If the Deep Sea forgets you (Myanmar Translation)

79

Unicode Ver

၇၉။ ငါ့ကိုချစ်ရောချစ်ခဲ့လား?

ရှုချင်းရီက သူမ၏ရင်ထဲတွင် အဆင်မပြေပါ။ မော့ဟန်၏ ကိုယ်ရေးကိုယ်တာကိစ္စကို မမေးသင့်တာ သူမသိသော်လည်း ၃နှစ်တာ ဆက်ဆံရေးတစ်ခုက တစ်ယောက်နှင့်တစ်ယောက် အဆင်မပြေသည်နှင့် ပြီးဆုံးသွားခဲ့ကြောင်းကို သူပြောသည်ကို ကြားသည့်အခါ သူမကြောက်သလို ခံစားရသည်။

ဒီလိုအချိန်ကြာနေသည့် ဆက်ဆံရေးတစ်ခုက ပျက်စီးသွားသည်ကို ကြားရသည့်အခါ ဘာကြောင့်မှန်းမသိ သူမကြောက်နေမိသည်။ သူမက အရင်တုန်းက ကြုံခဲ့ဖူးသလိုပင်။

ရှုချင်းရီက နွားနို့မသောက်ဘဲ သူမအိပ်ရာဘေးက စားပွဲ၏အံ့ဆွဲထဲက အိပ်ဆေးပုလင်းကို ထုတ်ယူလိုက်သည်။ ထို့နောက် ရေနွေးနွေးလေးဖြင့် ဆေးသောက်လိုက်ကာ အိပ်ရာပေါ်သို့ တက်လိုက်သည်။

သူမအိပ်မပျော်ခင် မျက်နှာကျက်ကိုကြည့်နေစဉ်တွင် စကားတစ်ခွန်းက သူမ၏စိတ်ထဲမှာ အလိုလိုပေါ်လာသည်။
'နှစ်တွေဒီလောက်ကြာတာတောင် ငါ့ကိုချစ်ရောချစ်ခဲ့ဖူးရဲ့လား?'

ထို့နောက် မျက်လုံးထောင့်ကနေ မျက်ရည်များက ထိန်းမရသိမ်းမရစီးကျလာကာ ခေါင်းအုံးကို စိုရွှဲသွားစေသည်။ ထို့နောက် ရှုချင်းရီမှာ နက်ရှိုင်းသည့် ပင်လယ်ကြီးထဲတွင် ရောက်နေသည့်အကြောင်းကို အိပ်မက်မက်တော့သည်။

မော့ဟန်က ရှုချင်းရီကို ထမင်းစားချိန်နီးမှ လာနှိုးလေသည်။ သူကတံခါးကို နှစ်ကြိမ်တောင်ခေါက်သော်လည်း ဘာမှပြန်မဖြေပေ။ ရှုချင်းရီက သူမ၏တံခါးကို အမြဲတမ်းလော့ချကာ ပိတ်မထားတက်သောကြောင့် သူတံခါးဖွင့်ကာ ဝင်လိုက်သည်။

ရှုချင်းရီက အိပ်ရာပေါ်တွင် စောင်လေးခြုံကာ အိပ်နေဆဲဖြစ်သည်။ မော့ဟန်က သူမကို လာနှိုးကာမှ သူမနိုးလာတော့သည်။

သူမဆံပင်တွေက ရှုပ်ပွနေကာ မော့ဟန်ကို ဝေဝေဝါးဝါးကြည့်နေသည်။ သူမအဆုံးမရှိအောင် နစ်မြုပ်နေသည့်အိပ်မက်ကနေ နိုးလာတိုင်းတွင် သူမအနားက အရာရာကို ပုံရိပ်ယောင်များဟု ထင်လေ့ရှိသည်။