نجود : المفروض مصعب نصك الثاني
ضحكو وقالت العنود : صدقوني تصلحون تؤام
عايش : بس فرق واحد نفسيه والثاني طويل بال
لف مصعب بنظره : من النفسيه ؟
عايش اشر على نفسه وسكت ولفو من اشتغلت الاغنيه وكانت : فرحة عمر رذاذ الغيم
وقال راشد بتهديد ل بندر : يويلك تحرجها
هز راسه بندر بابتسامه يناظر العنود
وضحكو الكل يناظرون وصرخت نجود من عرفت الاغنيه وخلصت الموسيقى وبدت الكلمات والكل يضحك والعنود الي تناظر جوالها وهي منحرجه وخدودها حمراء ونجود و جمان ينغزونها
اخذت عذبه الجهاز تطفيه وقالت : خلاص البنت ذابت ملامحها اختفت
طفت الاغنيه وبدت تدور في الاغاني
وراشد ماسك بندر تهزئ والبنات والكل يضحك ماعداء العنود الي تناظرهم مبتسمه وخدودها حمرا
راشد : رجال طق الباب واخطب دامك تحبها
بندر : والله ياجدي ودي الحين خاطبها وملكين بعد بس وعد مني بعد ماجي من البعثه خطبتها
لفو عليه بصدمه وقالت جمان : اي بعثه ؟
بندر : ماكنت ابي احد يدري بس خلاص انكشفت
مشاري : تكلم ؟
بندر : طالب بعثه في المانياء سنه وبروح بعد اسبوع
مشاري : طيب ياغبي اخطبها وبعد ماتجي تملك
بندر ناظر العنود ولف على راشد وقال : مجهز دبلتي ودبلتها انا
راشد ضحك : لاوالله وتو تتكلم
مشاري : طيب نخطب ويلبسون الدبل وبعد مايخلص البعثه يبدون في الملكه والعرس
راشد لف ل العنود الي تناظرهم وقال : شرايك
العنود رفعت اكتافها بتوتر وسكتت وقالت عذبه : حلوه الفكره
لفو يناظرون العنود وقال راشد : موافقه
العنود ابتسمت بخفيف وهزت راسها ب ايه وابتسمو وفز بندر يطلع يجيب الدبل ثواني وهو داخل ناظره مشاري بصدمه : مخبيها في سيارتك
ابتسم بندر ونزل الدبل على الطاوله وتقدمت جمان توقف العنود وتقدمها ونجود حطت اغنيه وفرح جالسه تناظرهم بسكوت
وعذبه تزغرط لبسو بعض الدبل وقال بندر ل راشد : لبستها الدبله يعني صارت لي بس السنه ذي بتكون في عيونك لين ارجع
راشد : العنود من يومها في عيوني وماتغير مكانها
تقدمت العنود تبوس راس جدها وبندر بعدها
وتقدمو الكل يبارك لهم وبعده جلسو ونجود تحط اغاني وعايش وعادل ومصعب يصورون و يرقصون و راشد ومشاري يطقطقون عليهم ويعلقون والباقين يضحكون
............................................
