سلمى بعدم اهتمام : غسلت يدي منه لو يجي الحين صفقته معها
ريم : ماعليتس اتركيهم الحين لازم تركزين بعد ثلاث اسابيع ملكتس
لفو عليها وقالت سلمى : من قال محد شاورني
ريم رفعت كتوفها ب مدري وقالت : سمعت جدتس وجدتتس يحتسون برا وعمانتس موجودين
سلمى مسكت راسها وقالت ترف : الله يعني بتجين بيتنا قريب
سكتت سلمى تفكر وخايفه من فكرت الاجبار وان يكون جدها متدخل ، ابوها تعرفه مايحب يجبر احد من عياله وخاصه بناته وعلى الزواج بعد وخايفه يكون جدها عبى راس ابوها وعجلو في الزواج تنهدت وطلعت لغرفتها
ناظروها البنات وتفهمو انها متوتره وتركوها وطلعو وقالت ريم بهمس : بنات انا برجع لبيتنا اكيد امي تحتريني
ترف : يوم زانت الجلسه بتروحين
ريم هزت راسها وقالت : طولت والله ماقدر بعود وبكره اجيتسن
هزو روسهم البنات وتقدمت تسلم عليهم وقالت قبل تطلع : سلمو لي على سلوم
شادن : يوصل
وطلعت وطلعو للحوش بعد ماتغطو يجلسون وقالت ساره : وين ريم ؟
عاليه : رجعت لبيتهم
هزت راسها ساره وقالت شيخه باستغراب: وسلمى
ناظرو بعض البنات ولفو الكل عليهم وقالت شادن بتوتر : نايمه
شيخه سكتت تناظرهم وهي مارتاحت ولفو من انفتح الباب وطلعت مهره بشنطتها وتعرج من رجلها ومن شافوها البنات ضحكو ولفت عليهم ساره بعصبيه وسكتو يناظرونها
لفت من انتبهت لهم ومسكت ظهرها بشوفة نفس وماكانها الي دخلت وهي تعرج ومشت تستعجل خطواتها وطلعت ولفت اريج باستغراب للبنات وقالت : شفيها احد قايل لها شي
هزو روسهم البنات ب لا ودخل سطام وشماغه على كتفه وسلم عليهم ردو السلام بدون نفس وسكتو وقال سطام وهو يناظر امه : وين سلمى ؟
شيخه : نايمه
تقدم بيدخل وتكلمت شادن : ماتبي تشوفك افهم
لف سطام عليها وقال : افتكيت من ام لسان هذيك فكيني منتس
حاكم : وين تاتروح
سطام حك جبينه وقال : بكلم سلمى
حاكم بعصبيه : يادمي افهم ماتبي تشوفك مهو غصب
دخل هالوقت ذيب ناظرهم باستغراب وسلم
لفو عليه وردو السلام وقال باستغراب: وش فيكم حسكم طالع ؟
شادن : تعال افزع لاختك
ذيب عقد حواجبه وهو واقف : من
لفو على شادن وقالت وهي تناظر سطام : اخوك ضاربها عشان السلقه
ذيب بصدمه : وشووو
شادن : هذا الي صار
ذيب بصدمه : وهي وينها الحين ؟
شادن : داخل فغرفتها
ركض ذيب يدخل البيت وطق الباب ووصله صوت سلمى
الباكي وهي تقول : ماتفهمون انتم مابي اشوف احد
