رفعت كتوفها نوف بضحكه وضحكت ود : مالي عيونا كلنا بس ماعلينا الى الصبر عليهم
ورفعت كتوفها وهزت يدها : ماملو عيني
كزتها نوف : من كبر عينك ماشاءالله
دلال رفعت يدها : انس اعجل ابي ككاو
هز راسه انس الي عند العيال يعطيهم وراح باتل ولف عليه صالح : يولد وش تحطون على قهوتكم
باتل رفع كتوفه : مدري والله معرف
سيف : مهو انت الي مسويها
هز راسه باتل : ماسوي انا مدفوع لي اصب بس
هزو روسهم يضحكون : عندنا وعندك خير
هز راسه باتل وتكلم سيف : الفرق مايندفع لنا غصب نسوي
ضحكو وتكلم ذياب يناظر اصيل الي واقف : وين تاتروح ؟
اصيل : للشغل مستعجل والله طالبيني
محسن : كان قعدت شوي طيب
اصيل هز راسه : بحاول اخلص بدري عشان اجي على العشاء
ولف على ذيب وجراح : بطايقكم معكم ؟
هزو روسهم وتكلم اصيل : زين تعالو انتم بعد
ذياب : ماتقدر تعتذر
هز راسه اصيل : لا والله مقدر
هز راسه ذياب وطلع اصيل وجراح معه ولف ذيب على صقر ونياف : العنود عندكم انتبهو لها
هزو روسهم ولف يناظر العنود الي شكت وهز راسه يطمنها وطلع وراهم
ثواني ولفو من دخل اصيل يناظر ضاحي : تعال انت بعد
امجد بضحكه : وش رايك تخاذنا معهم
وقف ضاحي يطلع له ورد اصيل الي عند الباب ويهز راسه : انت خلك عند الشاهي لاينكب
خلص كلمته اصيل وفز امجد وضحك اصيل من سمع صوت الشاهي الي انكب على النار وشاله امجد يزينه
مسح على كتف ضاحي الي جنبه وابتسم له ضاحي يركب مع ذيب وجراح الي يسولفون وركب اصيل يحرك للقسم
دقايق ووصلو ونزلو يدخلون ووقف اصيل عند مكتب عبدالله يتلفت يدوره ثواني وجاء عبدالله الي يصفر وبيده كاس شاهي ويدق رقبه ويدندن ومن شافهم عنده ابتسم : ارحبو
ردو عليه وتقدمو يسلمون وتكلم اصيل بابتسامه : وراء هالروقان شي وشهو ؟
ابتسم عبدالله يهز اكتافه وضحك اصيل من فهم : اسألك بالله صادق
هز راسه عبدالله يفتح الجهاز يوريه وتقدمو يناظرون معه وسكت ضاحي يشووف الي مكلبش وبين جدران وماسك راسه ويصارخ ويعترف بكل شي سواه
واخذ نفس اصيل براحه يشوف ذيب الي تكلم : اعترف من نفسه
هزو روسهم ولفو على ضاحي الي يناظر الجهاز وميل شفايفه اصيل يمسح كتفه وتكلم ضاحي : ابشوفه
لانت ملامحهم يناظرونه وتكلم اصيل : انا كنت جايبك عشان يشوفك قلت يمكن يعترف بس بعد ماعترف بنفسه هونت
ضاحي هز راسه يبعد انظاره عن الجهاز : فاهمك بس ابي اهرجه
هز راسه اصيل يناظرهم ولف على عبدالله الي تكلم : ابجيبه في مكتبك عشان باقي الغرف مزحومه
هز راسه اصيل يتقدم يدخل مكتبه ودخلو بعده
وجلس ضاحي يفرك راسه وهو مايدري ليه قال بيشوفه
وليه بيهرجه بس يحس لازم يطلع الكلام الي من زمان مكبوت في صدره
جلسو ذيب وجراح يشوفونه متوتر وفتح علبة المويه اصيل يعطيه واخذها ضاحي يشرب ورجع يجلس مكانه
رجع ظهره على كرسيه وهو يناظر حال ضاحي وكثير حالات مرت عليه بس يحس هالحاله غريبه شوي يمكن لانهم اب وابنه مايدري فرك جبينه من طق الباب وتكلم : تفضل
دخل عبدالله ودخل مسفر معه واشر له اصيل يسكر الباب بس يكون موجود
وهز راسه عبدالله يجلس مسفر
رفع نظره من حس بالي قدامه وميل شفايفه يناظره ثواني ورفع راسه مسفر يناظره جالس وابتسم : للحين على الكرسي ماتمشي
هز راسه ضاحي يرجع ظهره على الكرسي : وش رايك
رفع حواجبه مسفر من بروده : ابودع ماتبي تودعني
ضاحي ضحك : مناديك عشان اودعك اصلن
سكت اصيل يناظرهم بتركيز
وتقدم عبدالله يجلس جنب ذيب وجراح ويناظر معهم وتكلم ضاحي يهز راسه : المفروض اني احزن صح المفروض اصيح واقول خلوه
مسفر : المفروض تجي تحب راسي
قاطعه ضاحي بعصبيه : تخسي
