سكت يمسح راسها ورفع راسه يناظر السقف بتفكير
معقوله يفقد وعيه عشان بشروه بولده لهدرجه مايبيهم يتهنون
اخذ نفس يتكي بتفكير وناظر نوره من انسدحت وسكت يطبطب على ظهرها تنام
تقدم حاكم يجلس جنب ذيب وناظره ذيب يهز راسه : وراك ؟
حاكم اشر على صدره : عمي قلبي ناغزني ماني بمراتاح لطيحة جدي عقاب
طلع لسانه يسكته من رفعو روسهم نوره وسحاب
وتكلم ذيب : جدك ماجايه شي بس تعب من الشغل
سكت حاكم وهو كبير وفاهم ويعرف ان جده كبير في السن ومعاد فيه حيل وسكت لان ذيب مايبيه يخوف نوره وسحاب اكثر
رفع راسه من تكلم ذيب : وين الباقين ؟
حاكم : جدتي شيخه تاتمرح مع جدتي سلمى وعمتي ساره وشادن مع البنات في الحوش
ذيب بهدواء : والعيال ؟
حاكم : طلعو
لفو من دخلو شادن والبنات ووقف ذيب يطلع
وناظرته شادن : وين العنود ؟
ذيب : نايمه
هزت راسها وطلع وناظرت البنات تجلس
لفت على الزاويه وكانو نوره وسحاب نايمين
وتنهدت تتقدم تقومهم وتدخلهم ينامون في فرشهم
ورجعت للبنات الي يناظرون فراغ ويفكرون وسكتت تناظر الفراغ وتفكر معهم
وقفو من طلع الدكتور وتكلم يهديهم : الا الان فاقد الوعي بننتظر اربع وعشرين ساعه ونشوف
هزو روسهم يرجعون يجلسون ولف نياف على حاكم : عمي ابرجعك للبيت وارجع اجلس عنده
هز راسه حاكم بالنفي يشبك يدينه بتوتر وسكت نياف يرجع ظهره وطلع جواله يرد على اتصال ذيب : هلا ذيبان
ذيب : هلا بشر كيف جدي
نياف وقف يتبعد : لهالحين فاقد الوعي ماصحى
ذيب : شافه الدكتور
نياف هز راسه : ايه يقول نحتري اربع وعشرين ساعه اذا ماصحى بيتصرفون
هز راسه ذيب : وابوي وينه
نياف ناظر عمه الي جالس مكانه : موجود معيي يرجع ونبي نجلس لين بكره
ذيب : طيب ابسكر وكلمني اذا قام جدي
هز راسه نياف : ابشر
بعد الجوال يسكر ويناظر جدته
................................
الصبح صحى الكل من بدري وهو قلقان وللحين ماوصلهم خبر عن عقاب
ويراقبون الجوالات ينتظرون اتصال نياف
ثواني قليله ودخل نياف سلم يجلس وناظروه بتركيز وتكلم : صحى مابه لون وعمي جلس عنده لين يطلعونه
تنهدو براحه يناظرونه وتكلمت الجده سلمى : وراك ماجبت عمك وجلست انت عنده ؟
نياف : والله حاولت ازريت فيه معيي الا يبي يجلس وخليته ماحبيت اضغط عليه
هزو روسهم يسكتون وتقدمت زينب تنزل الفطور ومشاعل وراها بالقهوه
وجلسو يفطرون بهدواء
دقايق وطق الباب ووقف فارس يفتح ودخلو امنه وحنين سلمو وردو السلام بهدواء وتكلمت الجده سلمى : يالله صباح خير
حنين : الخير وجهتس يخاله
ساره : اذا تبن البنات داخل
امنه هزت يدها : مالتس لوا مير بغينا العنود
ناظروهم وكملت حنين : سمعنا انها تعبانه وجينا انتطمن ورايحين
لف ذيب من كزته شيخه وناظرها وهمست له : ادخل وعلم العنود تطلع اللهن لايدخلن وقلها ماتعلمهم بحملها
عقد حواجبه ذيب يهمس : وليه ماتعلمهن ؟
الجده سلمى بتنحنح : لاتعلمهن وبس
هز راسه باستغراب ورفعت صوتها ساره : هادخلن عند البنات وتاتجيتسن
دخلو امنه وحنين ووقف ذيب يدخل وهو يفكر باستغراب
