وبعد دقايق دخلو البيت وكانو جالسين ينتظرون الفطور ولفو عليهم وتكلمت شيخه الي طالعه بصحون وبناتها وراها : وينكم من امس ؟
تقدمو يجلسون وتكلم ذيب : فالعزبه
سكتو يناظرونهم ونزلو الفطور ولفو من دخلت زينب وعيالها كلهم وتقدمو يجلسون معهم ولفت زينب : وين ساره ؟
رزان : مشت الفجر لبيتها
زينب ضربت رجلها : حسافه فاتتها سالفه
الجده سلمى: عسى خير
زينب لوحت بيدها : والله مدري مير اسمعو
لفو عليها وهم يفطرون وكملت ( وطبعاً زينب دايم ماتنسى بهاراتها لازم تزيدها فهمتوني ؟ ) : قبل كم يوم دخلو ريجيل غرب في بيت الجازي وغدوهم وضيفوهم
وريحة البخور تعج حول بيتها
استغربو وتكلم عقاب : ومنهم الرجال ؟ ماشفناهم
زينب رفعت يدينها : غرب مانعرفهم وداخلين بيتهم وهي عجوز يادوب تقدر على نفسها ومعها ولدها تعبان ماهو بقادراً يضيف وبنتها تدور من بيت لبيت الا هذاك اليوم ماطلعت من بيتهم
الجده سلمى: لاتدخلين في النواياء يمكن من اهلهم زايرينهم
مشاعل بلقافه : اهلهم كلهم نعرفهم من وين طلعو هذول وبعدين الي سمعناه انهم مرخصين بنتهم عشان الفلوس وفلوسهم هالايام زايده
انصدمو من كلامها ولف ذيب على صقر الي يناظره
الجده سلمى بعصبيه : عيييبب وش هالكلام
وتكلمت شيخه : مستحيل هالشي يصير فيهم
زينب : انا مدري انتن ليه حاباتهن وهن هالون وسواد وجها
انا اقول ريم هذي لاعاد تجي مع بناتنا بتخربهن نفسها
عقاب بعصبيه: بسس وش هالسوالف الماصخه عيب عليتسن
ناصر : ابوهم تاركهم من عرف سواتهم ولا فيه ابو يهجر مرته وعيالها
رفع حواجبه قايد يناظره وسكت من رفع صوته صقر بعصبيه : بس عاد لمتى وانتم تزيدون بهارات على السوالف
زينب : هذا الي سمعناه مازدنا شي
ذيب : كل الي قلتوه كذب في كذب
ناصر : وانتم حاطينكم محامين عندهم تدافعون عنهم
صقر وذيب ناظروه بعصبيه وتكلم صقر : السالفه ندري عنها عشان كذا نسكتكم
مشاعل : لاتتبررون فعلتهم لان مافيه غير هالكلام
حاكم لف على ذيب وصقر : وش تعرفون ؟
لفو يناظرون بعض ولفو على زينب وتكلم ذيب : الريجيل الي تقولينهم هذول ابوهم وعمامهم وماضيفوهم ولا بخروهم لانهم جايين بشرهم
تعدلو الكل يناظرون بصدمه وكمل صقر : جايين يفرقون بينهم ويخاذون بنتهم
عقاب بعصبيه: ومتى جو ماشفناهم
ذيب : جايين بوقت الكل نايم عشان ماتدرون وقت عشى ابوي للشايب هذاك
قايد : ومن قايل لكم ؟
صقر : ضاحي
ناصر ضحك : عشان يستضعفكم ويطلع اخته من الفضيحه
الجده سلمى بعصبيه: لاتهرج عن البنت كذا
سكت ناصر يناظرهم وكمل صقر : جايين بالدس يهددونهم وعشان ياخذون ريم غصب عنهم ويتركون الام والولد
حاكم : لاحول ولا قوة الا بالله
عقاب : وش قالو لهم ؟
ذيب : وش يقولون مايقدرون عليهم هم ونجاستهم