رفع حواجبه مسفر وكمل ضاحي : باي حق احب راسك باي حق تقول لي كذا
مسفر ببرود : لاني ابوك وماتقدر تغير هالشي
ضاحي وقف بعصبيه : منت ابوي ولاتقول هالكلمه لانها ماتليق عليك وينك عشان اقولك ابوي وش سويت عشانا عشان نحس فيك ونقدرك كل يوم وحنا في ملعنه كل يوم وحنا في صياح وفي هواش عشان تجلس معنا كم دقيقه بس
لاهي مع هالزفت واذا جيتنا مديت يدك واخذت الي تبي ورحت
عض شفته اصيل يناظر ضاحي الي وجهة احمر من العصبيه وكمل ضاحي : تراك للحين تحسبني جاهل ومدري ان نص جسم امي محروق منك امي الي تحملتك وصبرت عليك وعلى بلاويك عشان قالت لك عيالي ماعندهم اكل صبيت عليها الزيت حار وطلعت وكانك ماسويت شي
وهذا هي ساكته وماسوت شي عشان عيالها يعيشون براحه ومحد يناقرهم ويذيهم بهالسالفه
والله مانساها ومانسا صياح امي وهي تستنجد فيك وتصيح من الالم وتقول ماني فاضي لتس وكل يوم ادعي عليك كل يوم اتذكر الي سويته في امي واتحسب عليك كل يوم اقول ياليتك مت وحنا ماشفناك ولو مايبقي غيرك بيني وبين الجنه ماسامحتك
وكل شي سويته فيني وفي ريم كنه على كبدي وانتظر بس يزفون لي موتك عشان ارتاح وياليته يكون على يدي والله العظيم ماتنزل دمعه وحده من عيونا عليك لانك ماتستاهل لا رحمه ولا شفقه
تنهد من حس انه طلع كل الكلام الي بجوفه بصراخ ولف على اصيل الي يناظره بذهول : متى محاكمته ؟
اصيل : بكرا الصبح والتنفيذ بعد اسبوع
هز راسه ضاحي : ابحضر ولو تخلوني انا الي اعدمه احسن بعد
عض شفته ذيب يوقف يمسح كتفه يهديه
وقف عبدالله ياخذ مسفر الي منزل راسه ومانطق ولا حرف وطلعه برا
وتكلم جراح : اجلس ارتاح
جلس ضاحي يشرب مويه وهو يناظر مكان مسفر
وتكلم اصيل : بكرا في المحاكمه يقررون متى التنفيذ قلت بعد اسبوع لانه يوصل كلام للي يتعاونون معه
سكت ضاحي وتكلم ذيب : وش صار عن الي ذاك اليوم الرجال
اصيل : في التحقيق للحين ماطلعت نتيجه
هز راسه ذيب وتكلم جراح : ليه جبتنا طيب ؟
اصيل : جبتك ياطويل العمر لان فيه مهمه وبتجون معي فيها
ذيب : لنفس الشله ؟
رفع كتوفه اصيل : حسب التوقعات لهم علاقه في مسفر وشلته بس اذا هم نفسهم ولا ثانين بنشوف
هز راسه ذيب وتكلم جراح : نرجع خلاص ؟
وقف اصيل : جيتو معي وترجعون معي بس دقايق ونطلع
هزو روسهم وطلع اصيل وجلس ذيب يناظر ضاحي : تحسنت
هز راسه ضاحي يمسح صدره : كملها هنا وكاتمتني والحمدالله طلعت وارتحت
ابتسمو ذيب وجراح يناظرونه ثواني وتكلم جراح : اتوقع محد بجايكم دامكم هنا
لفو عليه وكمل : اقصد عصابة مسفر
ميل شفايفه ضاحي وتكلم ذيب : ولو لازم ننتبه
ضاحي ناظر ذيب : وش سالفة الرجال الي تسئل عنه اولا
تكلم ذيب يقول سالفته وتكلم ضاحي بذهول : وفي القسم
هز راسه ذيب وتكلم جراح : وسطام هو الي قال
هز راسه ذيب : لانه معهم وقاله اصيل ان محد جايه وشكل سطام منخرش منهم مدري شكلهم قايلين له شي
جراح : اجل لازم تنتبهون لعياله وزوجته
ذيب بعدم اهتمام : فاللعنه زوجته ودي انهم يقضون عليها بدال سطام وعياله معنا مهم رايحين معه
ضاحي : ابوك يدري ؟
هز راسه ذيب : لا لو يدري ثور فيه من اول ثانيه
جراح تكى : عاد تدري احسكم منتم راعين هالسوالف بس وش جابها على اخوك
ذيب رفع كتوفه : مالنا دخل حنا السالفه مع جدنا الي فكهم ويوم خربو شدد علينا وخلاهم بس سعيد حليل واشوا سحب نفسه قبل يدخل ولا سطام خرب وماعرف ايتصرف
جراح : ماقالكم طيب ؟
هز راسه ذيب : سطام مايهرج واجد ترا يكتم لين تنفجر السالفه
ميل شفايفه جراح ولفو من دخل اصيل ومعه اوراق وحطها في ملف وهو يقول : خلصت امشو
رجع الملف في الدرج وطلعو وطلع وراهم يقفل مكتبه ويمشي معهم