فتح الباب بخفيف وطل وكانت منسدحه ومغطيه وجهها دخل وتقدم عندها وقال : سلوم قومي هرجيني
مسحت دموعها وجلست وجلس قدامها ناظر خدها الاحمر وكان منتفخ وقال بوجع : جعل يده للكسر
سلمى مسحت دموعها وقالت : كله من السلقه الي عنده حسبي الله عليها الظالمه
ذيب تنهد وهو يناظر دموعها وبلل شفايفه وقال : قولي وش الي صار ؟
قالت كل الي صار وخلصت وهي تبكي وتقول : انا مابكي عشانه بداها علي ابكي لانه ضربني قدام الكل .... ومسحت دموعها وكملت : انت متخيل شلون يمد يده علي وقدام الكل شاف الي صار يعني انا وجعني قلبي من ذي بس ولا الملعونه ذي ماخليتها وطلعت حرتي فيها
رفع يدينه يحضنها وهي تشهق ومنهاره ومسح على راسها وقال : دمعتس لاتنزل بسبة واحد حقير شفته برا قبل اجيتس وكان يبيجي يكلمتس بس وقفه ابوي
سلمي وهي تبكي : اصلن انا محرمه نفسي عليه ومتبريه منه ماعاد هو اخوي صار كلب عند هذيتس
ذيب عقد حواجبه: مهما كان اخوتس
سلمى بعدت بعصبيه : لا ماهو اخوي
ذيب مسح دموعها : قومي غسلي وجهتس وامشي معي نطلع وماكن صاير شي
سلمى : ماتحمل اشوفه وكيف بطلع وانا انضربت قدامهم
ذيب : كيف يعني بتجلسين هنا كنتس خوافه مو ذي سلمى الي اعرفها ، سلمى اختي الي مايهمها كلام الناس من ماكان
سلمى اختي الي تطلع وماعليها من الي يصير لو تكلمو قدامها تسكتهم وتقول مالكم دخل
الحين تقومين وتطلعين معي عشان تنقهر بنت الكلب وينقهر معها وتثبتين انهم ماهموتس ولا بيهمونتس
سلمى ابتسمت من دعمه الها وقالت ببحه : المشكله ان قبل السالفه خطبني هادي ويوم انضربت انضربت قدام عينه
ذيب ابتسم وقال : ماشاءالله وانا اخر من يعلم
سلمى بكره : جدي هو الي مضبط كل شي وبدون علمي حتى رايي ماخذوه بس مابيدنا شي
ذيب كشر : جدتس هذا يبي له تحديث من اول وجديد لو نسكت زوجنا كلنا في سنه
ضحكت سلمى وقال ذيب بابتسامه : يالله قومي غسلي واللبسي وارجعي سلمى اخت الذيب
سلمى وهي توقف وتمشي : الحمدالله عندي اخو زيك ولا انهبلت
ابتسم ذيب يناظرها وصد وهو يفكر في سطام ولازم يوقفه عند حده ويفتك من كل ذالمشاكل
طلعت ولبست ولفت عليه وكان ساهي يفكر : خلصت
لف عليها وابتسم يوقف ويطلعون ويد ذيب على كتف سلمى طلعو يناظرونهم جالسين ولفو عليهم من تقدمو وجلست سلمى وجنبها ذيب
ناظرهم سطام وقال : سلمى اس...
