ضحكت من طول يضحك وهي تعرف انه كشفها وعرف وركضت مع السلم راجعه للبنات لفت من سمعت الباب فتح وتكلمت ود تناظرها اعلى السلم : فيه احد
هزت راسها نجود : البنات متجمعات تعالي والعنود بتجي بعد شوي
هزت راسها ود وراحت نجود ركض ومشت ود مع السلم ونزلت نقابها تدخله في معصمها
طاح جوالها بين درجات السلم وتأففت تاخذه
رفعت نفسها تلف راسها وتكمل طريقها ووقفت من صقع راسها وغمضت عيونها تقول بعصبيه : يربي ليه يومي زفت كذا
عند نياف الي جاي مستعجل ويناظر جواله يقراء رسالة هذال له ومانتبه الى من صقع معصمه وعقد حواجبه يبعد نظره عن جواله للي قدامه وكانت مغمضه عيونها وتكلم : احد يمشي مع سلم وهو مغمض عيونه ؟!!
صد نياف من فتحت عيونها تناظر الي واقف وبينها وبينه درجتين ونزلت نظرها لجوالها وهي متوتره وناسيه انها كاشفه : جوالي طاح ونزلت عشانه مانتبهت لك
نياف رفع معصمه : وانمسح نص مكياجتس في ثوبي
عضت شفتها ود وغطت فمها وشهقت من استوعبت وجهها مايغطيه شي وهي مستغربه ليه هو صاد بعيونه عنها : اسفه والله ماكان قصدي
هز راسه نياف يرجع يرقى : حصل خير
عضت اصبعها ود ترقى وتشوفه راح للجهة الثانيه وركضت لغرف البنات
فتحت الباب من سمعت صوت ترف ونجود وراه
وسكرته بسرعه تحذف نقابها وجوالها على الفراش وتغطي وجهها بفشله
عقدو حواجبهم يناظرونها وتكلمت نجود : شفيك طولتي ؟
ود ضربت خدودها : يويلي يويلي يفشلتي يفشلتي
شادن ضربت رجلها بخوف : اخلصي علمينا
قالت لهم ود السالفه وهي ماسكه خدودها وشهقو البنات وتكلمت ترف : منهو طيب ماعرفتيه ؟
ود هزت راسها : لا بس لاف راسه بشماغ اسود وثوبه ابيض
شادن : لا عرفناه يالمهبوله كلهم يلبسون نفس اللبس
ترف : بس نياف هو الي يلبس شماغ اسود الباقين مايلبسون كذا
هزت راسها شادن تناظر ود : احمدي ربتس طحتي في واحداً ماعرس يمكن تعرسون
ود فتحت عيونها : يربي انا ليه مارجعت ليه كملت وجيت
ضحكو البنات يهدونها ووقفت ود تشوف المرايه : قال انمسح مكياجك في ثوبي
ترف : يالمهبوله حاطه مكياج الحين يبى يقول مهب طبيعي زينها
ود بعدم اهتمام : احسن مافكر انا اصلن وبعدين ماجاز لي
طاحو البنات يضحكون
ودخلت العنود وبيدينها اكياس وتكلمت : من الي ماجاز لك ؟
عضت شفتها ود تناظرها وتكلمت شادن : ترا اخوها لاتسبينه
رفعت حواجبها العنود تجلس على السرير وتفتح الاكياس وتكلمت تناظر شادن : مافيه قهوه من يدينك الحلوه
فزت شادن : ابد ابشري عشر دقايق وتجهز
هزت راسها تناظر ود الي عند المرايه : وين الباقيات ماجو ؟
ود رفعت جوالها : بتصل عليهم اشوف جيت وهم نايمين مدري صحو ولا
هزت راسها العنود تناظرهم : وين ريم ؟ شفيكم ناقصين قلت بجي وبحصلكم كاملين ؟
ترف : فوق في غرفتها
وقفت العنود وفزت ترف تاخذ الاكياس واخذتها العنود بسرعه تخبيها : انتظرو لين نكمل
هزت راسها ترف بيأس ولفت على نجود تسولف معها
وطلعت العنود للدور الثالث
رقت وناظرت الغرف وهي ماتدري ايت غرفتها وتكلمت : ريم ريم
ريم الي فتحت الباب : هنا
تقدمت عندها العنود : تعالي مجتمعين البنات وجايبه معي شبسات وحلا
ريم هزت راسها : والله ودي بس باقي ماخلصت ترتيب والعمال بيجون يركبون السرير
العنود بأصرار : تعالي واذا ركبو السرير ترتبين يالله لاتفوتين هالقعده
هزت راسها ريم بعد تفكير و نزلت الاغراض الي معها واخذت عباتها تطلع للعنود الي تكلم اريج تقول لها تنزل وطلعت معهم اريج ونزلو للبنات
دخلت تشوفهم كاملين وجلست عالسرير تفتح جوالها وتسمعهم يسولفون وينتظرون شادن والقهوه
شافت رساله من جمان وفتحتها تقراها : ماشفته من امس وسئلت امي قالت ماتدري عنه حتى ابوي
اخذت نفس تكتب لها : جا الظهر وتضارب مع ذيب
ارسلتها تقفل جوالها ودخلت شادن معها الصينيه واخذت الكيس تعطيه البنات وصبت قهوه شادن توزع ولفت من تكلمت نوف : قال جراح حصلوك في المحكمه
هزت راسها ترف وتكلمت ريم : ليه؟
ترف : كنت اطبق وحصلتهم في نفس القاعه
ميلت شفايفها العنود تناظر ريم الي تتقهوى وصاده وتكلمت تغير الموضوع : شخبار سميره بعد الخطبه ؟
رحاب : من الفجر وهي ترقص فرحانه
جيهان : مستحيل تستحي
هزت راسها العنود : بعيد عنها اصلن
نجود بتمثيل الاستغراب : يجي يخطب بدون امه وخواته شلون ؟
رفعو اكتافهم بمعنى ماندري وتكلمت نوف : اتوقع مو راضين
رفعو حواجبهم باستغراب و ميلت شفايفها العنود تشوف جمان ترسل وتسمعهم بدو بسالفه جديده
