ابتسم من عرف ان ساره وبناتها بيجلسون عنهم اليوم وسكت يناظر دلال تتكلم وتضحك : تخيل حصلنا محل اساور يجنن واخذت اسواره ونقصت فلوسي رجعت للبنات تسلفت من كل وحده ريالين
اصيل رفع حواجبه : كان اخذتي مني
دلال : كنت بجيك بس ترف قالت فشله دافع حساب القهوه لاتثقلون عليه ويعصب معاد يطلعنا
عض شفته يناظرها وهز راسه : والله قالته ؟
هزت راسها دلال وكملت : فيه اسواره عجبتني بروح بكرا اخذها للعنود وثانيه نفسها ل دلع هديه
هز راسه اصيل : بكرا تروحين وتاخذين لكل البنات منه وانا ابدفع بس لحد يدري اسكتي
ابتسمت دلال بوناسه وهزت راسها تأشر على عيونها وقامت : بروح للبنات عند ريم
اصيل رفع اصبعه بتهديد : والله لو احد يدري ماتروحين واسوارتك بقطعها فوق ظهرك
ضحكت دلال : والله محد يعرف
هز راسه اصيل بابتسامه وطلعت دلال الي من وناستها طبت تجلس بين البنات وتكلمت رحاب تضربها : الله ياخذك رجلي كسرتيها
دلال بعدت عن رجلها : معليك ماتنكسر مني
ترف ضحكت : ماظن دلال ثقيله
دلال هزت راسها : وزني ٥٣ مو ثقيله
شادن : وش تقولين عن ٦٥
دلال بذهول : من جدك
هزت راسها شادن وتكلمت دلال : حلو مو مره دبيه
ود : احلى شي كلنا من خمسين وستين مافيه الي من ثمانين وزود
ريم رفعت يدها : انا ٩٠
نوف ضحكت : حبي انتي حاسبه وزنك مع وزن الي ببطنك
ضحكت ريم تمسك بطنها وتكلمت : اصبرن لين اولد وتشوفن الجسم الصح
شادن : يوه ريم جسمها يهبل بس الحمل خرب عليها
ريم هزت راسها وتكلمت ترف : الله يعينك ويقومك بالسلامه
لفو من طلع اصيل الي يغني وسبحته بيده وتكلمت رحاب : يزين الي مروق يناس
لف عليهم اصيل ودلال رفعت اصبعها : عفواً اصيل محد يتغزل فيه غيري
رحاب ناظرت اصيل الي تكى بيدينه على الكرسي يناظرهم : يالبيه يالزين عيني عليك بارده
دلال ضربتها : اسكتي ماعجبه مدحك
ولفت تناظره : وين رايح ياحلو ؟
اصيل : وش تبين يقمر
رحاب شهقت : خييير مدحتك قبلها مادلعتني
اصيل : بدينا سمي يارحاب
رحاب هزت راسها : مابي ذي قول ياحلوه
اصيل رفع حواجبه يلف وتكلمت رحاب بصراخ : خلاص خلاص مقبوله
لف اصيل يرجع مكانه وتكلم : وش تبون ؟
دلال شبكت يدينها بغيض ل رحاب : شوف يروحي انت نبي عشى جوعانين
ناظرتها رحاب بنص عين وتكلم اصيل يميل شفايفه : وش تبون تتعشون ؟
دلال : الي تبي ؟
هز راسه اصيل ينقل نظره ل ترف واشر على عيونه : تامرون
ابتسمت دلال ترمي له بوسه وكشرت من جا صالح يناظر اصيل : العيال في المشب تاتجي ؟
هز راسه اصيل بالنفي : ابروح اجيب عشاء واجي تبون ؟
دلال بلقافه : لا مايبي وهو بدوي ماياكل اكل مطاعم
قلب عينه صالح وناظر اصيل وتكلم : ساكت ومتحمل
ضحك اصيل يضرب كتفه : الله يكون بعونك
مر من جنبه اصيل يطلع ولف صالح راجع ووقف من تكلمت عاليه : صالح قلهم يجيبون النار هنا برد
هز راسه صالح وناظر دلال وقلب عينه ولف رايح للعيال
ناظرت عاليه بقرف وتكلمت تقلدها : قلهم يجيبون النار هنا برد
عاليه بصدمه : انا كذا شكلي ؟
دلال هزت راسها : يروحي ماله داعي تتدلعين عنده
عاليه ضربها : يزفت ماتدلعت
دلال رجعت الضربه : الزفت انتي محد يمزح معك
ناظرو العيال من جو بالمنقل وبعدو شوي وحطوه في النص وجلس انس يفرك يده وجلسو الباقين