طلع يمشي ويتلفت يدور نياف وصادف في طريقه ريم ناظرها وقال : شفتي نياف ؟
ريم هزت راسها : لا والله ماشفته ماهو كان معكم
صقر لف يناظر : كان بس طلع وهو معصب بروح ادوره
هزت راسها ولفت تناظره رايح ورفعت اكتافه ومشت تكمل طريقها
كمل طريقه ورفع صوته يناديه وطلعت له امنه مسك راسه من شافها تمشي جهته وقال بهمس : انا انادي ذاك وتطلع لي ذي
تقدم يتلفت يسوي نفسه ماشافها بيمر ووقف وغمض عيونه من قالت امنه : انت علامك تقل مجنون تمشي وتلفت اكيد مسوي مصيبه ولا ليه خايف
صقر : ماسويت شي وماني مجنون ادور اخوي تقدرين تروحين
امنه تقدمت تناظره وقالت : والله واضح من عيونك وراك بلا مير اسمع اخوك شفته رايح جهة دكتكم يهرج نفسه
انا بروح لجدك واقوله يودونه شيخ يقراء عليه شكله مسكون
صقر بعصبيه : اخوي اصحى منتس ماهو مسكون ولا فيه شي بس تلقينه يغني وانتي فهمتي غلط والحين يالله تيسري على بيتس
امنه بصراخ : ترا عطيتك وجه لاتنافخ علي سذا
تقدمو العيال وراه وقال صالح : يالله رحمتك وعفوك يالله
امنه ناظرتهم جايين وقالت : انتم بعد تدورونه ؟
صالح : يامره روحي على بيتس
امنه رفعت يدها تكش عليه : تكفى اسكت
مشت تاركتهم ولفو العيال يناظرون بعض وقال غيث : ماظنتي كلمها ظافر
صقر : اول مره تنفعنا علمتني بمكان نياف فالدكه
صالح : ملعونه تمشي وتسكت
كملو طريقهم وتقدمو عند الدكه وكان نياف شاب النار وجنبه بريق الشاي وجالس يناظر النار وساهي يفكر
جلسو حوله يناظرونه مانتبه لهم وقال ذيب باعلى صوته يغني : دعيتك بصوت يوصلك ليه ماتوحيه ،
فز نياف بخوف وناظرهم حوله وهمس يسمي والعيال يضحكون ضرب رجله هادي وقال : وين وصلت ؟
نياف ناظرهم وقال : انتم الي متى وصلتو هنا ؟
صقر : تونا جينا
نياف ناظرهم بحذر : ماقال شي ؟
غيث : لا بس جدتك قلبت عليه عشان يخليك على راحتك
نياف ابتسم : يازينها ياجعلي مانحرم من زولها ياعرب
الكل : امين
ذيب مد يده بالملقاط يحرك النار ويدندن : يالقطوع المواصل يالقريب البعيد ، منهو الي مصرح لك تسلط علي ، انشدك وانتظر منك الجواب الاكيد ، قبل تحطيمي وتدمير مستقبلي ،
رفع نظره للعيال من بدو يصفقون ويكملون : هل معك قوة السلطان عبدالحميد ، او معك صولجان الحاكم الفيصلي ،
ولفو على رأضي من رفع صوته يكمل وهو عند باب الدكه : كيف خليتني عقب الجماعه وحيد ، وكيف نزحتني عن ربعي وعن هلي
سكتو وتقدم بابتسامه يجلس معهم وقال : سبقتوني بالشاهي
ضحكو وقال نياف بمزح : ماعاد اداني شاهيك صرت احب شاهيي اكثر
ضحك راضي : بعد مارويت صرت ماتدانيه
غمز له نياف وهو يضحك وقال ذيب : وين عودك ؟
راضي اشر على فوق وقال صالح : لا تقول عرف ابوك
راضي : لا يرجال لو عرف ماجيتكم متعافي اقصد فوق السعف مخبيه
وقف ذيب وقال صالح بخوف : لاتتهور ولد
هز راسه ذيب وتقدم يعدي يجيبه وبعد مانزل صابته كحه جلس شوي يكح وطلع بخاخه يبخ في فمه لان معه ربو وقال صالح : ماتخاف على عمرك انت ناقز وانت عارف كله غبار وبيئثر فيك
ذيب بعد ماخفت : راحت
راضي : عطني انا اعزف وانت تغني
ذيب : ماقمت اجيبه الا اني ابي اعزف
صالح : وين الباقين ليتهم يجون عشان تكمل اللمه
غيث : ضاحي مايقدر يجي لوحده
صقر : وظافر خايف يطلع وتنط له امنه
ضحكو وقال صقر : قابلتها قبل نجي تخيلو تقول بروح لجدك لان شفت اخوك يمشي ويهرج نفسه وابيه يوديه شيخ يقرا عليه يمكنه مسكون
طاحو العيال يضحكون وقال نياف : وانت وش قلت
صقر : نفخت عليها قلت اخوي اصحى منتس ويالله روحي
صالح : اثريها يوم كشت نافخ عليها
راضي : والله يانها ماهي صاحيه
رجعو يضحكون وقال نياف ل ذيب : اسلم
غيث بحركات : ابي عزف من قلب ابي مشاعر واحاسيس
صالح يقلد امنه : تكفى اسكت
ضحكو وغيث معهم وبدا ذيب يعزف ولفو من دخلو ريان وجلال وجلسو معهم ورجع ذيب يعزف وراضي يغني :
من بادي الوقت هذا طبع الايَّامِ .
