لف يناظر الشماغ بذهول من قوت مسفر وكيف يحارب اثنين بوقت واحد وهو بين اربع جدران ولوحده
عض شفته يركض ورفع صوته : تعالو خلو سياراتكم
تقدمو ذيب وصقر وريم والعنود يركبون معه وشغل اصيل متجه للديره وجواله على اذنه ينتظر رد
نزل جواله من ماحصل رد وتأكد ان فيه شي وزود السرعه وهو يسمع ريم تصيح وتشاهق وتردد اسم ضاحي والباقين يهدونها
ثواني ووقف عند بيت حاكم ونزل وسلاحه بيده وعاقد حواجبه بعصبيه ويتلفت يبي يلمح بس واحد من العيال
رفع يده يفرك جبينه ولف من تكلم سيف : صخ النوم الساعه وحده الفجر تو تجون
اصيل بعدم صبر : وين ضاحي
سيف باستغراب : في الدكه مع العيال
رفع حواجبه ذيب وتكلم صقر : متى شفته ؟
سيف باستغراب : توي جاي منهم ليه ؟
تنهد اصيل يتكي وتكلم : طلعو لي سطام
عقد حواجبه ذيب يشوفه معصب وهز راسه يدخل يناديه وكان جالس معهم في الحوش وبعد مارد السلام اشر ل سطام وطلعو والباقين مستغربين منه
و ريم والعنود راحو لبيت الجازي
طلع سطام يناظر اصيل وبلع ريقه ورفع يده اصيل : امش
استغربو صقر وذيب وسيف الي واقفين وتقدم سطام عند اصيل الي رجع يدينه وراء ظهره وتكلم : اعجل قل من ذراع مسفر
رفع حواجبه سطام يناظره بتوتر من عصبيته واخذ نفس اصيل يعيد : للمره الثانيه انا قلت لك في امان ومحد جايك علمني من يشتغل مع مسفر ومن الخاين الي يوصل له اخباركم
سكت سطام وتقدم اصيل بقل صبر رفس سطام وكتف يدينه وراء ظهره وانحنى سطام على السياره ورفع السلاح اصيل على راسه ويده الثانيه ماسكه رقبة سطام من وراء ومنزلتها وتكلم بعصبيه : شرايك بدال ماتنحكم مؤبد انهي حياتك
سطام بألم لن اصيل يضغط رقبته : ابقول بس ليه ؟
اصيل بعصبيه ضرب جبين سطام في السياره ورص على سنونه يقول : يمين بالله لن ماتكلمت لافضي السلاح في راسك
سطام هز راسه : خلاص ابقول
اصيل ضغط رقبته : اعجل ؟
سطام : اسمه رعد يشتغل في القسم
رفعو حواجبهم بذهول يناظرونه وكمل اصيل بعصبيه : وش غايته ؟
سطام : قد تعامل مع مسفر عشان يذبح عقيد عندكم كان يبي يفصله ونفذ مسفر وصار رعد يشتغل عنده
اصيل بعصبيه من الي يسمعه : اسمه كامل ؟
تكلم سطام يقول اسمه بالكامل وشد على يده اصيل يرفعه وهمس بعصبيه يناظر ملامحه الي معقده من الالم : قسم بالله لو يطلع كذب لاثور فيك
هز راسه سطام : والله صدق
فكه اصيل يبعد عن طريقه ولف يشوف العيال واقفين ويناظرونهم بصدمه وتكلم : خلكم حذرين وضاحي لايغيب عن انظاركم والبنات وامه
هزو روسهم وهم للحين مذهولين من الي صار قدامهم وتكلم اصيل يناظر ذيب : جهز عمرك بكرا تروح معي
هز راسه ذيب يبتسم : اجيب الرشاش ولا مايحتاج ؟
هز راسه اصيل يضحك : عندك مصرح وش تبي غيره
هز راسه ذيب يدق تحيه وتكلم اصيل : استرح
سيف وصقر رفعو يدينهم يدقون التحيه وتكلم سيف وهو شاد عمره يقلد ذيب : اسمح لنا بس بعد الي شفناه بتصير قدوتنا
ابتسم اصيل يهز راسه : استريح واجبنا ياسيف
نزلو يدينهم صقر وسيف يبتسمون وركب سيارته اصيل يروح ولف ذيب على سطام الي يفرك رقبته ويناظرهم : بعدي اخوي كفو عليك اللهمدها عند الرجال اسوي نفسي ماعلي منك وانت طارح وجهي عنده وش يبى يقول الحين اخوه مع مسفر وعصابته في الفساد وهو معنا
سكت سطام يناظره وتكلم ذيب يضرب صدره : كان نفسي انا الي حاط السلاح عند راسك عشان تحس ولا انت ماش قلب
صد عنه ذيب يدخل ودخلو معه صقر وسيف وتكلم حاكم : وش هالصياح الي برا والهواش
هز راسه ذيب : كالعاده هوشه ماتطول
سكت ذيب مايبي يقول لابوه عن سطام وان اصيل مسكه برا ورفع السلاح على راسه لانه يعرف ابوه فيه الضغط ومايبي يزيد عليه بقصة سطام وبلاويه
سكتو سيف وصقر فاهمين ذيب وتكلمت شيخه : وين العنود وريم ماكانو معكم ؟
صقر وقف : في بيت خالتي ابروح اجيبهم
