سكر يناظر العنود : صالح خطب دلال
رفعت حواجبها العنود : ماشاءالله الله يوفقهم
ذيب هز راسه : امين ماجاتس عن ضاحي ونجود
هزت راسها العنود بالنفي وناظرت جوالها من رن وضحكت : توه يجيني
اخذته ترد وبعدت الجوال من صرخت نجود : امي وافقت ينودي امي وافقت
ضحكت العنود ترفع راسها : على البركه يروحي
نجود : ابي اصارخ بس امي قالت عنب انجنيت ومابيها تصدق الكلمه
العنود : افرحي ماحددتو متى كتب الكتاب ؟
نجود : لا بس بكرا بنروح لكتب كتاب ود وبشوف ضاحي وناسه
العنود : صالح ودلال كتب كتابهم بكرا بعد
نجود عضت شفتها : بخلي كتب كتابي معهم
ضحكت العنود : نجود تو ادري انك خفيفه
نجود : مو مني ينودي من الي احس فيه قلبي يدق بقوه
العنود : حبيبتي الله يهنيكم
نجود : بروح اجهز اغراضي عشان بكرا
هزت راسها العنود : باي
سكرت تناظر ذيب : وافقو على ضاحي
ابتسم بوسع ذيب : ماشاءالله الله يزيد الافراح
هزت راسها العنود : امين
لفت تسمع صياح دلع وتكلمت بطفوله : لا يماما لا
شالتها تلعبها وتكلم ذيب : العمال دقو علي جايين
هزت راسها العنود وطلع ذيب للعمال الي جايبين كنبات الصاله والفرش والستاير وركبوها
.....................................
كتب كتاب
( نياف & ود ) و ( صالح & دلال )
صحو الكل من بدري يجهزون ويرتبون ويبخرون ودلال القهاوي وبراريد الشاي جهزت والضيوف وصلو والكل شايل اليوم والعاروسات جهزو والمعاريس بين الرجال ينتظرون المملك يوصل ويتم كتب الكتاب وهاليوم غير عند ذياب وعياله لان احفاد عقاب الي متزهلين بكل شي ورافضين القهوجيين يدورون بالقهاوي وكانو ماسكينها وهم بانفسهم الي يقهوون ويضيفون ويرحبون وكان ذياب مذهول من تصرفاتهم حتى وهو قال ارتاحو رفضو يرتاحون وكانت كلمة ذيب له : يوم اخوي وولد عمي والله ماجلس واسفط يديني
وكان حاكم جالس مكانه وياظر ذيب بابتسامه فخور فيه رافع راسه قدام الناس ويتباها به يعرف انه تحمل وصارت سوالف كثار بس ماشي مع الحياه ولا اهتم لاكبر كلمه ولا لاصغر شنب يقابله
يعرف ان الايام الي قضاها وذيب بعيد عنه وكل شي صار فيها كان فاقده ويبيه موجود ويحل القصه بس مايبي يعكر مزاجه وفرحته وسفرته مايبيه يرجع مشوار طويل عشان سالفه يومين وتخلص يبيه يعيش حياته الي حلم فيها وقاعده تتحقق
تنهد يشوفه يضحك مع صقر ووقف بهدواء يتقدم عنه
ولف عليه ذيب بسرعه : سم يبه ؟
ابتسم حاكم يناظر ضحكته ورفع يدينه يمسك راسه بيبوسه وبعد ذيب بسرعه ورفع نفسه يبوس راس ابوه : والله ماتحب راسي واني انا الي احب راسك
اخذ نفس حاكم يناظره وهز راسه : يعلم الله انك كبرت في عيني وان حبك زاد عن حب اخوانك كلهم
ابتسم ذيب يبوس راسه : الله يعافيك ويطول بعمرك ويخليك لنا ذخر
هز راسه حاكم بهدواء يشوف المملك وصل وتقدم يجلس مكانه وابتسم ذيب ياخذ الدله ويتقدم يقهوي المملك ويدرو عليهم من جديد ورجع الدله مكانها يشوف المملك بدا مراسم كتب الكتاب وابتسم يناظر صالح الي مبتسم ويناظره ورفع يده صالح يهزها وضحك ذيب : قدها وانا اخوك
ابتسم صالح يناظر المملك بدا بنياف وباتل
