هزو روسهم ووقف سيف : صالح يحتريني فالقهوه ابروح له
هزو روسهم وطلع سيف ووقف صقر يستأذن وطلع وبقي نياف الي دخل غرفته وتكلم : اخذي راحتك محد يجي للبيت كثير انا برقد
هزت راسها وابتسمت تناظر المكان الي صار هادي
لفت على جوالها من اتصل سناب واخذته ترد وتفتح الكام : وحشتيني
ثبتت الجوال على مكتبها وتكلمت : بعد روحي كيف وضعك
ميلت شفايفها: زين وانتي
نجود : يعني كويس سوري مارديت لما دقيتي كنت فالعمليات
العنود : معذوره ياروحي
ضحكت نجود : مبين الوضع من البدايه هادي
العنود : تو طلعو وبقيت
نجود : انتظري بس اجيك واعوضك عن ه الطفش
العنود تنهدت : تدرين حسيت براحه مدري ليه فجأة ارتحت لهم
نجود ابتسمت وكملت بهمس : بس لازلت عند وعدي
نجود : كويس
العنود باستغراب: وين جوجو ؟
رفعت اكتافها نجود : ماعرف
سكتو من دخل ايموجي جمان وابتسمو ودخلت جمان معاهم وفتحت الكام : اهلن يقدعان
ضحكو العنود و نجود : اهلين
جمان : ازييك ياقمر ؟
العنود : زينه وانتي
هزت راسها : عال العال
نجود ضحكت : بالله جمان وش طالعه منه ؟
جمان ضحكت : من فلم تامر حسني
ضحكو وتكلمت العنود : شكيت والله
نجود : قديم لك سنتين وانتي تعيدينه خلاص
جمان : ماتوب ماتوب
ناظرت رقم ابراهيم من اتصل وتكلمت : بنات برد على ابراهيم باي
قفلت ترد : هلا
ابراهيم : وصلت
العنود : يالله جايه
قفلت تلف حجابها وطلعت لفت من شافت باب مفتوح وطلت منه وناظرت الحريم جالسين لفو من انتبهو لها وتكلمت الجده سلمى : تعالي اقعدي معنى
العنود : دقيقه بس
سكتو وتقدمت تفتح الباب وتلفتت وشافت ابراهيم واقف واشرت له
وتقدم عندها والشركه معاه
وتكلمت : هذا هو البيت
هز راسه ابراهيم وتقدم يكلم العاملين
ورجعت العنود تجلس معهم ناظروها وتكلمت : وين ابوي ؟
رفعو اكتافهم وناظرت البنات الي يناظرونها وصدت
لفو من سمعو اصوات اجهزه وتكلمت شيخه : بسم الله وش هالصوت
ابتسمت: جبت شركه تنظف البيت لان فيه حشرات ومغبر
ناظروها باستغراب وتكلمت ساره : مافهمنا
العنود : صبر يخلصون وتفهمون
سكتو يناظرونها ولفو من دخلت الجازي ومعها ريم وناظرو العنود واستغربو يسلمون ويجلسون وتكلمت العنود : انتي ريم اذا ماخاب ظني صح ؟
هزت راسها ريم وناظرت البنات وهمست : وش جابها ؟
ترف : طلعت بنت خالنا قايد
فتحت عيونها بذهول تناظر العنود وكملت سلمى : وجت تعيش معنا
ريم : ابتس قولي لها تنحاش لاتجلس
ضحكو البنات وتكلمت الجده سلمى : العنود
لفت عليها العنود وكملت : انتي بتعيشين معنى من اليوم ورايح ترا حبنا لتس من حبنا للبنات هذلي ونتعرف عليتس وتعرفين علينا ومابيننا اي رسميات ولازم تتعودين على العيشه هنا ويدتس فيدنى
سكتت العنود تناظرهم وهزت راسها : اوكى بس بشرط
ناظروها وكملت : محد يتشرط علي ويتدخل فيني
سكتو يناظرونها وهزت راسها الجده سلمى : تم
ابتسمت تناظرهم وتكلمت ساره : انتي من قبل تعرفين انه ابوك ولا تو
هزت راسها وميلت شفايفها : ماكنت اعرف حطيت في بالي انه راح مع امي
ناظروها وكملت : اقصد من الشخص الي تكلم مع جدي وقال انه توفى في حادث ومن بعدها اختفى وصدقنا هالشي بس وقت عزاء جدي انصدمت من قالو ابوك جاء بيكلمك
شيخه : وتأسف وطلب ترجعين
هزت راسها تسكت وتناظرهم وتستمع لسوالفهم
.............................