عذبات الايَّام ماتمـدي لياليهـا
حلو الَّليالي تواري مثل الأحـلامِ .
مخطور عنَّي عجاج الوقت يخفيها
أسري مع الهاجس الَّلي مابعد نامِ .
وأصوِّر الماضي لنفسي وأسلَّيهـا
صفو جنب بعض ريان وصقر وهادي يرقصون وكملو ذيب وراضي : أخالف العمر أراجع سالف أعوامِ .
وأنوَّخ ركاب فكري عند داعيها
تدفى على جال ضوَّه بارد عظامي .
والماء يسوق بمعاليقي ويرويهـا
إلى صفالك زمانك علِّ ياظامـي .
إشرب قبل لايحوس الطَّين صافيها
الوقت لو زان لك ياصاح مادامِ .
ياسرع ماتعترض دربك بلاويهـا
حتَّى وليفك ولو هيَّم بك هيـامِ .
سيَّور الايَّام تجنح بـه عواديهـا.
مد يده راضي ياخذ بيالة الشاهي من خلص وضحك ذيب وهو يناظر العيال يرقصون وهو للحين يعزف عود
فلته ينزله جنبه ويتكي ورجعو العيال يجلسون وقال غيث : راضي ليه ماتنشهر بصوتك
راضي ناظره بصدمه وناظر العيال ولف عليه وقال بضحكه : عشان يتبراء مني ابوي
ضحكو وقال غيث : لا اتكلم جد صوتك زين حتى ذيب بعد
ذيب هز راسه ب لا وقال نياف : جدنا لو يخلينا نرتاح سوينا الي نبي بس ناشب لنا
ريان : يووهه بتصير سالفه خلوكم بس مشهورين عندنا
هادي : اعرف مشاهير اتابعهم اصواتهم انشاز ومستمرين يغنون واحيان يقصدون بس عشان المتابعين والفلوس ولا ماهمهم حلوه اصواتهم ولا
غيث : عشان كذا قلت انشهرو اصواتكم تغطي على اصواتهم
فتح جواله هادي ودخل على مقطع مشهور وهو يغني ولف
الجوال على العيال يشوفون المقطع ولفو عليه العيال وناظرو الجوال
وبعد ماخلصو قال راضي بتكشيره : ي شينه ويلحن بعد
غيث : تخيل انت بس لو تطلعون اصواتكم
ذيب : يابن الحلال انا انا ملامحي احسن من ملامحه وصوتي احسن من صوته بس خله عنك
هادي عدل جلسته وناظرهم : بالله تعالو شوفو
تجمعو عنده العيال وفتح سناب الشخص : هو دايم يصور يوميات وذي توه نزلها
ناظرو العيال الجوال وكان مصور ركن شوي والجمر والمزرعه وصوت الاغاني وراه وعقد حواجبه ذيب وتقدم اخذ الجوال يشوف السنابات وناظروه العيال باستغراب وقال هادي وهو يناظر ذيب : وش تعرفه ؟
رجع الجوال ذيب : لا ماعرفه بس شبهت عليه
رجعو العيال يناظرون الجوال
وبعد دقايق خلصو ورجعو نفس ماكانو وقال صقر : صور كل هالصور والفيديوات
غيث : يومياً يصور وينزل ومتابعينه متفاعلين معه
هزو روسهم العيال بصدمه ورجعو يفتحون سوالف ويتسلون
............................................
