ود ضحكت وناظرت فجر : فجور حياك على الفطور بكرا تجين انتي مايحتاج عزيمه
ناظروها البنات بصدمه وتقدمت فجر تحضن ود وتبوس خدها : والله انك كفو ولاتنسين صحن شكشوكه وصحن بيض عيون
هزت راسها ود وبعدت فجر تناظر البنات بأنتصار ومشت طالعه مع ليان وسلاف و وجد
وتكلمت رحاب تضرب ود : يالكريمه ماعرفناك
ود مسحت مكان الضربه : خلاص جسمي ورم من ضربكم
جيهان : اسكتي ترا كله على عيون بعض الناس
رفعت حواجبها ود تعرف تفكيرهم ووقفت تأشر على جيهان ورحاب : مو معزومين على فطور بكرا
مشت من عندهم داخله وضحكو البنات يناظرون ملامح نياف الي مبتسم وتكلمت دلال : شوي شوي شفيكم عليهم
جيهان وقفت : تكفون مقدر ابدا يومي مافطرت
دلال ضحكت بذهول : دايم ماتفطرين شمعنى اليوم
شادن ضحكت : عشانه بمطعم
هزت راسها دلال تضحك ووقفت رحاب تدخل وراء جيهان
عقدت حواجبها تجلس ولفت تاخذ دلع الي تصيح وحضنتها تهديها وناظرت سرير راشد واستغربت عدم وجوده ولفت تناظر مكان ذيب وماحصلتها ولفت من دخل ذيب الي حاضن راشد وناظرها جالسه : صباح الخير
العنود تعدلت : صباح النور
نزلت دلع تناظر ذيب : صحتني تصيح
هز راسه ذيب : انا صحاني راشد واخذته وطلعت خفت يزعجكم
العنود ضحكت بخفيف تمسح وجهها : الساعه كم ؟
ذيب جلس : ثمان
قامت تاخذ روبها و تدخل دورة المياه وجلس ذيب يلعب راشد ودلع
طلعت تجفف شعرها وناظرتهم مكانهم وفز ذيب : اما
ميلت شفايفها تناظره وتكلم ذيب : صقر جاله ولد
ابتسمت العنود بوسع : والله
هز راسه ذيب : والله مرسلي من البارح تو افتحها
العنود بفرحه : كيوت
ذيب ناظر دلع وراشد : وجالكم صديق
ابتسمت العنود تجلس ولفو عليها راشد ودلع وتكلمت بطفوله : نروح نشوف ولد خالو الجديد
ذيب هز راسه : نروح يالله اجهزي وبروح اجيب فطور واجي
العنود ناظرت الغرفه : البيت فاضي مافيه غير سريرنا والمرايه ذي وسراير راشد ودلع
ذيب هز راسه : بنكمل البيت وحنا رايحين دبي يمكن يعجبتس شي نجيبه
هزت راسها العنود تفتح شنط راشد ودلع وتجهزهم
خلصت منهم تحطهم في سرايرهم ومشت تفتح شنطتها وتاخذ لها جينز وتوب اسود تلبسهم وسفطت روبها ترجعه في الشنطه واخذت مشبك تجمع فيه نص شعرها الي لازال مبلول واخذت نفس طويل تناظر راشد ودلع واخذتهم نازله
ناظرت الصاله الكبيره والي يتوسطها فرشه صغيره ونزلت راشد ودلع تتمشى في البيت وفي الغرف وتفكر في الاثاث
دخلت المطبخ تشوف حجمه وكان كبير ولفت من دخل ذيب بيدينه اكياس الفطور وتكلمت بهدواء : نزل الفطور وتعال شوي
هز راسه ذيب يتقدم عندها وتكت ظهرها عالجدار تناظر وسع المطبخ : مره كبير
هز راسه ذيب وبمزح : هناك ابحط قدور وفرن عشان يوم تطبخين الضيف وهنا دلع تسوي القهاوي وانتي غدانا وعشانا
فتحت عيونها العنود تناظره وهزت راسها : اييه كمل وش بعد
ضحك ذيب يناظر ملامحها وكمل : وبس والله هذا الي عندي
العنود هزت راسها : ابشر انت بس تبي كذا
هز راسه ذيب : اييه وابي بعد ماتسوين الا كيك وحلويات الطبخ بعدين تعلمينه
تكتفت العنود : وش تبي انت الحين مافهمت
تقدم ذيب يحاصرها ع الجدار : الثانيه وكثري من كيكتس الي هاك اليوم
هزت راسها العنود : والضيف والقدور وش اسوي فيها لاني مارح اطبخها اصلن
هز راسه ذيب : انا داري منتي بطابخه فيها واصلن ماني مخليتس تطبخين بس ابشوف وش تقولين
العنود هزت راسها : المفروض يصير مشكله عند هالشي بس لان مالي خلق ومروقه مابي اخرب مزاجي في كم قدر
هز راسه ذيب يناظر المطبخ : وانا رايح مريت محل المطابخ وقالو بيجون ياخذون المقاسات وتعلمينهم كيف تبين
هزت راسها العنود تناظر المطبخ ومسك يدها ذيب : الفطور لايبرد