تقدم يناظرهم ف الدكه ودخل : سلام
ناظروه وردو : عليكم السلام
جلس يتكي وتكلم ظافر : وش العلم
تنهد يناظرهم وتكلم ريان : انا للحين ماصدقت
صقر : تاتعرفون روحو هرجو ابوي انا مالي دخل فالموضوع
جلال بضحكه : تسمح لي اروح اهرجها دام جت بدون سواقها هذاك
ناظره صقر وضحك جلال وتكلم ظافر : يولد ماتدخل في العقل كيف تصير اختك
تأفف صقر وتكلم ريان : اخته من ابوه
ذيب : خلاص يعيال لاتزيدون عليه هو بنفسه مايدري
صقر اشر على خشمه : تراها واصله معي لهنا
سكتو يناظرونه ثواني وتكلم ظافر : الشمس غابت وحنا طولنا
ريان : وش عندكم ؟
ظافر : موصيني ابوي في غرض وبروح
هزو روسهم ووقف يطلع وطلع وراه جلال لف وناظر ريان وذيب الي متكين وتقدم ينسدح بتعب
وتكلم ريان: يرجال انت ماتطمن اليوم
صقر : اكيد جايك وانا شايل عشرين بلكه على ظهري
ناظروه بصدمه وتكلم ذيب : وراك
صقر : جبتها لجدي مدري وش يبي بها
ريان : وجدك مسكت معه بلك اليوم
صقر : يرجال زين مافلقني بها انهد حيلي رايح جاي لين شلتهم ثلاث مع بعض
فتح عيونه ذيب بصدمه : صاااحييي؟؟
صقر : تعبت ماعاد فيني حيل
سكت ذيب من اشر له ريان بمعنى اتركه واخذ نفس يناظر صقر الي منسدح على ظهره
...............................
لفت من دخل نياف وهو معفوس وضحكت من شكله وتكلم : داخلين علي فلبن من جابهم ؟
وقفت تناظره : سوري نسيت انك نايم انا جايبتهم عشان ينظفون
نياف بنرفزه : وش دخلهم علي
ضحكت تناظره وناظرت لبسه المليان صابون وتكلمت : طحت فالصابون
نياف مد يده : وش رايتس تعالي طلعيهم معرف هرجهم
هزت راسها تتقدم للبيت ونياف وراها وقفت عند ابراهيم وتكلمت وهي تناظر نياف : داخلين مخربين نومته
ابراهيم ناظر نياف وابتسم وتكلم نياف بعصبيه: ياوادم وش فيه يضحك اقول طلع هالفلبن من غرفتي لادخل اهجدهم
ضحكت العنود وتقدم ابراهيم يدخل ولف يناظر العنود واخذ نفس بعصبيه وتكلمت : طيب اهداء
تخصر نياف ينتظر وبعد ثواني طلع ابراهيم وناظره : رفضو يطلعون يقولون انه فيه عناكب ونمل معششه داخل لازم ينظفونها عشان ماتنتشر في البيت وتزيد
نياف رفع يده يحك راسه : وانا كيف ارقد
العنود بقرف: دقيقه بقولهم ينظفون شعرك
نياف بعصبيه : ترا ماستهبل اتكلم جد
العنود رفعت اكتافها : دور لك مكان تنام فيه البيت لازم يتنظف
تأفف نياف ولف من سمه صوت اذان المغرب وناظرهم : سمعتو اذن ارجع من الصلاه احصلهم خالصين
هزو روسهم وتقدم يدخل الحمام الخارجي
لفت من سمعت صوت ورجعت تطل مع الباب وكانو حاكم وقايد راجعين ابتسمت تتقدم عندهم وناظروها وتكلم حاكم : سلمى روحي طلعي لي ثوب واكويه
هزت راسها سلمى ودخلت وتكلمت الجده سلمى: وش عندك ؟
حاكم : معزومين في الديره الي جنبنا ولزم الا نتعشى عنده
هزت راسها الجده سلمى وتكلمت شيخه : وعمي
قايد : ماظنتي يروح
لفو من تكلمت العنود : ومتى بتروح للعزيمه ؟
قايد : قبل العشاء بشوي وش عندتس ؟
تكتفت تتاظرهم جالسين وكملت : مابيك تروح وانت مادفعت للعمال الي داخل
لفو عليه قايد باستغراب: وش جابهم ؟
العنود : جبتهم ينظفون البيت والمكيفات ويبون فلوسهم
قايد لف يناظرهم يناظرونه وهز راسه : وكم يبون ؟
رفعت اكتافها تمشي: ماعرف اسئلهم
سكت قايد يناظرها لين دخلت وتنهد يصد