دخلت القصر وتلفتت ماكان فيه احد وطلعت للملحق وتقدمت من سمعت زئير شوُتوُ ( نمرها ) وابتسمت وتقدم شوُتوُ يركض جهتها ونط عليها وحضنته تضحك جلست عالكرسي تمسح راسه وقالت : اشتقت لي
استراح شوُتوُ وابتسمت تمسح عليه ولفت من تقدم راشد وقالت بابتسامه: صباح الخير
ابتسم يناظرها وجلس : صباح النور
ناظر شوُتوُ ومد يده يمسح عليه وقال : الشيخ اعلومه
ناظرته العنود وقدمت يدينها تشيله : زين اليوم اخر تدريب له
العنود ناظرت راشد وابتسمت : اليوم اعلان النتائج
راشد هز راسه : مدري ليه احس بتوتر
العنود : ماعليك ان شاءالله فايز
راشد ابتسم وناظر ساعته : نطلع
العنود هزت راسها ووقف راشد يدخل جناحه يجهز والعنود شالت شوُتوُ توديه مكانه ورجعت تدخل جناحها
لبست عباتها السوداء وحوافها باللون الاخضر واخذت حجابها وتحجبت وتقدمت تاخذ شنطتها وطلعت وقفت تنتظر الاصنصير وفتح وابتسمت من كان راشد فيه وقال : في نفس الدقيقه جهزنا
هزت راسها تتقدم تدخل معه ونزل فيهم الاصنصير وطلعو مع بعض وقفت ولفت عليه : بشوف شوُتوُ واجي
هز راسه راشد وطلع للسايق الي تقدم يفتح الباب ل راشد وركب و ركض للباب الثاني من طلعت العنود يفتحه لها وركبت جنب راشد وسكر ورجع مكانه السايق وحرك ماشي
مسافة الطريق و وصلو ونزل راشد ويمينه العنود
مر الوقت وصار اعلان الفائزين وكان المركز الاول راشد بن غازي
والمركز الثاني حاكم بن عقاب
وطلعو وتقدم حاكم معه ذيب وصالح يسلمون على راشد ويباركون له وراشد يرد عليهم بابتسامه واخذتهم السوالف وتقدم حاكم وحلف على راشد يعزمه
راشد ناظره مُصر : عزيمتك ماهي مردوده لاكن ايام وابشر
ابتسم حاكم : ابد والله خذ راحتك متى مافضيت كلمني
هز راسه راشد بابتسامه ولف من تقدمت العنود تبارك له وتهنية ولفت على حاكم والعيال وناظرتهم يناظرنها وابتسمت من عرفتهم وصدت ل راشد : نمشي
هز راسه راشد وابتسم: هالمره انا الي بسوي الحفل
ضحكت تناظره ومشت معه يطلعون
لف حاكم على ذيب وناظره باستغراب وقال : ماهي هاذي الي شرت القعود هذاك اليوم ؟
هز راسه ذيب : هي وهذا جدها
حاكم : سبحان الله
صالح بصدمه : شدرك انه جدها يمكن ابوها ؟
ذيب : سمعتها تناديه جدي
حاكم مشى ومشو معه يطلعون وقال صالح : يبه انت عزمته بس متى يجي ؟
حاكم : حلفت عليه ان فضاء يدق علي ويجي
ذيب : بتسوي له عشاء وتعزم رجال الحاره ؟
هز راسه حاكم ب ايه وسكت يناظر الطريق ولف صالح يناظر ذيب الي يناظر الطريق وبعد دقايق وصلو ونزلو يدخلون وناظرهم عقاب بابتسامه: هاه بشرو
حاكم : الحمدالله الثاني
قايد باستغراب: وراك
حاكم تقدم : ماهو قلت لكم ان فيه واحد بيرجع ويشارك هو الي اخذ الاول
عقاب هز راسه : ماشاءالله
حاكم : الله يبارك له ويرزقه وحنا بالمثل
الكل : امين
