لا تستفزي رجولتي كي لا ابعثر انوثتك

💔 قلوب محطمة 💔

كانو غاديين تا وقفو فمحطة طاكسيات حدا واحد الجردة
طاهرة وقفات وبدات كتفكر فين ايمشيو فين ايعطيو براسهم شافت فختها وافكار كتديها وافكار كتجيبها غير ربي لي علم بداكشي لي فلداخل ديالها..جبدات كليفونها ودوزات نمرة دغيتة بقا شحال كيصوني عاد جاوبات
غيتة:وي كاهرة غبرتي عليا.
طاهرة بصوت مبحاح بلبكا ولغوات:فينكي
غيتة عرفات انها ماشي هي هديك:هنا عاد خارجة من الخدمة ياك لاباس
طاهرة كتصبر راسها باش ماتبكيش:بغيت نشوفك دابة
غيتة:اه واخة
طاهرة:اجي عندي حدا جردة دريكس محطة طاكسيات
غيتة:واخة
طاهرة مزال كتغلي ومزال شاداها الرجفة كتحس براسها مرفوعة لفوق بحاليلا داخلة فشي كابوس وغتفيق منو شافت فختها جالسة على طرورطاور ومعنقه رجليها وكتمشي وتجي بداتها وسااهية ودموع محجرين فعنيها..دم كان كيسيل من فمها وشي ضرابي على جبهتها شعرها مخبل حالتها حالة ...طاهرة كتشوف فيها قلبها كيتقطع من لداخل ضميرها كيأنبها كانت كتقول مع راسها هي سباب باش وقع هدشي كون مامشاتش لتماك كون ماخلاتهاش بوحدها عيات حاضية ختها فتالي أداتها بيديها ..غمضات عنيها فاش نزلات دمعة حارة من عنيها شوطات ليها خدودها دغية مسحاتها وجلسات حدا ختها وشدات ليها فيديها لي كيرجفو وباردين باستها:شوفي فيا
ليلى شافت فيها بعنيها دامعين وداابلين
طاهرة:مأكدة ما ادار ليك والو ماقاصكش
ليلى بلعات ريقها فاش تفكرات داك ليلة مع عماد كتقول لاساقت لخبار شغا دير فيها:لا ماقاصنيش
طاهرة تنهدات براحة:هدشي لي بغيت مابغيتكش تخسري شرافك سمعي ماتفكري فوالو وماتخافي من حتى حاجة صافي احبيبة انا غنشوف شغا ندير
ليلى نزلو دموعها وحطات راسها على كتاف ختها وبدات تبكي وطاهرة كتمسح ليها شعرها حتى كتوقف حداهم طاكسي
غيتة غير شافتهم فداك لحالة نزلات كطير وقفات حداهم:طاهرة شنووو واقع
طاهرة وقفات وشافت فيها :قولي شنو لي مزال ما وقع
غيتة كتشوف فيهم هي ما فاهمة والو
طاهرة شداتها من يديها:بغيت نطلب منك طلب واحد
غيتة:شنو هو راك شوشتيني
طاهرة:ختي اغيتة أتبقا عندك وجه الله ونتي تسمحي فيها ...
ليلى غير سمعات هضرتها ناضت كتبكي وشدات فختها:فين ما مشيتي غنمشي معاك واخة نعرف ندخل معاك لحبس لمهيم ماتخلينيش موراك
طاهرة شداتها من كتافها:سمعيني وديري هدشي لي قلت سيري مع غيتة ماعندك لاش تبقاي تجرجري فزناقي ..انا عاد انشوف شغا ندير
ليلى كتهز راسها بلا وهي كتبكي:لااااااا رجلي على رجلك واش عرفتي لا مشيتي وخليتي انضيييع والله حتى غنضيع عفاااك
طاهرة عنقاتها وهي كتنعل لحض لي هي فيه فهاد اللحضة كرهات كلشي كرهات حياتها كلها وكرهات تا راسها خشاتها فصدرها وهي كتسمع بكاها وشهيقها ماباغاهاش تمشي
غيتة بدات تبكي تاهي واخة ماعارفة والو :وفهموني شنو واقع
طاهرة بقات ساكتو شحال وعاودات ليها كلشي من اللحضة لي دخلات لدار ولقات محجوب كيغتاصب ليلى ماقدراتش تعاود ليها على امين ماعندهاش لقدرة لي تهضر عليه ولا تجبد سميتو على فمها
غيتة شههقات وضربات فحناكها وهي كتبكي:اويييلي شهاد لموصيبة ياسيدي ياربي
وعنقات الطاهرة وهي كتبكي ..راه صاحبتها ..وحضرات على لعذاب لي تعذباتو فحياتها كلشي داز حدا عنيها ودابة زادت كملات
غيتة:الله يكوون معاكم هدشي بزاف عليكم مصاااب كون مات على يد شي واحد اخوووور ياربي مافاجيها
طاهرة غير ساكتة وكتفكر هدشي ماعندو باش يفيديها
ليلى:ياك ماغتخلينيش وتمشي ياكي
طاهرة مسحات ليها على راسها بلا ماتقول والو
غيتة:زيدو معايا لدار ونشوفو شغا نديرو وقفات طاكسي وهزات ليهم ساك دلحوايج:وا زيدو ركبو فطاكسي غيتة كانت لقدام وطاهرة وختها اللور كل وحدة حاطة راسها على زاج دشرجم وكيفكرو فيامهم جاية كي غتكون
ليلى جبدات طليفونها هدا 5 ميساج كتصيفطو وماكايجاوبش بقات كتصوني كتر من مرة او والو ما كيجاوبش عضات على يديها وهي كتبكي خافت من داكشي لي فراسها يكون بصاح..هي بغاتو يجي ويوقف معاهم ويعاونهم محتاجالو بزاف محتاجة يجي وتعاود ليه شنو وقع ليها من موراه ويحس بيها ويواسيها...
داز لوقت تاكانو حدا دار دغيتة ..كانت فواحد لحي شوية راقي من لعمارات لكبار وزوينين نزلو ..ودخلو كانت ضار فسفلي حلات لباب بساروت كان كلشي ناعس دخلو بشوية نيشان لبيت نعاس ديالها وجلسو
شوية كتحل لباب كانت مامات غيتة:سلام جيتي
غيتة:جيت اماما
مها:طاهرة بنتي لاباس
طاهرة بتاسمات بالسيف عليها وناضت سلمات عليها هي وليلى
جلسات حداهم عرفات ان حالتهم ماكتبشرش بلخير:ياك لاباس ابنتي
طاهرة شافت فغيتة مالقات ماتقول
غيتة:راجل مهم جرا عليهم من دار
تنهدات:لا حول ولا قوة الا بالله صبروو ابناتي دابة ربي يفاجيها
طاهرة تنهدات:امييين
ناضت:نعسو ورتاحو يصبح ويفتح
وخرجات وخلاتهم
غيتة جبدات ليهم بيجامات لبسوهم عرفاتهم عيانين وخاصهم ينعسو فرشات هي فلارض وخلاتهم ينعسو فوق نمسيتها وطفات الضو ..واخة هكاك بقاو كلهم فايقين وكيفكرو