جلست تشوفه دلع وراشد نامو وتقدمت تغطيهم ولفت تفتح الفطور مع ذيب وجلسو يفطرون ويخططون كيف الاثاث
طلعن تشوفهم مجتمعين وناظرت البنات الي واقفين ينتظرونها وضحكت تشوف رحاب وجيهان جالسين : قومو قومو
فزو رحاب وجيهان وناظرت باتل : ممكن المفتاح
طلع مفتاحه باتل يرميه لها ورفعت يدينها ود تاخذه وتكلم نياف يناظر باتل : لايكون تاتسوق ؟
هز راسه باتل بابتسامه وعقد حواجبه نياف : صاحي انت
باتل : عادي وترا معها رخصه تعرف تسوق
فتح عيونه نياف بصدمه ولف يناظر ود : والله ماتسوق اوديهم انا اذا انت بايع اختك
ضحك باتل : مابعتها بس هي تعرف
هز راسه نياف بالنفي يقوم ورفع يده ياخذ مفتاح باتل من يد ود ومشى طالع على ضحك جهير ورهف
لفت تناظرهم يضحكون وتكلمت : مبسوطين انا ابي اسوق
رفع كتوفه باتل بقل حيله ومشت ود طالعه وراء نياف وطلعو البنات وتكلمت توقف قدام نياف : عطني المفتاح
هز راسه نياف بالنفي يناظرها وتكلمت ود : ليه طيب ؟
نياف هز راسه : مبيتس تسوقين تبين تروحين اوديتس انا تسوقين انتي لا
ود رفعت حواجبها وتخصرت : واذا سقت انا ؟
نياف : هذا اذا لقيتي مفتاح
مر من جنبها وفتح سيارته يركب وفتح الدولاب يخبي مفتاح باتل
تقدمو البنات وهم مبسوطين على حركات نياف وفتحو الباب يركبون وراء وتحاشرو وسكرو الباب وتأففت ود تشوفهم ينادونها ومشت تفتح الباب وبعدت من طاحت رحاب وناظرتهم متحاشرين وتكلمت دلال : اركبي قدام مافيه مكان لك
ود رفعت حواجبها : يربي وش هالصبح الزفت
جيهان بهمس : بنات اخاف تهون ماتفطرنا
شغل السياره نياف وهو يسمعهم ومبتسم لانها بتركب قدام وجنبه وتكلمت شادن : اركبي لايمشي
تأففت ود تضرب رجلها في الارض ومشت تفتح الباب وتركب قدام وتكتفت بعصبيه وتكلم نياف بهدواء : وين ؟
دلال : الموقع في جوال فجر برسل لها ترسلها
سكت نياف يحرك وفتح في شباكه شوي وشباك ود
وعضت شفتها ود بلعانه ومدت يدها تفتح الشباك كله وتكت بكتفها على الباب تناظر الشارع وتسمع ضحك البنات وراها
تقروشت من الهواء لانه يطير نقابها بس صامله تقهره نفس ماقهرها
لف عليها يشوف نقابها يتحرك من الهواء وعض شفته من بعد نقابها عن ثغرها وكانت عاضه شفتها وهمس بتنهيده : مو بصالحك
رفعت يدها تمسك نقابها لايتحرك وهي سمعت همسه بس تسوي نفسها ماتسمع ولفت من دخلت يد رحاب بينهم : هذا الموقع
عضت شفتها زياده ومدت يدها تاخذ جوال رحاب ترجعه لها وفتحت شنطتها : عندي الموقع
فتحت الموقع وتكلمت تناظر الطريق : اول لفه يمين
هز راسه يلف يمين وكبرت في الموقع تشوفه بعيد شوي ومدت الجوال له عشان يدل بنفسه
ورفع يده يمسك معصمها يعدله : خليه كذا عشان اشوف زين
وناظر الجوال : بعيد المطعم كان اخذتو قريب
حركت نظرها له وناظرت معصمها للحين ماسكه ورجعت تناظره وتكلمت : خط الجوال طيب
هز راسه نياف يناظر الطريق : خليتس ماسكته انا يدي مشغوله
رفعت حواجبها تشوفه متكي بيده الثانيه وماسك القير ويده الثانيه ماسك بها الديركسون وتنهدت تتكي بكوعها جنب كوعه وتناظر الطريق وهي ناسيه البنات وراهم ومو منتبه لنظراتهم لهم والنغزات
وكل تفكيرها كيف تاخذ المفتاح منه وتسوق
لفت من مسك يدها يبعدها شوي ورفع نظره للمرايه ورفع يدينه يعدل غترته ويلفها على راسه وابتسم بهدواء يلمح نظرتها له ونزل يده يناظر الطريق بدون مايناظرها
سكتت تتأمل ملامحه بهدواء وكيف زين غترته ثواني و رفعت يدها تعدل طرف غترته من طلع وابتسم يلف عليها
يناظر عيونها ونظراتها له والواضح انها سرحانه وتتأمل ملامحه وسكت ثواني يناظر عيونها من استقر نظرها فنظره
التشبيهات في الانستاء(rxoa.19)
