ترف رفعت اكتافها : مدري البنت طلعت ترجف شكله موضوع قوي
شادن بكره : اتركنها بعد هي تحب تكبر السوالف
عاليه بخوف : يمه يخوف شكلها
ريم بتفكير : ماني بجالسه لازم اعرف وش سمعت
ترف : معليتس اجيب الخبر بس اسمعن
لفو يناظرون ترف بتركيز وقطع عليهم الي دخلت ورفعت يدها تسلم : سلام عليتسن
لفو يناظرونها وانصدمو وتكلمت شادن بعصبيه : يهيب هاذي وش جابها
تقدمت تسلم على الحريم وبعد ماخلصت منهم تقدمت عند البنات وناظرتهم بابتسامه وتكلمت : وش اعلومتسن
شادن ناظرتها بكره وتكت : مالتس دخل
ابتسمت مهره وتقدمت تسلم على ترف وعاليه وريم الي سلمو عليها بدون نفس وتعدت تختار مكان ونزلت عباتها ونقابها ولفتها تجلس وناظروها البنات بصدمه وتكلمت شادن : يعع الشيفه
ترف : مغيره لون شعرها نعنبوها
ريم : متغيره كلها وخدودها كبرانه
عاليه بضحكه : مصفقها سطام
طاحو البنات يضحكون وتكلمت شادن : ليته والله بس ماضنتي
ريم وهي تاخذ نفس : يعزتي لتس ي اريج
لفت عليهم اريج من سمعت اسمها وابتسمت تهز راسها بمعنى وشو وتكلمت ريم : نقول نحبتس
رمت لهم اريج بوسه وتكلمت ترف بهمس : سبحان من حط مهره اختس
شادن هزت راسها : اي والله
ريم اشرت ل اريج تجي عندهم وقفت اريج تجيهم وتكلمت عاليه : اختس حليانه ممكن تعلمينا وش الخلطه
ريم وشادن ناظرو عاليه بكره ولفو يناظرون اريج من قالت : ابد والله هذا هابين فيه الحريم يسوونه
ناظروها بتركيز وكملت : نافخة خدودها وشفايفها
ريم وهي تناظر مهره كشرت : يفرقى
شادن : نافختهم بهواء
ضحكت اريج : لا ماده يحطونها في الخدود عشان تنفخ وتزين
ترف : انتي مسويه معها ؟
هزت راسها اريج : لا انا ماحتاج
ريم : اي احسن زينتس طبيعي مهو صناعي
عاليه : وبكم تسويه ؟
لفو يناظرونها البنات بصدمه وتكلمت : ماني متأكده بس حول الاربعين الف
شهقو يناظرون مهره وتكلمت شادن بهمس : هي كلها ماتجي اربعين الف
ريم كزت شادن جنبها عشان اريج ماتسمعها وتزعل وتكلمت : الله يستر عليها
ورجعو البنات يناظرون مهره ماعداء عاليه الي ماسكه اريج اسئله وسوالف عن الفلر والتجميل
...............................
تقدم يناظرهم واقفين وتكلم : وش عندكم هنا ؟
راضي : طفشنا من داخل مافيه غير ابو عساف يشرب في القهوه وسوالف جدك والشياب الي تغث
ضاحي : عزتي لسيف وصالح ماسكينهم قهاوي
نياف : الله يعينهم
ذيب تكى عالجدار يناظرهم ولفو من تقدم عندهم ناصر وقرب من ذيب ينفث الدخان على وجهة وغمض يبعده : يورع
صد ذيب يكح وتقدمو صقر ونياف من رجع ناصر يكرر حركته وبعدوه وتكلم صقر بعصبيه : اذلف
ناصر ضحك : وش فيكم امزح معكم انا
نياف : مهب مزح هذا ولاعاد تجي وبيدك الزفت ذا
ناصر وهو ينفث : انت بتمنعني كيفي انا اجي وقت مابي
راضي : ناصر ارجع لمحلك الي جيت منه
ضاحي بخوف : يعيال ذيب
لفو عليه وفزو يمسكونه من طاح وهو مكتوم ورفع يده صقر يدور بخاخ الربو في جيوبه وطلعه يحطه عند فمه ويبخ
وبعد ثواني رجع ذيب لوعيه وضحك ناصر : بغيت تموت
سكت ذيب يتنفس وتقدم نياف بعصبيه يمسكه من ذراعه ويبعده ورفع اصبعه بتهديد : يمين بالله ان شفتك مره ثانيه لاثور فيك تفهم ولا ماتفهم
