هز راسه ذيب : ماني مخليتس قومي معي
وقف يوقفها معه وناظر يدينها الي بارده وترجف ومد يده يحضن يدينها ولفو طالعين وتكلم حميدان : الين متى ماترجع عندي منتم شايفين راضي
ناظره ذيب بطرف عين وعدل غطى شادن وسندها يمشي بها
ناظروه بصدمه يشوفونهم طالعين وابتسم صالح يشوف ذيب محاوطها وتكلم ابو حميدان : باي حق تاخذها وهذي اول ليله الها
ذيب وهو يركب شادن جنبه : بحق اني اخوها وان ولدك مايستاهلها
سكر بابها يشوف حميدان واقف على بابه ومشى يركب مكانه ومشو العيال لسياراتهم ورجع ذيب للديره
مسكت راسها تشوف الوضع مكركب وتقدمت تبوس راس شيخه وسلمت عليهم وناظرت دلال تهمس : وين دلع وراشد ؟
دلال اشرت : داخل في سرايرهم
هزت راسها العنود تدخل وناظرت نوره وسحاب الي جالسين عندهم ويغنون لهم وابتسمت بهدواء تناظرهم وتقدمت تجلس بينهم وتكلمت نوره : شوفي غنيت الهم واعجبتهم
كملت نوره تغني وابتسمت العنود تناظر دلع وراشد الي يبتسمون وتقدمت تبوسهم وتحضنهم بشوق
ولفت تسمع صوت ذيب برا ووقفت تاخذهم ومشت طالعه ابتسمت تشوف شادن في حضن امها ودمعت عيونها تناظرها منهاره وتقدمت عند ذيب تنزلهم وابتسم ذيب يبوسهم ويحضنهم : ذبحوني بالشوق
لف العنود تحضن شادن الي حضنتها وهمست تمسح ظهرها : بس يروحي لاتصيحين
بعدت شادن تاخذ نفس وضربتها : يوم اخذتي ذيب وش سويتي
عضت شفتها العنود تناظر البيوت : فداك كان حرقتيها كلها
ضحكت شادن ولفت العنود تشوفهم يناظرونها بصدمه وتكلمت رزان بشهقه : انتي الي حرقتي مطبخي ؟
سكتت العنود تشوف صدمتهم وهزت راسها وشهقو الجده سلمى والبنات يناظرونها ورفعت كتوفها العنود تجلس وتاخذ دلع : معقوله ماتعرفون
سلمى ضحكت تأشر على دلع وراشد : هاذي فايدة الحريق الي سوته
ابتسمت العنود بخفيف وضحك ذيب ولفو على حاكم الي توه داخل وتكلمت ود : وش سالفة الحريق
حاكم تقدم عندهم وناظر ذيب : وش صار واخذتها ؟
ذيب نزل راشد : ابد ماصار شي كايد
حاكم ناظر شادن ولف يدخل وتكلم اصيل يناظر ذيب : وش قلت له يوم دخلتو
صالح ناظر الساعه : وش وضع ابوه الساعه اثنعش ويقول اخر الليوم
ذيب هز راسه : ولد الكلب عطيته كم كلمه واخذتها ومشيت
ولف على شادن : مادخلتس في الدفى مخليتس في البرد حتى الفراش ماجابه
شادن بغصه : دخلني وتهاوشت مع زوجته وكملت عليه بالترمس في ظهره
رفعو حواجبهم يناظرونها بصدمه وتكلمت شادن : لاتناظرون فيني طلعت حيل الثلاث ايام فيهم
ذيب ضحك : اثرتس يوم غطيتي في النومه مريحه خاطرتس
شادن : قسم افكر وش اسوي فيهم بكره بغيت اذبح ورعه بس قلت ماله ذنب
دلال : وطلعتي للحوش عناد ؟
شادن ضحكت تضرب رجلها : يوم صفقت زوجته وصفقته معها واطلع واحلف اني مادخل بيته
ضحكو الكل يناظرونها وتكلمت الجده سلمى تضحك: يويله
ذيب : يوم طلعنا وجهة وجه الي يقول اخذها لابوكم على ابو راضي
رفعت راسها شادن تضحك وتكلم صالح : يوم راحت قلت خلاص مهي راجعه
شادن ناظرته بطرف عين : ماجيت عشان ارجع
صالح ناظرها : والله اني انلخمت ازريت اسوي شي
شادن هزت راسها تصد : الضيقه للي اكبر منك مهي الك
سكتو الكل يناظرونها وتكلمت دلال توقف : شرايكم نلعب
جهير مسكت يدها تجلسها : اللعبي وانتي جالسه
هزت راسها دلال تناظرها وناظرتهم : اللعبه تشملكم كلكم كبار واصغار
سكتو يناظرونها ينتظرون العبه ولفت دلال على حاكم : حاكم تعال مارح نبداء بدونك
هز راسه حاكم يصد وتكلمت ود باصرار : تعال تكفى
سكت حاكم يناظر الفراغ ووقفت شادن تتقدم عنده ومسكته من معصمه :تعال يابوي تعال وسع صدرك