وقفو يسلمون على حاكم ويباركون له بالمركز الثاني وحاكم يرد عليهم بابتسامه وتقدمو يجلسون
ولف يناظرهم حاكم : ترا عزمته
لفو يناظرونه وقال قايد : وليه ؟
حاكم : وشوله ليه عزمته وخلاص وحلفت عليه يجي
عقاب : ومتى ؟
حاكم رفع كتوفه : الوقت الي يبي
سعيد : يبه ليه ماتقوله يجي في العزيمه الي بيسويها خلف
لفو يناظرونه وقال عقاب : اذا خلف بيعزم ويكلف اعزمه في نفس اليوم عشان ماتكلف انت
حاكم : بس خلف بيعزم عشان خطبة ولده وين اجيب الرجال وادخله بينهم
عقاب : عشان ماتكلف وتدفع وتجيب ذبايح
الجده سلمى بصدمه : وشوله كل هالبخل مافيها شي ان ذبح ذبح من شبكه مليان ماهو مضطر يعزم على حلال غيره
قايد : وخلف بيجيب على قد الديره
حاكم هز راسه : لا لا ابعزمه في وقت مناسب ماله داعي احرج الرجال بينهم
عقاب وقف : براحتك انت الخسران .... وطلع عقاب وقال ذيب : وين العيال ؟
قايد : فالمحلات
صالح : طولو المفروض راجعين
شيخه : تلقاهم مع العيال يفرفرون
سكت صالح يتكي وتقدم ذيب ينسدح وراسه على رجل امه
وقالت الجده سلمى : تعبتو من الصبح مارتحتو
هز راسه ذيب وهو مغمض وامه تسوي لراسه مساج
وطلعت سلمى وشادن وراها وناظرتهم : متى جيتو ؟
صالح ناظر الصينيه :تونا انتي تقرين افكاري ؟
ضحكت شادن وتقدمت سلمى بالصينيه تنزلها : جت في بالي وسويتها
تعدل في جلسته صالح وتقدم ياخذ الصحن من حطت فيه سلمى وياكل ومدت يدها شادن تضرب قدم ذيب عشان يقوم وفز بخوف وقالت شادن بهمس : بسم الله
ناظرها ذيب بعيون ناعسه وقالت شيخه : مجنونه انتي خرشتيه
شادن وهي تناظر ذيب : والله اسفه حسبتك قايم اثريك نايم
ذيب مسح عيونه : معليه زين قومتيني بدخل انام
سلمى : تعال اكل ورح
ذيب ناظر الصينيه من بدت تحط له في صحن ومدته له واخذه يعدل جلسته وياكل
دخلو هالوقت ناصر ومشاعل ولفو عليهم وقالت مشاعل وهي تتقدم تجلس : خير ماتعزموني
شادن : بيتكم فيه اكل مانتي محتاجه عزيمه
ناصر بضحكه وهو ياخذ الصينيه : اقول هاتي بس
صالح مسك يده واخذ منه الصينيه وقال بغضب : لاتلقف على الي مايخصك
الجده سلمى : سلمى يامي حطي لهم
سلمى ناظرت جدتها ولفت تناظر مشاعل الي متكيه جنب ذيب وتناظره وهو ياكل وقالت : مشاعل لاتتميعين وقومي امشي هنا
ناظرتها مشاعل وقالت بدلع : يروحي مرتاحه هنا ماعليك
شيخه : ترا عيب عليك هالحركات
ناصر ناظرهم وقال : وين السرابيت ؟
رفع نظره ذيب عليه واخذ صحنه ينزله ع السفره وناظر سلمى وقال بابتسامه: تسلم ايديتس
سلمى : عافيه
ووقف ذيب يدخل ينام ومشاعل تناظره لين دخل ورجعت ناظرت سلمى بحقد
الجده سلمى: وين امكم ؟
ناصر : ماجاوبتو على سؤالي ماني بمجاوب
صالح : هرج جدتك زين
ناصر : مالك دخل
ناظره صالح بعصبيه وقالت الجده سلمى: خله وانا جدتك الي مايحترمني لايدور مني احترام.
