نزلتها العنود تقصصها وتوزع عليهم وبدت من يمينها وكان جالس ذيب
بدت تصب شادن قهوه وتوزع
وجلسو ياكلون ويتقهوون وتكلم صقر : صح ريم مسويتها
ابتسمو يناظرونه وهزت راسها العنود : لا انا
صقر : اهنيتس في خطبتي سوي نفسها كبيره
نياف ناظر العنود : ليتس ماعلمتيه يبى يغثتس
هزت راسها العنود تضحك وتكلمت شادن : سلمى وصقير استلموتس طلبات اخذي منهم فلوس وسوي
صقر : خلاص مبيتس تسوين
ضحكو يناظرونه وسكتو ثواني وتكلم صقر : وش رايكم بعد بكره
قايد بعصبيه : على وش مستعجل انت اخوك اكبر منك مازوجناه
ناظره صقر ولفو يناظرون نياف الي يتقهوى وتكلم قايد : امشي عليكم بالدور ماني مزوجك قبله
نياف ناظر ابوه : مابي اتزوج الحين
رزان بعصبيه : وليه وش ناقصك
نياف : يايمه مابي اتزوج الحين خلوني على راحتي
قايد ناظر صقر : هارقد لين يتزوج اخوك
سكت صقر يناظرهم بزعل وتكلمت الجده سلمى : بعد بكره جهز امورك نبى نروح نخطب ريم
ابتسم صقر يناظر جدته ولف يناظرها قايد : يمه مايصير
الجده سلمى بعصبيه : الا يصير هذاك انت متزوج ثنتين ومحد ردك تاترد ولدك الحين ؟
لفو من شرقت رزان بلقهوه وناظرتها الجده سلمى بقل حيله : خلاص كل ماجبنا طاري الثانيه شرقتي امسكي عمرتس
لفت رزان تناظر العنود الي متكيه وماعطتهم اهميه
وتكلم قايد : ابوي معيي يخطب قبل نياف
سكتو يناظرونه وتكلمت العنود بهدواء : وابوك كل شي يقوله سم وحاضر لو مره وحده ابيك تتكلم وماتجيب طاريه
قايد : ابوي لازم نرضيه
ميلت شفايفها العنود تناظره : حتى في الحرام راضيته وش بقى ؟
ناظروها بصدمه وعضت شفتها تناظرهم وتكلم قايد بعصبيه : خلاص
بلعت ريقها تناظرهم ولفت من تكلمت الجده سلمى : وش حرامه يالعنود اهرجي ؟
لفت تناظر قايد ولفو من تكلم عقاب : يالله اهرجي وقولي وش الي جيتي عشانه وصبرتي عشان تاخذينه
سكتت تناظرهم ولفت من مسك يدها ذيب يشد عليها وناظرت عيونه وعقدت حواجبها من فهمت رسالت ذيب لها ولفو من صرخت الجده سلمى : اهرجو
العنود بقل صبر وباعلى صوتها : ايي جيت عشان ارجع الفلوس الي سرقتها
شهقو الكل يناظرونها بصدمه وكملت العنود : وامي بين الحياه والموت
سكتت من تجمعت دموعها في عيونها واخذت نفس تناظرهم وكمل ذيب يقول السالفه كامله
وبعد ثواني سكتو بصدمه يناظرون عقاب وقايد ولفو يناظرون العنود ووقفت الجده سلمى تناظر عقاب : صح الهرج هذا
بلع ريقه عقاب يناظرها معصبه وهز راسه وصرخت الجده سلمى : سارق فلوس امها
هز راسه عقاب وصرخو من رفعت يدها الجده سلمى وصفقته كف
لفو يناظرونهم بصدمه وتكلمت الجده سلمى بعصبيه : وتكذب وتقول فلوسي يالنصاب وصلت فيك تسرق تسرق
سكت عقاب يناظرهم ولفت على قايد : وانت معه وساكت حتى بنتك ماعرفتها الا يوم جت
قايد : انا ماكنت ابسرق
العنود قاطعته : معي ايصال التحويل ومكتوب اسمك بالكامل
سكت يناظرها ولفت تناظر عقاب الي ماسك خده ووقفت تتقدم عنده : تذكر الكف الي جاني منك هذا هو جاك
لفت تدخل تاركتهم وصرخت الجده سلمى : اذلف عن وجهي ولاشوفك
صدت تهدي عصبيتها وتقدمو شيخه وشادن يمسكونها قبل تطيح ودخلوها ترتاح
وعقاب وقف يناظرهم يناظرونه وضرب بعصاته وتقدم يطلع غضبه فيهم
وهم هجو على طول ومحد منهم انصاب
