هزت راسها العنود بالنفي ورجع يتصل الرقم وتكلم ذيب : عطيني ارد واشوف نهايته
هزت راسها ترد وتحطه سبيكر وجلسو ثواني بدون لاحد يتكلم وسكرت الخط العنود تناظر ذيب ورفع حواجبه ذيب : مجنون صدز
رجع يتصل الرقم وتأفف ذيب بقل صبر واخذ الجوال يرد ويحطه عند اذنه : يمين بالله لن رجعت تتصل لادخل عليك من الجوال واقطعك تقطيع تفهم
سكت من سمع ضحكه وعقد حواجبه يناظر العنود الي تضحك من شكله ونزل الجوال يحط سبيكر وسكتت العنود من سمعت الضحكه وعضت شفتها تأشر لذيب يسكت وسكتو ثواني ووصلهم الصوت : وانا اقول ليه بندر يلاحقني لاتكون حبيب نودي الجديد
سكت يناظر العنود وهمست العنود في اذن ذيب وهز راسه يتكلم : من معي ؟
سميرة : كلامي مو معك مع العنود وين ؟
ذيب فتح عيونه يناظر العنود واشرت له العنود وهمست له بعد ماحطت كتم ورجعت فكت الكتم وتكلم ذيب : العنود ماهيب فاضيه لناس رخاص عندها الي اهم
ابتسمت العنود وعصبت سميرة : قلت كلامي مو معك
مدت يدها تسكر في وجهها وضحكت تحضن ذيب : شكراً
ذيب حاوطها بعدم فهم وبعدت وتكلم : وش السالفه ترا مافهمت ؟
هزت راسها العنود تقوله قصة سميرة ومن تكون وليه قاعده تسوي كذا وتكى ذيب يسمع القصه وبعد دقايق ميل شفايفه يتكلم : اوفف وانا احسبتس مسالمه طلعتي مثلنا
العنود : شسوي ناس حسوده مايمشي معها الا كذا
ذيب : وتصير بنت محسن ولد عمي ذياب
هزت راسها العنود وتكلم ذيب : وانا اقول ليه ذياب متوتر يوم يهرجتس
العنود : عارف فعايل حفيدته ومايدري شيقول
ميل شفايفه ذيب يفكر وتكلم : وراتس قمتي انتي
العنود رجعت تنسدح : تعبت وبنام شوي
ذيب هز راسه يغطيها وتكلمت تناظره : بتروح لهم
هز راسه : لازم مقدر اخليهم
سكتت العنود وكمل : خلصتي شغلتس انتي ومقاظيتس
العنود : بكرا توصل كامله
هز راسه ذيب يقوم يلبس ثوبه من سمع اذان العشاء وتكلم : ابروح للصلاه ويمكن اطول لان العيال بيتجمعون في الدكه
هزت راسها العنود وتقدم يبوس راسها وطفى النور يطلع
ناظر شادن الي جايه وهز راسه بمعنى وين وتكلمت : ابي العنود
ذيب : تعبانه ورقدت خليها تريح شوي
هزت راسها شادن : ذكرني لانساء
هز راسه يضرب راسها : مسرع تنسين جدتي ذاكرتها احسن منتس
شادن : والله شكل انا جدتكم من الاعراض الي احسها
رفع حواجبه يناظرها وضحكت تنحاش وابتسم يطلع بدون اي كلمه
ناظرهم يجهزون عشان الصلاه وبعد ماخلص اخذ البخور وسيده على المسجد يبخره وبعد ثواني امتلا المسجد بالرجال كلهم وطلع المبخره عشان ماتكتمه وقت الصلاه وفتح الشبابيك من حس بالكتمه وطلع برا ياخذ نفس
جلس على العتبه ولف من جلس جنبه جراح : شفيك
ذيب : انكتمت من البخور
ناظره جراح ثواني بحذر ووقف من اقام الامام ووقف ذيب يدخل بعده ووقف بالصف قريب الشباك وبدو بالصلاه
طلعو بعد مالبسو وناظرو الي جالسين وتكلمت ترف : منتم جايين للصلاه ؟
ساره : انا ابروح في القيام تاتررحن انتن ؟
هزو روسهم ترف وشادن وتكلمت جهير تناظر بناتها : تاتررحن تصلن ؟
هزت راسها دليل تتكلم : قالت ياسمين تاتررح ومعها البنات
هزت راسها جهير تناظر ياسمين و ود وجيهان ودلال الي طلعو معهم
وطلعو يمشون للمسجد وفي طريقهم صادفو امنه وام ظافر وام عساف
ومشو رايحين للمسجد وماكان بعيد عنهم وصلو ودخلو يسمعون الامام من كبر وبدا صلاه وصفو يصلون معهم