ناظرها ناصر بعصبيه ووقف يطلع وضرب الباب بعده
وقال صالح باعلى صوته وبعصبيه : وجع يوجعك ان شاءالله
مشاعل ضحكت وناظروها باستغراب وقالت شادن : ضحكتي بلا سنون
الجده سلمى ابتسمت ووقفت تدخل تاركتهم وقالت شيخه : خلصو وشيلو الي مكانكم
هزو روسهم سلمى وشادن ودخلت شيخه وتقدمت مشاعل تاخذ صحن ذيب ومدته على سلمى : حطي لي فيه
سلمى ناظرت الصحن وابتسمت تاخذه ونزلته عالسفره واخذت فنجال قهوه وصبته في الصحن وناظرتها : يوه لازم تغسلينه اكيد مارح تاكلين فيه كذا
ناظرتها مشاعل بعصبيه وضحكت شادن تكمل تاكل وقال صالح بابتسامه: ماينفع معهم الا كذا
ضحكت سلمى وقالت شادن : تعرفلهم سلومتي
مشاعل : يعني انتي الحين مغتاره مني وماتبين اكل في صحنه
ناظرتها بسخريه سلمى وقالت تقلدها : انا مغتاره منتس !!
مشاعل : شايفتني مرتاحه مع اخوتس وبتجين تخربين علينا
ضحكو وقالت شادن : اخوي مايداني هالاشكال
سلمى بضحكه : واجل اخوي دراء عنتس ولا طق لتس خبر
مشاعل ابتسمت : يحبيبتي وشهوله اقولتسن خليني ساكته لاتحسدني
طاحو يضحكون وشرق صالح في الاكل لانه يضحك وتقدمت شادن تضرب ظهره واخذ كاس المويه يشرب
ومشاعل تناظرهم بحقد وكره ووقفت بعصبيه تطلع
وسلمى وشادن وصالح يضحكون عليها وعلى تفكيرها ويعلقون
............................................
دخلت جناحها وبيدها شوُتوُ وابتسمو جمان ونجود يتعدلون وجلست بينهم العنود ورفعو ايديهم يمسحون عليه وقالت نجود : كيووت
جمان : افاا تحول من مفترس الى كيوت
العنود : مفترس بس على عداي
نجود : يفصفصهم فصفصه خليه يشوف شغله مع العذال
ابتسمت العنود وقالت جمان : لاتقولون تقصدون سميره ؟
هزو روسهم البنات ونزلت جمان تكلم شؤتؤ : لاوصيك فيها ابيك حتى عضامها مايبقى منها نقطه
ضحكو وقالت نجود : يعععع اللحجيه
العنود : شوُتوُ مارح يسوي شي انا الي بغسل شراعها
جمان بابتسامه : ايي بعدي والله وانا بكمل معاك
نجود بخوف : يمامه متى صرتو متوحشين كذا شوُتوُ صح بس انتو خطاء
جمان ناظرت العنود بقهر وقالت : شرايك نغسل شراعها بدال سميره
العنود ضحكت وحضنت نجود وقالت : عاد مارضى عليها هذي حبيبتي ماي بيست فريند
جمان ناظرتهم بذهول وناظرت شوُتوُ : شرايك نقوم عليهم اثنينهم
طاحو يضحكون وتقدمت تنزل شوُتوُ وتحضنهم اثنينهم وقالت بابتسامه: خواتي حبيباتي
جمان : الله لا يحرمني منكم
العنود ونجود : امين ولا منك
نجود : ايوه ايش تخطيطكم اليوم ؟
العنود ميلت شفايفها وناظرت جمان الي تكلمت : بنطلب اكل ونحط موفي شرايكم ؟
ناظرو بعض البنات ووقفت العنود تركض جهت البلازما ونجود وراها وقالت العنود وهي ماسكه الريموت وتضحك : اخر مره انتي الي اخترتي الحين انا
نجود جلست على ركبها وهزت راسها بحزن وضحكت تناظرها
ووقفت جمان وراء نجود ومسكتها من بطنها تسحبها وصرخت نجود تضحك وقالت جمان : مو على كل شي تبكين خلاص ترا فليتيها
