لا تستفزي رجولتي كي لا ابعثر انوثتك

بارت 2

وقطعات وقربات ليها:قلتي لمافيا
ليلى:لا لا لا غي كنضحك
طاهرا:شي نهار نهرس ليك داك الفم غي زيدي
ناضت لبسات عليها وخرجات مشات لجردة لقات البنت وباها كيتسناو عطاتهم الطليفون ورجعات
بلسان طاهرة:هذي هي ختي ليلى مصيبتي لي عطاني الله فريفرة وخف من الريشة باغة توصل بالسيف وكنخاف عليها بهاد الخفة لي فيها كتعجبني بحاجة وحدة كتقرا وديما كتحيب نقطة زوينة دكية تبارك الله ان شاء الله دير شي حاجة زوينة فحياتها ماشي بحالي المهيم زوينة طويلة شوية عليا قالتلك باغة تولي عارضة ازيااه طززز زلط والتفرعين المهيم ماكنتشابهوش بزاف انا قصيرة عليها وعامرة عليها عندي تريمة وصدير ولكريشة اوووهو شعري طويل شوية يلاه قطعتو قطعته وكحل كيبري وهي طويلة وضعيفة شوية شعرها طويل شوية وكحل بحالي وجها طويل عويناتها كوحل عسليين وصغيورين مرمشين فاش كتضحك كيتغمضو ليها كتولي فنة وشنيفات صغيورين منفوخين شوية دلحنيكات خارجين وبيضة جبينة أنا لوجه مضور ولحنيكات ولعنين كبار رمادين مرمشين شفايف كبار ومبومبيين خمرية بحال لون دلبرونزاج داكشي دلافلام كيقولولي كنشبه لهيفاء وهبي وشي كيقول لكاردشيان وانا كنقولهم غا طاااهرة لمزلوطة هه ..وصلت لدار
دخلت لقيتها مجبدة كي سلوكي:لا خدامة دباك جمعي طبلة وغسلي لواني
ليلى واخة
ناضت جمعات داكشي ورجعات جلسات وفيديها طليفون
طاهرة:عوتاني لقصص
ليلى وعنيها فطليفون:وي لقصص عرفتي واحد لقصة زوييينة غا تفرشيخ اووف مصاب نعيش تأنا شي قصة بحالهم ونكتبها
طاهرة ناضت:رجوع الله المهيم انلبس عليا جا وقت الخدمة
دخلات لبسات وخرجات
ليلى كطلع وتهبط فيها:ناري عاطينكم كسوة زوينة دلخدمة جات معاك لمنية وسوميجة مع تريمة كتباني سيكسي شوفي حلي صدافات لوالا يبان صدير مالك زامتة راسك
طاهرة كتلبس صباط طالون:ماكتعرفيش تسكتي
ليلى:ها هي ساكتة
طاهرة هزات ساكها ولبسات من لفوق واحد لكاب طويل وهزات طليفونها ودوزات واحد النمرة:فينك..صافي هنا نازلة
وشافت فختها:هنا مشيت ديري عقلك وشدي عليك لباب لاجا داك لحنطور ما تجبديهش وماتهضريهش دخلي لبيت وشدي عليك لا وقعات شي حاجة عيطيلي صافي
ليلى :واخة
طاهرة قربات وباستها:ديري عقلك الله يرضي عليك
ليلى باستها تاهي:واااخة طوطو ديالي هههه
طاهرة:هههههه طوطو لاواه قلا...