عقاب مسح وجهة بغضب ووقف يطلع
لفو يناظرونه ووقفو حاكم وقايد يطلعون وراء ابوهم وتكلم ناصر برفعة صوت : تأكدو من طهارتهم قبل تسوون شي عشان ماتتفشلون وتفشلونا معكم
فارس كز اخوه بعصبيه وتكلم : لازم تدخل عمرك في المشاكل اسكت لو يوم لايطلع حسك
مشاعل: وهو صادز ليه تسكته
لفو من رفع صوته صقر : تاتسكتون ولا اثور فيكم
شيخه : كم لنا وحنا نعرفهم وماشاء الله عليهم ماصدق هالكلام فيهم
رزان وهي تفكر : مستحيل صدق
سلمى : اصلن من الي مايستحي وقايل هالكلام عنهم ؟
لفو عليها زينب ومشاعل وتكلمت الجده سلمى وهي تناظرهم: انتي ماتاخين وبتس ماتدرين ان الدنياء دواره وتاترجع لتس ولعيالتس
مشاعل بشوفة نفس : ومن يتجراء يطلع عننا حرف كذب
شادن : راقده انتي ماتدرين عن الي ينقال حولتس
لفت تناظرها مشاعل وتأففت بعصبيه ولفت تناظر ذيب
وتكلم نياف وهو يوقف : انا جهزت اغراضي وبروح للدوام توصون شي ؟
رزان : زين انتبة لنفسك وفكر في الموضوع الي قلته لك
سكت نياف يناظرها وهز راسه وطلع وتقدم راكان يجلس جنب جدته ورفع يدينه يهمز رجولها وتكلمت : اكيد تبي شي
راكان ابتسم وتكلم : ابيتس تقنعين جدي اتوضف واروح مع نياف
ضحكت الجده سلمى وضحكو معها وتكلمت رزان : لو يوافقون انا ماوافق
راكان : يمه طفشت وانا كذا
رزان بابتسامه: لا يعني لا
تأفف راكان يتكي وناظر العيال الي وقفو وتكلم : وين ؟
صقر : مالك دخل
ناظرهم راكان بابتسامه وطلع وراهم
شيخه بهمس : الله يصلحكم ويهديكم
الكل : امين
......................................
في بيت شيخ القبيله ( ابو راضي )
دخلو عقاب وعياله وسلمو وجلسو وتكلم ابو راضي : القهوه يراضي
راضي وهو يركض : ابشر يبه ابشر
لف على عقاب وعياله : يالله حيهم
عقاب وعياله : الله يبقيك
وكمل عقاب : ندري ان الوقت ماهو وقت مناسب مير صارت مشكله ونبي فزعته
ابو راضي : ابشرو والله امرو
عقاب : مايامر عليك عدو. لاكن الي جيت عشانه مايخصني لوحدي الا يخصنا كلنا وحنا لازم نوقف مع بنتنا
ابو راضي عقد حواجبه وناظر حاكم وقايد وناظر عقاب وهز راسه وكمل عقاب : ابو ضاحي راجع للديره ماهو لوحده جاي ومعه شر
ابو راضي بعصبيه : انا ولد ابوي ومن سمح له يدخل الديره ؟
حاكم : العلم انه جاي بالدس وتراه مهدد ام عياله وولده ويبي يفرقهم وياخذ بنته معه
تقدم عندهم راضي بالدله وقهواهم ولف على ابوه من تكلم : راضي انقز وناد كل شياب الديره وعيالهم بسرعه
هز راسه راضي ونزل الدله وطلع يركض وهو مستغرب وصادف العيال قدامه وتكلم ذيب : وش فيك مطرود ؟
راضي وهو يركض : ابوي يقول ناد الشياب وعيالهم اسبقوني للمجلس وبجيكم
هزو روسهم وكملو طريقهم لمجلس ابو راضي
