تعدلت العنود تاخذ نفس وشربت ماء تناظرهم يتناغزون ومسحت دموعها : تخيلت شكله يمشي والملقاط براسه
ضحكو من تذكرو الشكل وكمل ذيب : في العزبه وركبت السياره والدريشه فاتحه والملقاط طالع
مسكو بطونهم يضحكون وبعد ثواني تكلمت ريم : يالطباخ بصلك حرق
صقر : هذا سر الطبخه لازم يحرق عشان يعطي الرز لون
ذيب بضحكه : ويصير جريش اسود
ريم : والنهايه ينصب في الشعيب للطيور
العنود وهي تكح : وليت الطيور ياكلونه
تأفف صقر يشوفهم يحطمونه وهمس يستغفر وهو يحرك القدر وتكلمت العنود : لاتحطمونه ترا يعرف ماشاءالله عليه
ريم هزت راسها تناظر صقر : ايه من زود المعرفه تقروش مايدري وش يحط
هزت راسها العنود تلف على ذيب الي يكلمها وتحركت ريم عند صقر تساعده وصقر مارفض لانه صدق تقروش
وماكان يبي يطلب مساعده عشان مايطقطقون عليه وحمد ربه من جته ريم بنفسها وقال : انا ماطلبت بس دامتس مصره خلاص تعالي
وهزت راسها ريم تساعده
دخل مكتبه يجلس على كرسيه وطلع جواله يتصل وتكى ينتظر الرد ثواني ووصله صوت نياف : ارحب
اصيل بابتسامه : البقى علومك ؟
نياف : والله بخير علومك انت ؟
اصيل : الحمدالله بغيت اسئلك عن حاجه اذا ماعليك امر
نياف وهو يناظر العيال : امر
اصيل وهو يناظر الجهاز قدامه : الرجال الي هاك اليوم ابو ضاحي اسمه مسفر صح
هز راسه نياف وعقد حواجبه يناظر ضاحي : ايه
اصيل وهو يحرك الفاره ويدخل على سجلات : وش اسمه بالكامل
وقف نياف يطلع من عندهم وتكلم يقول الاسم بالكامل وهز راسه اصيل يتكي ويناظر صورته قدامه : تذكر بعد عيد الفطر بثلاث اسابيع جتكم الشرطه صح ؟
هز راسه نياف : ايه
اصيل : جو عشان مهمه ومسكو رجال ومعه كم واحد ويوم حققو معهم عطانا اسم غير الاسم الي قلتوه النا وبطاقته فسها اسم ثاني وللحين محاكمته تتأجل بسبب اسمه
رفع حواجبه نياف بذهول وكمل اصيل : متى بتجون انتم ؟
نياف : بعد بكره بنمشي الفجر
هز راسه اصيل : زين عشان ابوريكم صورته وتقولون اذا هو ولا ولازم شهود اذا تقدر تجيب ضاحي واخته وامهم بيفيدونا
نياف وهو يناظر الدكه : ابد ازهل ابهرجهم واردلك
اصيل هز راسه : حاول تقنعهم يجون طيب
هز راسه نياف : طيب فمان الله
نزل جواله يقفل وسكت ثواني يشوف الصوره الي في الجهاز قدامه وحرك الفاره يشوف الي معه وسكت يشوف الاوراق
وقف يشوفهم يسولفون وناظر ضاحي الي لف عليه واشر له يقوم معه وميل شفايفه ضاحي يطلع معه
لف عليه يشوفه يفكر وتكلم : علامك ؟
نياف لف عليه : اسمع ابعلمك بس لازم اهرج امك معك
ضاحي عقد حواجبه : ليه ؟
نياف : بتعرف ليه
ميل شفايفه ضاحي ثواني وهز راسه يمشي لبيتهم ومشى معه نياف
وقف عند الباب ودخل ضاحي يخبر امه
ثواني ورفع صوته ضاحي : اقلط
دخل نياف وسلم وردت السلام الجازي وجلس ضاحي وجلس نياف جنبه وتكلمت الجازي : احد فيه شي ؟
هز راسه نياف : كلهم بخير بس ابعلمكم في شي وابيكم تركزون وماتفهون غلط
عقد حواجبه ضاحي وبدا يقولهم نياف كلام اصيل له وبعد ثواني شهقت الجازي : تبينا نروح للمحاكم عشانه
ضاحي لف عليه وتكلم نياف : حسب كلام اصيل انهم مأجلين محاكمته عشان اسمه وانه قالهم اسم ثاني ويبون شهود يأكدون لهم
الجازي : ووش الاسم الثاني ؟
رفع كتوفه نياف لانه ماسئل اصيل وطلع جواله يرجع يتصل عليه ورد اصيل : وش قالو ؟
نياف : اسمع انا عند ضاحي وامه وابحط الجوال سبيكر وابيك تقولهم وش الاسم الي قاله
هز راسه اصيل ونزل الجوال نياف يحط سبيكر وتكلم اصيل : دقيقه بس اطلع ورقته
سكتو ثواني وتكلم اصيل : لقيتها اسمه شباب صنهات
هزت راسها الجازي : بس هو هو
عقد حواجبه ضاحي يناظر امه وتكلم اصيل : طيب ليه اسمين ؟
