لا تستفزي رجولتي كي لا ابعثر انوثتك

بارت 30

ياسين:اه نوض ترتاح

ناصر ناض طلع لبيت دخل لقاها مغمضة عنيها شد لباب وهي تحل عنيها:جيتي

طفا الضو وتخشا حداها جرها لعندو حطات راسها على صدرو وشدات ليه فيديه بقاو ساكتين حتى نطقات:انا ماكنتش عارفة ان امين فلغابة انا..

قاطعها:امين داك نهار كانت عندو عملية فلديبو لي فلغابة انا هضرت معاه باش يتكلف هو بيها..

طاهرة :ادن ماكانش مراقبني

ناصر بقة ساكت ماباغيش يتعمق فالتفكير فهادشي حيت غيوصل لشي نتحية ماشي هي هديك زاد قربها ليه:نعسي

عنقاتو وغمضات عنيها وهي مبتاسمة ونعسو...دازت مدة وهي تسمع لبكة تنهدات بغات تنوض بشوية باش ماتفيقوش. حيدات ليه يديه على خصرها حتى كتحس بيه جرها:فين غادة

طاهرة:نشوف دراري وصافي واحد فيهم كيبكي

رخة منها وناضت مشات عندهم لقات لبنيتة كتبكي بقات فيها هزاتها بين يديها بقات غادة جاية بيها تاسكتات

طاهرة بتاسمات:بغيتي تنعسي حدا ماماك..اجي معايا

خرجات للبيت حطاتها فوق النموسية فالوسط بينهاا وبين ناصر تكات وبدات كترضعها تا نعسات ونعسات تاهي

جا نهار جديد

شرقات شميسة مع نسمات ديال الريح باردة

فاق مالقاهاش حداه شاف فالساعة 8دصباح خاص يرجع..ناض غسل وجهو وبدل عليه حوايجو عرفها اتكون معاهم فلبيت دخل لقاها واقفة كضحك معاهم من بعد ما رضعاتهم والممرضة عطاتهم الدوة..

الممرضة غير شافتو خرجات..طاهرة قربات لعندو تعلات على ريوس صبعانها وباستو فوجهو:صباح الخير

ناصر:صباح النور

وشا فوليداتو وبتاسم هو كيسمع صوت انينهم وكيشوفهم كيف كيتحركو

شاف فطاهرة:انا غنمشي دابة

طاهرة بلعات ريقها:صافي غتمشي

حط يديه على حنيكاتها:جيت باش نشوفكم ..

طاهرة عنقاتو:ماكرهتكش ماتمشيش

ناصر عنقها تاهو:كلشي دابة يتحل.

هزات راسها وشافت فيه:غنصبر

باسها على راسها..ومشا تحنا على وليداتو كيبوسهم واحد بواحد ويبقا يشوف فيهم شحال ويبوس يديداتهم ويبتاسم ليهم..وطاهرة كتشوف فيه كانت عارفاه ايكون اب حنون..كانت عارفة انه فيه الجانب الزوين

ناصر شدها من يديها وخرجو باش يمشي..هبطو لتحت لقا الطاهرة الام جالسة غير شافتو ناضت عنقاتو:كي بقيتي اولدي

ناصر رجع اللور جاوبها ببرودة:بخير

طاهرة الام سكتات مابغاتش تزيد طول عليه