجيب مويه
لفت من نزل وناظرته رايح وتأففت تفتح عباتها وتمسحها
ورفعت طرف فستانها تشوف مكان الحرق وتنفخ عليه بعيون مليانه دموع
رفعت راسها من انفتح بابها وناظرت ذيب الي يناظرها بخوف
فتح علبة المويه وناظرها تسكر عباتها وتصد عنه
وتقدم يبعد يدها : اشوف الحرق
العنود بتوتر هزت راسها : مو لازم واصلن خفيف
ذيب بهدواء: لاتعاندين واسمعي الكلام
سكتت العنود تناظره ورجع يعيد ذيب : وريني
بلعت ريقها بتوتر ترفع عن الحرق وناظر ذيب الحرق وكان فوق ركبتها وقدم يده بمنديل فيه مويه
ورفع نظره من صدت العنود بألم ورجع يحط مويه ويطبطب عليه بخفيف
وبعد ثواني بعد يعطيها المويه من حس بنفسه توتر ورجع قلبه يدق بسرعه وتكلم : دقايق واجي
لفت تناظره وسكر الباب يرجع للمحطه ويده على قلبه
اخذ نفس يلف يناظر السياره وناظرها تناظره وصد يدخل البقاله
ناظرت الحرق ورجعت فستانها وسكرت عباتها تحاول تهدي نفسها قبل يجي
ناظرت قهوتها وكان باقي فيها وسكتت ثواني تناظرها
ومدت يدها تاخذها تشرب منها
فتح الباب يركب وتقدم يحط الاكياس عند رجول العنود ( في الوانيت مافيه مرتبه بالخلف )
بعد يشغل وناظرها تناظر الفراغ وتنهد يكمل طريقه للديره
دخل يناظرهم مجتمعين على القهوه وسلم يجلس
لفو عليه وردو السلام بدون نفس وتكلم حاكم : وينك الايام الي راحت ماتنشاف
لفو عليه وتكلم سطام : ام حاكم تعبانه وماقدرت اخلي الورعان الحالهم
لفو بفرح وشوق من دخلو حاكم الصغير ونوره وسحاب بفرح ونزلو شناطهم وركضو يسلمون عليهم والجده سلمى وشيخه والباقين يرحبون فيهم متجاهلين نظرات سطام
جلسو بابتسامه ومسحت شيخه على ظهر سحاب الي جلست جنبها وتكلم حاكم الصغير بفرح : وش العلوم ؟
حاكم بضحكه : كبرت صرت تسئل عن العلوم
ضحك حاكم الصغير وابتسمو يناظرونه وتكلمت نوره بطفوله : جده
شيخه بابتسامه : سمي
نوره ابتسمت تناظر سحاب وضحكت شيخه تمد يدينها : تعالي عندي
فزت نوره تجلس في حضن شيخه وضحكو يناظرونها وتكلم صالح : خير انتي وياها تسابقون على امي
ناظروه وتكلمت شادن : جن سحاب ونوره اترك نفسك على جنب
شيخه وهي تعدل شعر نوره : انتم كبرتم لمتى وانا ابدلع فيكم
تقدم صالح يقوم نوره وحضن شيخه يضحك : امي هاذي روحي لامتس
نوره هزت راسها تضحك : امي وجهها منتفخ ويروعني مابيها
فتحو عيونهم بذهول يناظرونها وناظرو سطام الي مسح وجهة وتكلمت الجده سلمى : بنتك وش تقول ؟
سطام : جتها حسسيه مدري من وش وتنفخ وجهها عشان كذا ماجيت الايام الي راحت
زينب : وراها
رفع كتوفه سطام وتكلم عقاب : وينها ماجت ؟
سطام : عند اهلها وتاتعالج وجهها وجيت بالورعان خفنا تعدينا
سكتو يناظرونهم ثواني وتقدمت نوره تبعد صالح الي جلسها يضحكها ويلعبها وسحاب عند شادن
دقايق ودخلو ذيب والعنود ناظروهم وفزو حاكم وسحاب ونوره يسلمون
جلس على ركبه بفرح وسلم عليهم وحضن سحاب ونوره وتكلم : ياهلا ومرحبا