نجود حطت يديها على عيونها تمثل البكي والعنود وجمان يضحكون وبعدتها تضحك معهم ولفو من طق الباب وفزت نجود تفتح ودخل راشد وناظرهم بابتسامه وقالت العنود بابتسامه: يالله حيه
راشد : الله يبقيك
جمان مدت يدها : تفضل طال عمرك
ضحك يجلس ع الكنبه وقالت نجود : جدو اسهر معانا
راشد اشر على عيونه : من عيوني
جمان فتحت جوالها تطلب وتقدمت العنود تجلس جنب راشد ولف عليها : بكرا معزومين
لفت عليه وهزت راسها : مين ؟
راشد : ذكرتي الرجال الي معه عيال وجو يباركون لي وقت فزت
هزت راسها تتذكر وقال : حلف علي يعشيني اذا فضيت وتو اتصل علي وحلف علي بكرا اكون عنده
العنود : هو الي شرينا منه القعود
راشد بصدمه : صحيح ؟
هزت راسها العنود وقال راشد : طيب جهزي نفسك ترا بتروحين معي
هزت راسها العنود : معك يابعد روحي
ابتسم يلف على نجود الي ماسكه يده وتصور معها وقالت العنود : لقت محتواى
ضحكو ورفعت يده تبوسها وفتحت الصور توريهم
دقايق ودخلت جمان وبيدها اكياس وقفت تناظرهم بذهول : اذا ماجهزتو القعده في دقيقه مارح تاكلون
وقفو البنات وراشد وقف وبيده مخده وقال بابتسامه: يالله بسرعه لاتعصب
ضحكو البنات وجلس وقالت جمان : انت ترتاح ياقلبي اقصد الدلوعات انا
تقدمو يرتبون وبعد ماخلصور قربو الطاوله وجلسو كلهم الاربعه جنب بعض ونزلت الاكل جمان على الطاوله تفتحه وتوزع والعنود بيدها ريموت وفاتحه التلفزيون تحط فيلم ونجود متكيه وتشرب عصير وراشد جالس بينهم ومرتاح
............................................
وقفت تناظر شكلها بعد ماكشخت وطلعت تناظر شادن : جو ؟
هزت راسها ب لا وقالت : ابوي قال بيعزم الرجال بس وش جاب بنته معه
سلمى : ماعلينا اهم شي قمنا بالواجب
لفت من سمعت صوت ذيب وطلعت تركض فتحت الباب ودخل وفوق راسه قدر كبير فيه لحم نزله في المطبخ واخذ نفس ودخلت شيخه : الله يعافيك وانا امك
ذيب هز راسه ولف على شادن : وين ثوبي غسلتوه ؟
هزت راسها شادن وقالت سلمى : يمه بعزم ريم وامها
شيخه : انتي وابوتس شغالين عزايم وانا الي اطبخ
ذيب ابتسم : شنسوي يانبع الحنان طبختس ياخذ العقل وخاصه في المندي اووو
شيخه : من عيوني تبي مندي انت بس ابشر
ذيب تقدم يبوس راس امه ويدها وبعد وقالت سلمى : وانا بسوي الكبده
دخل هالوقت صالح ونزل القدر وكان فيه الراس والفراسن وناظر سلمى وصد وقال : يولد
ذيب رفع يده يضرب كتفه وقال : اختك يالي ماتستحي
صالح لف على سلمى بذهول وسلمى تضحك وقال : يالطيبه ملكتس بعد بكره مستعجله انتي
سلمى تخصرت : لا بس بتجينا ضيفه وبعدين وش قصدك انا دايم وش زيني بس اليوم بزياده
ذيب : اشهد انتس صدقتي
شادن : لا ويقول يولد لوه صح وحده غيرها ماصديت وتمقلت
صالح رفع يده يحك جبينه وضحكو وقالت شيخه : يالله بس ولدي ذرب ماله فهالسوالف
سلمى : يزينتس انتي وللدتس بس لاتثقين واجد
ذيب ضرب ظهر صالح وقال : امش الرجال يمديه وصل وحنا نقرق
وقالت شادن وهي تمشي معهم : يالله بجهز ثيابكم
هزو روسهم وطلعو