الجازي : شباب صنهات في الكرت اسمه هو مايبي هالاسم وسما نفسه مسفر فهاد ولا ابوه وحنا كان نناديه شباب
اصيل ضحك : يعني الاسم الاول نضيف مافيه شي والاسم الثاني يشتغل فيه واذا مسكناه يطلع الاول
هزت راسها الجازي وتكلم ضاحي : تو ادري
الجازي : الله يكفينا شره
اصيل وقف ياخذ اوراقه : ابد استجاب ربي بس الناقص تجون
ضاحي : اصيل اسمح لنا مانا بداخلين محاكم عشانه
اصيل : محاكمته بعد يومين واذا مانحكم بيأجلونها بعد شهر تعالو بس عشان نخلص وماننتظر شهر
سكت ضاحي يناظر امه وتكلمت الجازي : والله مدري وش اقول بس ابهرج ريم ونشوف
اصيل هز راسه : اخذو وقتكم بس اهم تجون
سكتت الجازي تفكر وتكلم نياف يستأذن وطلع يكلم اصيل : خدمه ثانيه ؟
اصيل : ماقصرت مشكور
هز راسه نياف : مابينا يارجال
نزل جواله يقفل وحطه في جيب بدلته واخذ الملف يطلع لغرفة التحقيق وتكلم يناظر العسكري : جيبو شباب
هز راسه العسكري ووقف اصيل ينتظر ثواني ولف من سمع صوت الكلبشات الي بيدينه وجلس على الكرسي وتكى بيدينه على الماصه الي قدامه يناظره من القزازه الي توضح له شكله قدامه بس مسفر مايقدر يشوفه اخذ نفس بعد ثواني وهو يشوفه يتلفتت وكأنه يدور احد
ولف من دخل عبدالله يناظر من القزازه وتكلم اصيل : هو
هز راسه عبدالله يتكى واخذ الملف اصيل يدخل غرفة
التحقيق وعبدالله واقف وراء القزازه يشوفه ويسمعه
نزل الملف على الطاوله يجلس وتكتف يناظره قدامه
ورفع راسه مسفر يشوفه ونزل نظره للملف الي قدامه وتكلم اصيل : شباب ولا مسفر وش اناديك به ؟
سكت مسفر يناظره وتكلم اصيل : عندك شي تقوله قبل المحاكمه لان بعدها ماضن تقدر تتكلم
ابتسم عبدالله لانه يعرف اسلوب اصيل وكيف يبي يستفزه عشان يعترف بنفسه
وكمل اصيل يميل شفايفه : ترا كلبشنا يدينك لسانك حر تقدر تقول
سكت مسفر يناظره وعض شفته اصيل بعصبيه من بروده واخذ نفس مايبي يبين العصبيه وتكلم : تبي تودع اهلك ؟
رفع حواجبه مسفر وابتسم اصيل لانه عطى ردة فعل وكمل اصيل : ضاحي وابنتك وزوجتك تدري عنهم ؟
ابتسم مسفر بسخريه وتكلم : مهب بعيد اجلهم بعد اجلي
ابتسم اصيل يرفع حواجبه : مافهمت كيف يعني مهب بعيد ؟
مسفر ضيق عيونه : يعني اذا صار لي شي مهم بجالسين وبيلحقوني
ميل شفايفه اصيل يبتسم لان مسفر نسى الكاميره الي تسجل وتكتف يناظره : وكيف يلحقونك ؟
سكت مسفر وكمل اصيل : نفس ارواح الناس الي راحت على يدك ؟ ولا على يد غيرك ؟
رفع كتوفه مسفر يبتسم : والله ياحضرة العميد المفروض انت الي تعرف هالشي مهو انا الي اقوله
رفع حواجبه اصيل يتكلم : وادمني لازم اعرفه احب اقولك انهم باحسن حال و ولا ذبانه تقدر تقرب منهم
رص على سنونه مسفر بعصبيه يناظره يضحك وضرب يدينه في الطاوله بعصبيه ووقف اصيل الي يضحك واخذ الملف يرجع عند عبدالله ودخل العسكري ياخذ مسفر الي يتنفس بعصبيه وتكلم عبدالله : والله كفو عليك
اصيل ابتسم يناظر مسفر طالع : باقي بس يجون ويشوفهم وهنا بتشب ويطلع كل خافي
هز راسه عبدالله وطلعو على صراخ مسفر الي يحاول يفك نفسه من العساكر الي ماسكينه وتكلم اصيل بضحكه : بالهون بالهون
لف عليه مسفر بعصبيه وصرخ : حطيتك في راسي ومنت بسالم
رفع حواجبه اصيل يناظره ورفع يده عبدالله : اخذوه ولاتحطونه مع احد خلوه الحاله
هزو روسهم وراحو ولف على اصيل : يرجال يتوعد فيك
اصيل وهو يشوفهم يسحبون مسفر : معناته فيه يد معتمد عليها
عبدالله عقد حواجبه : كيف ؟
اصيل : يهددني وهنا ويكلمنا ببرود وماكنه مسوي شي اكيد فيه احد هنا يساعده
سكت عبدالله يناظره وتكلم اصيل : شددو العسكر عليه الين وقت المحاكمه ولا يطلع ولا يكلم احد لين نعرف من ذراعه
هز راسه عبدالله يروح ومشى اصيل راجع لمكتبه وهو يفكر