ناصر بابتسامه: افهم .... وراح يمشي تاركهم
رجع نياف لهم وكان ذيب جالس على ركبه ويتنفس
وتكلم راضي : ياخي لازم تشوفلك حل دايم منكتم
ذيب ببحه اثر الكحه : مابيدي شي هذي مزروعه فيني ماقدر اغيرها
ضاحي : يعينك الله ياصاحبي بس دواك لاتفكه خله معك
هز راسه ذيب وتكلم صقر : شرفت
لفو من تقدمت عندهم امنه وتخصرت تناظرهم وقالت: انتم ماتستحون مخلين الرجال وناقعين هنا ادخلو ساعدو وقهوو اثبتو انكم احفاد عقاب وماعليكم خوف
ناظروها باستغراب وضحك راضي : هذا الي ناقص
صقر تخصر وقال بقل حيله : الحين انتي وش دخلتس بس ابي اعرف احد مرسلتس النا وراتس عاقبتينا كل ماشفتينا قعدتي تسفلين فينا
امنه : مانلام انا كل ماعاينت في محل الا الي جالس له مع سرابيت ودخانهم والع فيهم والثاني مجنون ويهرج نفسه والثالث يغازل والرابع راقد لاشغل ولا مشغله والخامس لذكروه الناس قالو قليل خاتمه
مسكو روسهم ذيب ونياف و رفع يده صقر يسكتها من تكلمت بتكمل واشر على الباب : انتي مره ومحلتس مع الحريم مالتس دخل في الرياجيل وسوالفهم واتمنى ماعاد تتدخلين في الناس لان باختصار مالتس دخل
رفعت يدينها امنه تكش عليه وتقدمت تدخل وضحك راضي وتكلم ضاحي بصدمه : لا اله الى الله وش هالادميه
صقر بقهر : امحق ماهي ادميه هاذي جاثوم
ذيب ضحك يمسح وجهة وتكلم : كلهم عرفتهم بس من الي يغازل هذا ؟
نياف : لازم نصيده
صقر : تدرون احس جدي مبخششها
لفو يناظرونه وكمل : تراقب يهيب يوجها
ذيب : تجي عليه عاد هو يحب هالحركات
ضحكو يناظرونه وتكلم راضي : ولا مره فحياتي شفت مره نفسها قسم احيان اذا شفتها احسها شيخ القبيله من مسكتها للعبايه تعاملها معاملة بشت وكلامها
صقر : ولا مشيتها تقل معضل
جلسو يضحكون ولفو من تقدم المملك وتكلم : بيت عقاب
هزو روسهم وتقدمو يسلمون عليه ودخلو معه
...............................
وبعد ما المملك كتب كتابهم ووقع هادي تقدم سطام واخذ الدفتر يدخله ل سلمى وتقدم يوقفه ذيب وتكلم : لاتخرب فرحتها
سطام : يابن الحلال براضيها وابارك لها وابيك معي
ذيب هز راسه : اليوم ماقدر اساعدك والله تعال بكره وابشر اهرجها عنك اليوم لاتخرب فرحتها وتنكد عليها
تأفف سطام وتقدم ذيب واخذ الدفتر منه وتقدم عند الباب ورفع صوته : يولد
فزو شيخه وشادن وساره وطلعو له وناظرهم وابتسم : وين العروس
شيخه : داخل شادن سكري الباب
هزت راسها شادن تسكر الباب وتقدم ذيب وامه وشادن وعمته معاه
طق الباب وسمع ردها : من
فتح الباب يدخل وابتسم يناظرها جالسه وتقدم : كيف حالتس
هزت راسها سلمى بابتسامه ونزل الدفتر قدامها : موافقه ؟
ناظرته ولفت تناظر امها وعمتها ونزلت راسها تهزه وابتسمو يناظرونها وتكلم ذيب وهو يأشر : وقعي هنا
مسكت القلم بيد ترجف ووقعت ولفت من رفعو ايديهم ساره وشيخه يزغرطون وتقدمت شادن تحضنها وتكلم ذيب : مبروك
ابتسمت بخجل وباس راسها و وقف يطلع
دخل المجلس وكانو كلهم مبتسمين لان صوت الزغاريط واصلتهم وابتسم ذيب يناظر هادي : مبروك
ضحك هادي يناظرهم وتقدمو يسلمون عليه ويباركون