وقف حاكم يمشي معها وتكلمت شادن تناظر صقر : ريم وين ؟
صقر : في بيتهم
جلست شادن وجلس جنبها حاكم وتكلمت دلال : اللعبه هي اسئلكم اي سؤال والي اسئله ويجاوب يسئل الي جنبه والي يتأخر في الاجابه اذا احد ماقدر يجاوب من الي بعده يختارونه يجاوب بدالهم
شبكت يدينها تناظرهم وهزو روسهم وتكلمت دلال : ببداء من عندي
ود الي جنبها : طيب وانا بسئلك
هزت راسها دلال تناظرها وتكلمت ود : وين تشوفين نفسك بعد عشرين سنه ؟
دلال فتحت عيونها وضحكت : في القبر
ود ضربتها : بلا استهبال جاوبي
دلال رفعت كتوفها تضحك : انا بنفسي مدري تسئليني
ود هزت راسها : ماجاوبتي تجاوبين على الي بعدك
دلال تورطت : بنت اقولك مدري والله
رحاب : يعني الي توديك له الحياه معه ؟
هزت راسها دلال : بالضبط
لفت دلال على جهير : دور تيته يالله بسئلك
ناظرتها جهير وتكلمت دلال : موقف انقهرتي منه ؟
ميلت شفايفها جهير تفكر وناظروها الكل وتكلمت جهير : ماعندي اجابه
ود : تأخرتي يالله خاله سلمى جاوبي
سلمى اشرت على جهير : نفس سؤالها ؟
هزو روسهم ورفعت اكتافها الجده سلمى : هماعندي اجابه
دلال ناظرتها : على طول حتى مافكرتي !؟
هزت راسها الجده سلمى وضحكت ود : الي بعده
ناظرو شيخه وناظرتهم شيخه تهز راسها وتكلمت دلال تعيد السؤال : موقف انقهرتي منه ؟
شيخه : المغرب وقت اخذو شادن
لفو يناظرون شادن الي تناظر الفراغ وتكلمت ود : الي بعدها شادن
ناظرتها شادن وتكلمت ود : متى اخر مره ضحكتي ضحك هستيري
عقدت حواجبها شادن تفكر وهزت راسها : ناسيه والله بس شكله يوم كفخت السلقه وسلوقيها اولا
ضحكت ود وتكلمت رحاب : اجتمعو الضراير
جيهان ضحكت : هذول رزان وفاطمه
ضربو رجولهم يضحكون وسكتو من انتبهو لنظرت رزان بينهم وبلعت ريقها دلال : يالله حاكم دورك
ناظرهم حاكم بهدواء وتكلمت دلال تشوفه مكشر : تعرف كيف تضحك ؟
سكت حاكم يناظرها ولفو على حاكم وتكلمت ود بصدمه : هذا سؤال ؟
هزت راسها دلال تناظر حاكم : السؤال كيف تضحك ؟
سكت حاكم يناظرهم واخذت نفس دلال ماتبي تعصب وهمس حاكم بتسليك : هههههه
سكت يناظرها وفتحت عيونها دلال بصدمه وصرخت : مستفزززززز
ود : جاوب يالله الي بعده
ناظرها صالح وتكلمت ود : فيه موقف ودك يرجع يتكرر ؟ ايه او لا بدون تقول الموقف
تنهد صالح يهز راسه وناظر دلال الي تناظره : ايه
دلال ناظرتها : ليه مايقول الموقف ؟
ود : اذا بيسولفون بتسمج اللعبه فمهتي شلون
هزت راسها دلال تناظر نياف وتكلمت : تمام دورك
هز راسه نياف وكملت دلال : كم عدد قلوب الاخطبوط ؟
نياف عقد حواجبه : وانا وش يعرفني
ود : فكر عشان ماتجاوب عن غيرك
ناظرتها دلال بطرف عين وعضت شفتها ود تشوفه عاقد حواجبه ورجعت وراء ترفع اصابعها الثلاث وميل راسه نياف ونزلت يدها ود عشان دلال ماتنتبه لها ولا الباقين شايفينها وتكلم نياف بصدمه : ثلاثه
هزت راسها ود وتكلمت دلال : توك تقول وش يعرفني
نياف وهو مصدوم : عرفت المهم صدق قلوبه ثلاثه ؟
هزو روسهم وضحك نياف : اخس يهالاخطبوط
سيف : لوش طيب ؟
عزيز : شكله يتبرع بالقلوب
ضربو رجولهم يضحكون وتكلم انس : لا عشان كل قلب فيه اخطبوطه
ناظروه بذهول وتكلم صالح : مهب طيب الاخطبوط يخون
باتل ناظرهم : تخيلو لو قلوبنا ثلاثه
رهف : وانت تبي قلوبك ثلاثه ؟
باتل فتح عيونه : لا بس اقول تخيلو
اصيل : هو قصده اذا حبيبته فسد قلبها بيتبرع لها بواحد من قلوبه
باتل ابتسم : اييه صح عليك
هز راسه اصيل ورفع حاجبه له وضحك باتل وتكلمت ود : الي بعد نياف العنود
ناظرتها العنود وتكلمت ود : مادري تعرفين الاجابه ولا بس هذا الي طالع لي