قاطعه ذيب الي قال : قم معي
ناظره سطام من وقف وتنهد يناظر سلمى ووقف يطلع وراء ذيب
تأفف يرجع ظهره على الجدار ويناظر البيوت قدامه وقف سطام جنبه وقال ذيب بهمس : لين متى ؟
عقد حواجبه سطام : وشو
ناظره ذيب بعصبيه وهمس : يكفي غباء وكنك ورع حتى ولدك حاكم فاهم وصاحي اكثر منك
سطام ناظره وسكت وكمل ذيب : انت مستوعب وش مسوي ؟
سطام صد يناظر البيوت وقال : طولت لسانها ولازم يقص
ناظره ذيب بصدمه وقال : اذا بينقص لسان فهو لسان السلقه الي عندك
سطام ناظره بعصبيه: لاتتكلم كذا
ضحك ذيب بسخريه وقال : تحامي عنها بدال اختك .... ولف يناظره بعصبيه : والله انك ماتستحي وماتستاهل .... ورفع اصبعه وهو يناظره بعصبيه وقال : قسم بالله لن استمريت على وضعك ذا وماتحسنت مع اهلك وتركت بنت الكلب الي متعلق فيها لتشوف شي مايعجبك
ناظر اصبعه سطام وقال : تهدد ؟
هز راسه ذيب ومشى يدخل تاركه وراح سطام يركب سيارته وناظر مهره الي تناظره وشنطتها بيدها وتنهد وحرك ماشي
دخل يناظرهم وابتسم يجلس مكانه جنب سلمى
وقال حاكم : وش كنت تبي به ؟
ذيب وهو ياخذ بيالة الشاهي : موضوع ووصلته وانتهى
عقاب : وين كنت ماجيت مع ابوك ؟
ذيب ناظر ابوه وناظر جده وقال : رحت اوصل حاجه وجيت
سكت وقالت ساره : يوه ماتنفهم ومايوضح منك سالفه
شيخه : كتوم بزياده
سكت ولف من دخل سعيد وسلم وجلس معهم وقال باستغراب : سطام علامه ؟
سكتو يناظرونه وقال من شاف نظراتهم : تعداني يمشي ميتين الله يستر بس
شيخه شهقت وقال حاكم : ان شاء الله يمشي اربع ميه اتركوه لين يهجد
سعيد ناظرهم باستغراب ولف نياف على جده وقال : بكره لازم اروح ل الرياض
لفو عليه وقال قايد : وش عندك ؟
ناظر بيالته : بجيب اغراض للمحل وبشوف لي شغله هناك
ناظروه باستغراب وقال عقاب : وش عندك شغل هناك ؟
نياف توتر وقال قايد : اهرج لاتتوتر
نياف : الصراحه حصلت لي شغل هناك وبروح اشوفه واسلم اوراقي
سكتو شوي يناظرونه وكمل : جدي تكفى لاترفض الوظيفه زينه وما تتفوت
قايد : من موظفك ؟ وليه ماقلت من اول ؟
نياف : منزلين اعلان وطالبين موظفين وسجلت واليوم ارسلو موافقه بس بقي اودي اوراقي وابدا
عقاب : ووشي الوضيفه الي بتترك ديرتك عشانها ؟
نياف : في بنك
فتحو عيونهم بذهول وقالت رزان : وكم راتبك ؟
نياف : بكره اذا رحت بيقولون لي
قايد لف يناظر ابوه الي يفكر وبعد ثواني قال حاكم : بتروح لحالك لازم يكون عندك سكن
خلف : السكن هين اشوف له الشقق الي عندنا واقوله
عقاب ناظر نياف الي يناظره بخوف وناظر قايد ولف وقالت الجده سلمى :انت وش فيك سببت رعب للولد خله يروح يشوف شغله
عقاب : وان كانه نفس عيال عمه يسربتون تبينه يروح معهم
لفو يناظرون سعيد وقال نياف : ياجدي والله عشان الشغل بس
عقاب : شغل عندك محل طول ب عرض مسلمك اياه
نياف عصب ووقف وقال : ومحلك ماعاد ابيه وماجاز لي
لف عليه قايد بعصبيه : ولد جدك
صد نياف وطلع ولفت الجده سلمى بعصبيه: ارتحت الحين بتغصب اللولد على شي مايبيه
عقاب : لمصلحته
رزان : اي مصلحة الي تقولها يعمي يكفي انك حارمهم الراحه
قايد ناظر رزان بعصبيه وسكتت رزان وصدت تناظر صقر : رح شوف اخوك لايحتال في نفسه
وقف صقر وطلع وقالت الجده سلمى: نياف وبيروح يتوظف ويشوف حياته والباقين نفسه وان ماسمحت له بسوي شي مايعجبك
وقفت تدخل البيت ولفو الباقين يناظرون عقاب الي عصب وعيونه صارت حمراء وكان شكله يخوف ووقفو البنات يدخلون وشيخه ورزان معهم وذيب وصالح وهادي وغيث طلعو وراء صقر
............................................