ليلى:هههه بحال بحال
طاهرة:بيزوووووو بي بي
وخرجات لقات طاكسيي حدا لباب ركبات وداها الاوطيل
مسافة طريق وهو يحطها حدا الاوطيل بالضبط حلات ساك تخلصو لقات غا يديها وريح:تفووو على قوادا تاني
مول طاكسي:شنو
مسافة طريق وهو يحطها حدا الاوطيل بالضبط حلات ساك تخلصو لقات غا يديها وريح:تفووو على قوادا تاني
مول طاكسي:شنو
طاهرة:والو شوف انخلي ساكي هنا ندخل نجيب لفلوس ونرجع
مول طاكسي:واخة
دخلات لداخل كتجري نيشان لغرفة الموضفين حلات لباب لقاتهم مجمعين كاملين باينة شي حاجة مهمة
طاهرة:خالد اجي عفاك
قرب لعندها:ياك لاباس
طاهرة كارها راسها فهاد اللحضة ماوالفاش تطلب من شي حد:احم نسيت لفلوس فدار وجيت فطاكسي
قبل تكمل قاطعها:وكان هدشي لاش كتجبدي وتلوني
جبد من بزطامه لفلوس ومدها ليها:هكي جري سيري خلصيه ورجعي بزربة كاين جتماع مول لاوطيل دابة جاي وقالهم الموضافين كلهم يتجمعو
طاهرة كتشوف فيهم وهوما مجمعين:واخة
خرجات كتجري عند مول طاكسي
خشات راسها من الشرجم:هاك اخويا شكرا
خدا لفلوس :هنيا ازين
طاهرة:سير سير المهيم تانولي نعيط ليك
هزات ساكها ووقفات كتشدو حيت كان محلول شوية وهي تسمع صوت شي طموبيلات علات راسها لقات جوج طموبيلات واقفين حداها مجبدين كيبريو وجاج فيمي كتشوف غا راسها رجعات اللور ملي نزلو لحراس كيحلو لباب لوراني بقات كتشوف باغة تعرف شكون غينزل شوية وهي تشوفه نازل بكل اناقته نفس لي كتشوف فالصحف غير هو مباشرة زايد الزيت نسات راسها وبقات كتشوف فيه وهو كيقاد لكوستيم دياله هز راسه وشاف فيها واقفة ماتحركاتش قرب لعندها حيت جاية فطريقه هز يديه وبدا كيدير باي باي حدا وجهها حسات على راسها تلفات :سمحلي سهيت شوية
بتاسم وهو كيشوف فيها :ماشي مشكيل
بقات واقفة
هو:احم ممكن ندوز
شهقات:اه اه دوز اسيدي
بتاسم ليها ومشى ولحراس تابعينو ضارت حاضياه بعنيها وهي كتسب راسها:تانا بنت القحبة شوية وكنت اناكل راجل بعيني ناري ماشي من عوايدي تفووو
شافت مع جنابها واش ماشافها تاشي حد ودخلات مشات لغرفة الموضفين مالقاتهمش :تيااااااااخ دخلو لغرفة لاجتماع وانا جالسة هنا كنتكسول
حيدات الكاب شافت راسها فالمراية قدات شعرها دارت شوية دقلوس تلمع شفايفها مصات شفايفها وخرجات مشات كتجري لغرفة الاجتماعات
فغرفة الاجتماعات
كان جالس فالمكتب لي اونفاس مع طبلة طويلة فيها كتر من 20 كرسي كانو جالسين كلهم
شاف فيهم:احم كلشي حاضر
مديرة الفندق:مزالة وحدة
شاف فيها:شكون
مديرة:طاهرة علامي
تنهد وعلا حاجبه بحاليلا كيقول واش انبقاو كنتسنواو
المديرة:هاني نمشي نشوفها
يلاه اتوقف وهوما يشوفوها داخلة وكتشد لباب
طاهرة قلبها كيزدح كان الهدوء وكلشي كيشوف فيها وقفات وعلات راسها من بعد ما قوات نفسها :احم سمحولي على التأخير
وتوجهات لبلاصتها كانت كتمشى وصوت طالون كيتسمع مع الصدى لدرجة كلشي بقى يشوف فيها وهي كتمشى مع عندها مشية سبيسيال بحال شي عارضة ازياء فوق الخشبة وعاد لفخيدات عريانين مع لبسة فورمتها كتبان زوينة كلشي مفروز وباين لدرجة الاتارة والتشويق
جلسات وشافت فيهم كان كلشي كيشوف فيها واولهم صاحب الاوطيل لي كان شاد ستيلو فيديه وكيلعب بيه وعنيه عليها