لف ينادي : ي سسييفف
فز سيف وبيده المبخره ودخل المجلس وحط العود وبداء يبخر ولف عليه عمه : ابوك وينه ماجاء
سيف : عنده شغله يخلصها ويجي ماهوب بمطول
لف حاكم من وقفت السياره ونزل راشد يستند على عصاته ورفع صوته حاكم يرحب وراشد يرد وصفو العيال معه يرحبون
ونزلت وراه العنود واشر حاكم على باب النساء وتقدمت تدخل وراشد سلم على حاكم وتقدم يسلم على العيال
تقدمت تشوف البيت المتواضع وكان واضح انه كبير وشعبي طقت الباب الي من حديد وهي تسمع الاصوات داخل وفتحت سلمى وتقدمت بابتسامه: سلام عليكم
سلمى فهت تناظرها وابتسمت بخفيف ترد : وعليكم السلام تفضلي حياتس الله
سلمت على سلمى وتقدمت تدخل مكان مادلتها وابتسمت تشوف العجوز الي جالسه على كرسي وتقدمت تسلم عليها وتبوس راسها من تذكرت جدتها الله يرحمها ولفت تسلم على شيخه الي ترحب فيها وترد عليها ومن بعده سلمت على شادن واستراحت تناظرهم بابتسامه
رفعت نظرها من مدت عليها فنجال قهوه ورفعت يدها تاخذه وهمست : تسلمين
هزت راسها سلمى ونزلت الدله تطلع وصادفت ذيب وصالح ومسكت راسها تناظرهم تقدمو يناظرونها بخوف وقالت بصدمه : ماشاءالله تبارك الرحمن
ذيب لف يناظر صالح وقال : شوفي الطريق بنطلع
هزت راسها وشافت لهم الطريق وطلعو وراحت للمطبخ تشوف الشغل
تقدمو يدخلون المجلس و يسلمون وناظرو المجلس وماكان فيه غير ابوهم والعيال واستغربو
يجلسون وتقدم صقر يصب القهوه وجلسو يستمعون لسوالف حاكم وراشد
ثواني وتنحنح عقاب يدخل وقايد وراه وتكلم حاكم : ابوي واخوي قايد
لف راشد بابتسامه ووقف من تقدم عقاب وسلم عليه ولف يسلم على قايد الي جامد مكانه يناظره وناظره راشد واستغرب ملامحه مو غريبه عليه وتقدم قايد بتوتر وسلم على راشد وجلس جنب ابوه
وراشد يناظره ثواني وعقد حواجبه من عرفه وتأكد انه هو
ولف يناظر عقاب وحاكم ويسولف معهم كأن ماصار شي
وبعد دقايق يلف يناظر قايد ولف بابتسامه ل حاكم واشر على ذيب وصالح : عيالك بس هذول ؟
هز راسه حاكم : فيه اثنين اكبر منهم
واشر راشد على نياف وصقر وراكان وسيف : وهذول ؟
حاكم اشر على قايد : هذول عيال اخوي قايد
هز راسه راشد يناظر قايد وصد يسولف مع عقاب وحاكم
وشياب الديره الي حضرو
لفت من دخلت ريم وغطت القدر بعد ماحركت اللحم وقالت : سلمتي
هزت راسها ريم : لا جيت على طول امي راحت لهم
هزت راسها وفتحت الحافظه ريم : عفست تمره ب مضير عشان مع القهوه
تقدمت سلمى واخذت من التمر تاكل وقالت : مشكوره والله مالحقت اعفس زين جبتيه
اخذت المقدع حق التمر وبدت تعبيه ومن خلصو اخذوه وطلعو
تقدمو يدخلون وسلمت ريم ووقفت العنود تسلم عليها ورجعت جلست من جلسو وتقدمت سلمى توزع التمر عليهم وتسمع سوالف جدتها على العنود واستغربت من سئلت جدتها : ابوتس ؟
لفت تناظرها العنود وبلعت ريقها تهز راسها : لا جدي
شيخه استغربت : واهلتس وين ؟
لفت تناظرها العنود بتوتر :
التشبيهات في الانستاء ( rxoa19)