* مزرعة راشد *
بعد ماطلع ذيب دخلت العنود البيت وكانت نجود متكيه وقدامها صينية فواكه وتاكل تقدمت العنود تاخذ فراوله وتجلس وقالت نجود : خلصتو ؟
هزت راسها العنود ب ايه وقالت : افكر نسوي حفله بما انه تاسع قعود اجيبه
ابتسمت نجود وقالت بنظره : بيننا ولا نجيب الباقين ؟
ابتسمت العنود : نجيبهم
ضحكت نجود تناظرها وطلعت جوالها : نجيبهم لعيونك
ابتسمت العنود ولفت من دخل راشد وقالت : بنحتفل بتاسع قعود
راشد ابتسم : نحتفل ليه لا
لفو على نجود من قالت : كيف حالك
مشاري : بخير وانتي ؟
نجود حطت سبيكر : زينه. العنود عازمتكم على حفله اليوم في بيت المزرعه حياكم كلكم
مشاري بابتسامه: العنود تعزم يجون الكل لعيونها كم عندنا العنود حنا
العنود بابتسامه خجل : تسلم ياحلى خال
مشاري : وشي المناسبه يدلوعتنا ؟
العنود : تاسع قعود
مشاري : ماشاءالله اجل التكاليف على راشد اليوم
راشد بابتسامه: تبشر هذي دلوعة جدها من قدها
نجود : تمام بسكر اكلم امي لاتنسى تعالو الكل
مشاري : زين
نجود : باي .... وسكرت تتصل على امها تعزمها
وقفت تناظر راشد : بروح اشوف الخدم جهزو الجلسات برا وركن الشوي
هز راسه راشد بابتسامه وطلعت العنود تشيك على الخدم وتقولهم وش يسوون
في نص ساعه وصلو الكل واجتمعو عالجلسات برا وكانو مشاري وزوجته وعياله وعذبه وعيالها
راشد : وين سعد ماجاء ؟
عذبه بابتسامه : في دوامه
هز راسه راشد ولف من قالت فرح : من وين جبتيه القعود ؟
لفو على العنود وقالت بابتسامه: مافهمت ؟
فرح ابتسمت : يعني قصدي ابوي يدور قعود زين ماحصل وانتي بسم الله عليك جبتيه في يوم
مشاري وبندر لفو على فرح باستغراب وقال راشد : العنود بسم الله عليها اذا بغت شي جابته وهاذا هي دبرت نفسها
العنود : ترا للحين مافهمت سؤالك
فرح : شفيك توترتي ؟
العنود : تشككين في شغلي ؟
هزت راسها فرح ب لا وصدت تاخذ بيالتها و تشرب
وصدت العنود تناظر بندر الي يناظرها بتوتر ومن ناظرته ابتسم يطمنها وابتسمت تصد لنجود وجمان الي يتهاوشون عالجهاز وكل وحده تبي تحط اغنيه ناظرتهم وقالت : متى تخلصون هواش ؟
جمان : اذا وحده منا مشت كلامها
مدة يدها تاخذ الجهاز منهم وقالت : بمشي كلامي انا
نجود بحزن : طيب نوني حطي امريكي
جمان : لا نوني حطي عراقي
ناظرتهم شوي العنود ولفت عالجهاز وناظرتهم : خلصو حددو
بندر : عطيني انا احط
ناظروها البنات وغمزو وابتسمت العنود بخجل وصدت تعطيه الجهاز وقال عادل : بس حطو شي جديد عشان اصور لمتابعيني
العنود : متابعينك حفظونا من كثر ماتصور لهم
عادل : اكيد ذول نصي الثاني
ضحكو وقال راشد : اهم شي محبة الله وعباده
عادل : صحح عليك بس لو تخليني اصور معك
راشد هز يده : لا لا مو جوي تصوير
مشاري : قلنا بس من يفهم
عذبه : من يفهم حتى مصعب ينام على صوره ويقوم على صوره جنني
التشبيهات في الانستاء ( rxoa.19)