دخل الغرفه يسكر الباب وناظرها جالسه على جوالها وتقدم يبوس راسها : صح النوم
العنود ابتسمت : صح بدنك
ذيب : ماطلعتي للبنات ؟
العنود هزت راسها : مالي خلق حتى مصدعه وابي ارتاح
ذيب بهدواء : جدي صحى وفالمستشفى
بلعت ريقها تناظره : خفت يموت واحنا السبب
ذيب تكى : البارح افكر اقول لهدرجه حاسدنا وانلمخ يوم دراء عن ولدنا وطاح
العنود : مدري ليه تذكرت جدي وطيحته وحزنت
ذيب تعدل : المهم انه طيب وترا امنه وحنين برا يبونتس
ضيقت عيونها تناظره : تعرفهم ؟
هز راسه بابتسامه : يوهههه كنا نلعب مع بعض وحنا صغار وكنا انتكافخ ونرجع انتصالح
رفعت حواجبها تناظره وضربت كتفه تقومه وتكلمت : لاتجي عندي روح لهم ينتظرونك
ضحك يناظر عصبيتها وكمل : يبنتس هن مايبني
تخصرت العنود تناظره بعصبيه واشرت على الباب : اطلع
ذيب وقف قدامها وهز راسه بالنفي وتكلم : ماطلع وانتي زعلانه علي
ضربت صدره ومسك يدها يبوسها وتكلم : تغارين وانتي تدرين بغلاتس عندي
العنود بسخريه : من قال اني غرت انا اقول روح لهم
ذيب ضيق عيونه : متأكده ؟
هزت راسها بايه تناظره وضيقت عيونها تقلده وتكلمت : اطلع برا
ذيب مد يده على بطنها وتكلم : وش اخباره ولدي اليوم؟
العنود : ولدك زعلان لانك زعلتني ويقول يمامه اطرديه وقاعده اللبي طلبه
فتح عيونه يناظر بطنها ونزل يبوسه وتكلم : افا ليه تسوي في ابوك كذا المفروض توقف معي
غمضت عيونها من توترت من حركته وابتسم يضرب خشمها وتكلمت : وليه يوقف معك ؟ وبعدين انا مابي ولد ابي بنت ؟
ذيب قرب : لانه يعرف اني مافكر في غيرتس وعشان اذا زعلتي مني يخليتس ترضين علي وانا ابي ولد
رفعت حواجبها العنود وتخصرت : انا امه مو على كيفك
ذيب بابتسامه : وانا ابوه .... سكتو ثواني يناظرون بعض باستغراب من حديثهم وتكلم ذيب : من بدايتها خلاص الي يجي من الله حياه الله وفيه بركه
ضحكت تنحني وهمست : الله يعوض ابوكم يولدي ويابنتي
ضحك ذيب يلبسها عباتها واخذت حجابها تتحجب وهمست : يالله نروح نشوف الي كانو يلعبون مع ابوك
ذيب : اي صح لايدرون عن حملتس
العنود باستغراب : شلون يعني ؟
ذيب رفع كتوفه : مدري قوانين امي وجدتي مايبون حريم الديره يدرون عن حملتس
عقدت حواجبها العنود : وش ذا القوانين بعد بالنهايه بيطلع بطني ويدرون
ميل شفايفه يرفع كتوفه وهزت راسها بعدم تصديق : الله يستر من الجاي
مشت تطلع ومشى معها
دخلت تسلم وجلست بهدواء ولفت من تكلمت حنين : عسى ماشر قالو انتس تعبانه ؟
العنود هزت راسها : صداع وخف
هزو روسهم وتكلمت امنه : وجدتسن وراه بعد
سكتو يناظرون بعض وتكلمت عاليه : فجأه تعب وودوه المستشفى والحمدالله صحى
سكتت تشرب فنجانها ولفو من دخلت شيخه تقولهم انهم بيزورون عقاب
ووقفو امنه وحنين يستأذنون والباقين لبسو عبياتهم وطلعو وتكلمت العنود : مارح اروح انا بريح
الجده سلمى : تعالي معنى مانا مخلينتس الحالتس
هزت راسها العنود بالنفي وتكلم قايد : تاتجين منتي بجالسه
تنهدت تناظرهم وهمس ذيب : نبي نروح عشان نسيد للرياض وهم يرجعون
سكتت ثواني بتفكير وهزت راسها تطلع وراهم