هزت راسها شيخه تناظر ذيب الي يناظر الفراغ ويفكر : ذيب يمه فيك شي تونس شي ؟
رفع نظره ذيب من كلمته وهز راسه يبتسم نص ابتسامه : لا يمه بس تعبان وابرقد
هزت راسها شيخه : علموك انا بنمشي للرياض ؟
هز راسه ذيب باستغراب : لا ليه نروح ؟
حاكم : نبي نروح نسكن هناك وننفذ وصيت جدك والديره نجيها وقت مناسبات وعياد
ميل شفايفه ذيب يرفع حواجبه : ابد الي تشوفونه معكم فيه
شيخه : بكره الفجر بنمشي
هز راسه ووقف يناظرهم : تمسو على خير
هزو روسهم يردون ودخل قسم ابوه يشوف العنود تو داخله وابتسم يرفع يده على كتوفها وشهقت تلف عليه بفجعه وطبطب على كتفها يسمي عليها وتكلمت العنود : صقر ماقال لي قول انت وش صار براء بعد مادخلنا
ذيب هز راسه يفتح الباب : ماش تحقيق وماتحقيق مهب مهم
ميلت شفايفها العنود تنزل عباتها ونزل ثوبه ذيب يتمغط : اههه يالتعب
هزت راسها العنود تجلس تفتح جوالها : اشوف فيه شناط برا مارحت لهم قلت انهم نيام ماحبيت ازعجهم
هز راسه ذيب يتمدد : ابد بكره الفجر نبي نروح للرياض ونسكن هناك عند عمنا
فتحت عيونها العنود بصدمه : ماجهزت اغراضنا ولا جمعت شي
ذيب هز راسه يمسك يدها يمددها جنبه : معتس وقت يابوي انا قصدي مهب اليوم بكره
هزت راسها العنود من استوعبت ان الساعه وحده وانهم دخلو يوم جديد ولفت من شافته هادي وساكن وتأكدت انه نام ورفعت يدها تطفي النور جنبها وتنام
عند ريم الي للحين شماغ ضاحي في بالها وماهي مصدقه انه طيب لفت تشوف غرفة امها الي من شافت صقر فيه راحت تنام ولفت على صقر الي جنبها : بنام عند امي
هز راسه صقر : الي تشوفينه بس مبي تجيني بكره عيونتس تعبانه
هزت راسها ريم : بتروح ؟
صقر : ابحتري ضاحي لين يجي واروح
هزت راسها تميل جسمها وتحط راسها على رجل صقر وتمددت تاخذ نفس وتحس بيد صقر الي تمسح راسها
سكتت تناظر السقف وتفكر وهمس صقر : بكره بنمشي للرياض ونسكن هناك
حولت نظرها له وكمل : ونجي في المناسبات هذا الي قالوه عمي وابوي
عضت شفتها ثواني وتكلمت : يعني لازم اروح معكم
هز راسه صقر وتكلمت وعيونها تدمع : يجلسون هنا لحالهم مدري عن وضعهم
سكت صقر يمسح راسها وكملت ريم تهز راسها : مقدر اخلي امي وضاحي واروح
بلع ريقه يمسح دموعها وتكلم بهدواء : وش تبين ؟
ريم ناظرته : يطلعون معي مقدر اخليهم هنا لحالهم
صقر : معهم الباقين
هزت راسها ريم : ماعليهم تكله هم يادوب يحفضون ارواحهم ومسفر لو جا ثور فيهم كلهم ومحد رده
تنهد صقر يناظرها وتكلم : الي تشوفينه بس قولي لهم
هزت راسها ولفو من دخل ضاحي الي يتثاوب وتعدلت ريم تجلس وتكلم ضاحي الي جلس عندهم : يالله حيهم
سكتت ريم تناظره بتفحص وتكلم صقر : بكره ماشين للرياض
هز راسه ضاحي : ايه علمني نياف وترا بنروح معكم
رفعت حواجبها ريم ولفت على صقر وكمل ضاحي : اصيل كلمنا يبي نجي كلنا يقول لازم
هزت راسها ريم : حلو ليه يبيكم ؟
بلع ريقه ضاحي يقول سالفة مسفر وخلص وهو يقول : وابد يبينا نشهد ضده عشان محاكمته
ميلت شفايفها ريم تلف على صقر الي يناظرها ولفت على ضاحي : اخذ اغراضك كلها لان حتا انتم بتطلعون معنا ومنتم راجعين هنا
عقد حواجبه ضاحي : وليه ؟
ريم وقفت : بس اذا حنا بنسكن في الرياض انت وامي بتجون معنا ماني مخليتكم هنا ورايحه
سكت ضاحي يميل شفايفه ثواني وتكلم : امي تدري ؟
هزت راسها ريم تشوف امها جالسه على سجادتها : ماهي رافضه
هز راسه ضاحي يسكت وابتسمت ريم تبوس راسه ووقف صقر يستئذن وطلعت ريم توصله وهمست : انتبه لنفسك
هز راسه يشوف ابتسامتها : ابشري وانتي ارقدي وارتاحي
هزت راسها ريم تشوفه رايح ولف يشوفها صقر واقفه على الباب وعض شفته يتلفت واشر لها بعصبيه وضحكت من غيرته لانها واقفه على الباب بدون عطاء وسكرت الباب وهو يناظرها وابتسم يكمل طريقه للبيت وهو يتفحص الديره