سحاب : وينك توك تجي ؟
ذيب فتح الكيس الي جنبه يطلع بسكيت وعصيرات : رحت للسوق
وزع عليهم ولف من تكلم حاكم : عمي عادي اسلم على مرتك
ناظرو العنود الي تناظرهم بابتسامه وتكلم صقر : لا مهب عادي عيب انت رجال لاتسلم على اختي
ذيب بابتسامه : يرجال سلم توك اصغير
حاكم بصدمه : افاااا
ضحكو يناظرونه وتكلمت سحاب : يمكن عمتي ماتسلم
ناظرتهم العنود بابتسامه وذهول وهزت راسها
وتقدمو سحاب ونوره يسلمون على العنود وناظرت حاكم الي يناظرهم ومدت يدها تصافحه وحاكم بالمثل
وتكلمت نوره : يعني انتي حرمة عمي وتصيرين عمتي سحاب : نفس عمه اريج وفنفس الوقت خالتي
هزت راسها نوره وتقدم ذيب يسلم على سطام وجلس وتقدمو يجلسون من نادتهم شيخه
وجلست العنود جنب شادن تناظرهم بصمت
ناظرو عقاب من وقف يطلع وقايد وحاكم معه وجلسو الباقين
لفو من تكلمت نوره الي جالسه بحضن ذيب ويلعبها : قلت لابوي يوديني البل وعيا ودني انت
ذيب سكت ثواني يناظرها ورفع اصبعه على خشمه بابتسامه : على ذا الخشم ابشري
ابتسمت نوره وتكلم سطام : لا مافيه لاتوديها
لف عليه ذيب باستغراب : وليه ؟
سطام بعصبيه ناظر نوره : صايره تعاند ولسانها طولان
نوره انخرشت وتكلم ذيب : هونك على البنت ارتاعت
سطام بعصبيه : مافيه روحه
شيخه : وراك عصبت البنت انخرشت
ناظرو نوره الي تمسكت في ذيب وبكت بخوف
وتكلمت شادن بعصبيه : ه والله لتروح للبل وانت ماتشوف الدرب
اخذ نفس سطام يناظر نوره الي تبكي وذيب يهديها وتكلمت شيخه : انت ترد عقلك لورع خلها وتاتعقل
سطام سكت يقوم ويطلع وتكلم صالح بعصبيه : امي تهرجك ياحمار
راح سطام وتكلمت شيخه ل صالح : خله
سكت صالح وناظرو حاكم الي تكلم بحزن : من ايام وهو كذا ويحارشنا عشان نعصب واذا عصبنا وردينا ضربنا
مسحت على ظهره شيخه تحضنه وتكلمت نوره بصوت باكي : مابي اروح معهم ابي اجلس هنا
هز راسه ذيب يحضنها : محد ماخذكم
وناظرها بابتسامه : نروح للبل
هزت راسها تبتسم ووقف ذيب شايل نوره وناظر حاكم وسحاب : تجون معنا
هزو روسهم يوقفون وتكلم صقر : نجي معكم حنا بعد
ذيب هز راسه : وش رايك
وقفو صقر وصالح وسيف يطلعون معهم
وتكلم ناصر : وحنا ماذكرونا ولا يبونا نجي
الجده سلمى بنظره : عدل اطباعك ويذكرونك
زينب : انتم وراكم على عيالي
ناظروها وسكتو يتركونها وتكلم راكان ل العنود : رحتي
ناظرته العنود وسكتت وتكلم ناصر : نفس رجلها بالاطباع...
سكت من تنحنح ذيب ولفو عليه وكان واقف يناظر ناصر وتجاهله ذيب يتقدم عند العنود
هزت راسها ب وش من وقف عندها وطلع بطاقتها يمدها لها
ورفعت يدها تاخذها ولف يطلع فتحت شنطتها تحطها ووقفت ناظروها و تكلمت الجده سلمى: تقهوي
هزت راسها تناظرهم وطلعت لغرفتهم
فتحت الباب تدخل وناظرت الاكياس الي موجوده واستغربت تتركها وتنزل عباتها
جلست ترفع عن الحرق ونفخت عليها تحط كريم عشان يخف
