لف بقل حيله وصرخ في العيال الي يغنون له : ولد اسكت انت وياه صدعت منكم
ظافر : ياخي عرسك اليوم ماتبي نفرح لك
هز راسه ذيب : مبي تفرحون لي ياخي كيفي
سكتو يناظرونه معصب وفتحي يحدد دقنه بتوتر
ناظره يهز راسه : خلاص
وقف ذيب وتقدمو العيال يحلقون من بعده وتكلم نياف وهو يشوف ذيب طالع : وين رايح ولد ؟
ذيب : ابروح للبيت اشوف شغلي لاياكلني جدك
هز راسه نياف ولف يناظر العيال وكمل طريقه ذيب دخل بيت ابوه وناظر سلمى وشادن الي فالصاله يتمكيجون وتكلمت سلمى بفرح : حي الله العريس
سكت ذيب وكملت : ادخل يروحي اللبس واكشخ وامي بتجيك بالبخور تبخرك
تقدم ذيب يدخل غرفتهم وناظر ثوبه المعلق وشماغه وبشته ودخل الحمام يتروش وبعد دقايق طلع وهو لابس ملابسه الداخليه تقدم ياخذ ثوبه ولبسه ووقف قدام المرايه يسكر ازرت ثوبه بدون نفس ولف من انحطت الطاقيه على راسه وابتسمت توقف قدامه وتزينها له
ابتسم يناظرها وتكلمت وهي تعدل مرزام الشماغ : اليوم عرس وليدي حبيبي مابي احد يزعله ولا ابيه يزعل ويتكدر خاطره الناس كلها تزعل ولا تزعل انت
سكت يناظرها تعدل مرزامه ومد يده ياخذ يدها وباسها ورفع راسه يبوس راسها وتكلم : الله لايحرمني منتس ياميمتي اهم شي فرحانه
هزت راسها تبتسم : فرحانه لان اليوم عرسك وابفرح فيك وزعلانه لانك منت راضي ومجبور
ذيب ابتسم : اجل خليتس فالاولى واتركي الثانيه عنتس
هزت راسها تناظره وتكلمت : تدري وش الي مريحني
هز راسه : وش ؟
شيخه بابتسامه: مدري حاسه واحساس الام مايخيب في عيالها
عقد حواجبه يناظرها : وش حاسه فيه ؟
شيخه بهدواء: حاسه انك تاتنبسط في هالزواج وترتاح
ميل شفايفه يناظرها وهز راسه : حاسه كذا ؟
هزت راسه شيخه : عشان كذا جايه ابخرك
ابتسم يناظر البخور في يدها ورفع طرف شماغه وتقدمت بالمبخره تبكره وبعده اخذت دهن العود تمسح على ظهر يده وبدا يمسحه على دقنه
تقدمت عنده بالبشت تلبسه وتقدمت تطلع وهو جنبها ناظرو حاكم وصالح الي جايين للغرفه وكاشخين وتكلم حاكم : جاهز يالمعرس
هز راسه ذيب بصمت وتقدم يطلع معهم على زغاريط شيخه وسلمى الي واقفين عند الباب
طلعو لبيت الجده سلمى وبدو يجهزون لاستقبال المعازيم
تقدمو يمشون معهم عقاب وقايد ببشوتهم رايحين للحوش الي فيه الحفل
ناظرو العيال الي واقفين عند البوابه وكلهم كاشخين ولابسين المحازم ابتسم يناظرهم يناظرونه بخوف ودخلو الحوش يناظرون شياب الديره الي موجودين وبعض المعازيم
وبدو يسلمون ويباركون ل ذيب الي يرد ببرود ويستلم العانيات والهدايا وسيف وصالح وفارس يدورون بدلال القهوه والتمر و المضير
وصقر ونياف بالمباخر ودهن العود والباقين معهم واكثر اوقاتهم متكين
بدو يجون الضيوف والمعازيم وشيخه والجده سلمى يرحبون ويضيفون والبنات يدورون بالقهوه والحلا
كملو الضيوف ووصلت الطقاقه وفرقتها ورفعت صوتها : ي ام العريس تهنيتي ، وعلى عيالتس لاونيتي ، وبلغتي ماتمنيتي ، وبيوت العز بنيتي ، عاشت ام العريس ...
وبدا الطق والفرح والرقص
والعنود واقفه عند شباك غرفتها متكتفه و تسمع زغاريط الحريم والتشجيع لفت من اتصل جوالها وناظرت الشاشه وكان بندر عضت شفتها تناظر الدريشه واخذت الجوال ترد : اهلن
بندر بتنهيده : نودي من امس ماتردين علي فيك شي ؟
لفت من سمعت الزغاريط وتكلمت تغطي صوتهم : هاه لا لا مافيني شي بس تعرف انا فالديره والابراج ماتمسك واصلن متى اتصلت ماجاني انك متصل
سكتت من وقفو زغاريط وتكلم باستغراب: اسمع صوت طق وغنى انتي وين ؟
غمضت عيونها وتكلمت : فيه عرس عندنا اليوم فالديره والصوت صوتهم
بندر بابتسامه: ماشاءالله زين عندهم فعاليات تستانسين الله يوفقهم ويبارك الهم
سكت من سمع صوت رزان وهي داخله : ها ياعروس لبستي
عضت شفتها تناظر رزان وغمضت عيونها وتقدمت عندها رزان : انتي من جيتي ماتعرفين شي حتى في عرستس ماتعرفين تعالي اعدل الفستان عليتس
ناظرت الجوال وكان بندر على الخط وتكلمت بابتسامه عشان مايشك : بندر بسكر وصلت عند العروس بشوفها اكلمك اذا خلص الزواج
بندر الي كان عاقد حواجبه ويناظر الفراغ تنهد براحه من تكلمت العنود وهز راسه : زين انتضرك
سكرت وناظر الجوال ثواني ووقف ياخذ جاكيته ويطلع
