الحلقة :2
وصل ل السبيطار ودخل... اي واحد يعدي قدامو يحييه حبسو واحد من الممرضين و قالو .
: دكتور مسيو رشيد يحتاجك
منير : اووك خبرو بلي ربع ساعة ونكون عندو نعدي على المرضى الأول .
: داكوغ دكتور .
... راح بكل كاريزمة عدا على كل مرضاه تأكد من صحتهم و اعطا أوامر ل الممرضين و راح للمدير . وصل لبابو دقدق و دخل .
رشيد : تفضل منير اقعد .
منير : يزيد فضلك ، خبروني بلي تحتاجني .
رد عليه و هو يضايف فيه قهوة وڨاطو .
رشيد: ايه خويا حبيت نشكرك بزاف على الجهد الي راك تبذلو ف السبيطار لوكان ما نتا مكانش راح يكون اسمو يتردد في كل بلاصة .
منير : بعيدا عن أني قاعد ندير في واجبي أما السبيطار راهو مطور بسببك نتا تاني .. لوكان مجاش بالنظافة هاذي و المستلزمات الطبية والموقع الفعال حتا لوكان ندير ضعف الجهد الي راني نديرو درك ميوصلش لهنا .
تبسم من كلامو و عدل من قعدتو وقال .
رشيد : على هاذي راني حايبك تولي معاي فالادارة و في اي وقت تحب تشارك في عملية او اي حاجة ، المهم راني حايب تكون يدي اليمنى.
مين كمل كلامو وشاف معاه عرفو بلي رايح يرفض و كان متأكد من قبل بصح كان حاب يجرب حظو بالنسبة ليه منير الشخص الي يوثق فيه خصوصا انو معندوش ولدو ويعتبرو كإبن ليه .
منير : سامحني .. بصح نرتاح بين المرضى وزيد بزيادة راني دارس طب ماش ادارة أعمال .. نقدر نكون متفوق ف الطب أما نسببلك خسائر كبيرة فالادارة ، الشخص الي يتحط في بلاصة ماش بلاصتو أكيد يكون شخص خطأ.
رشيد : راني عارف اما الادارة ماراهيش حاجة صعيبة . المهم فالاعمال الثقة و انا راني واثق فيك .
منير : اذا على الثقة راني ديما معاك اي حاجة تحتاجها خبرني ، واذا شفت نقص في مجالي فالسبيطار راني نخبرك .
تبسم معاه وشرب قهوتو شاف مع ساعتو وقال
منير : سامحني عندي عملية درك لازم ندخل ليها وكي نفضها نروح نجيب صغرونتي .
رشيد : السماح اخويا و جيبهالنا كاش نهار معاك ، خليها تتعود على جو السبيطار يمكن هي فالمستقبل تقبل تكون يدي اليمنى على عكس باباها .
منير : ههههه هاذ الشي يفرحني أما من الاحسن نخليو الخيار ليها .. تبقى على خير.
رشيد : بالسلامة ، بيناتنا اتصال .
منير : انشاالله في أمان الله .
خرج من عندو متوجه لغرفة العمليات وتخماما عندها زعما يجي نهار وين يشوفها كبيرة وقارية وناجحة في حياتها .. تخمامو خلاه يفرح لأقصى درجة ، دخل غرفة العمليات وباشر في عمليتو .
بعد ساعة خلص من عمليتو والحمدالله كانت ناجحة . كل ما ينقذ عبد يحس براحة وشعور جيد أي طبيب فالدنييا هاذي لابغا التعب والجهد لكن القلب راضي على النتائج. ، خرج متوجه لمدرسة صغرونتو .
عند هاجر :
بعد ما راح باباها لشغلو دخلت لقسمها وهي تعافر في كارطابلها تلاقات بيهم مجمعين تجاهلتهم ودخلت قعدت في بلاصتها .. شافت مع لبلاصة الفارغة الي حداها و فرحت أخيرا رايحا تجي ، دخلت المعلمة وتجمعو كامل كل واحد شد بلاصتو ورددو بصوت واحد .
التلاميذ : صبااح الخير يا معلمتي .
المعلمة : صباح الخير تلاميذي ، اليوم رايح ينضم لينا ولد جديد ،نتمنا ترحبو بيه .
بعد كلام معلمتها كل فرحتها واحلامها تبخرو .. كانت حاطة في بالها انها بنت .، فجأة دخل ولد لابس كاسكيطة وملابس باين عليه الفقر مهبط راسو كأنو حشمان بروحو .
المعلمة : تفضل ولدي عرف بروحك
: أا أنا قيس قيس اسمي .
المعلمة : مرحبا بيك قيس اختار مكان تجلس فيه .
شاف من ومن لمح المقعد الي جنبها فارغ شاف معاها و شافت معاه حس أنها قابلة بيه وتكلم .
: نقدر نقعد جنبها
المعلمة : أكيد قيس روح احكم بلاصتك باش نبداو الدرس .
راح يمشي بخطوات ثقيلة صوبها و الكل يوشوش ويحكي على ثيابو ، وصل ل المقعد جا يقعد فيه طاح . من طيحتو ناض القسم كلو يضحك ، هبط عينيه فالأرض وتغرغرو دمعات فيهم ، طلت عليه فجأة طاحت عينو في عينها ،استغربت من دموعو وتبسمت عاونتو ينهض و شافت مع الي يضحكو شوفة سكتو بكلهم .
قيس : شكرا .
هاجر : العفو ، انا اسمي هاجر .
قيس : وأنا قيس .
عند منير :
وصل ل المدرسة لقاها خارجة مع واحد حاكمة فيدو وتتبسم و هو مهبط راسو مغطي وجهو ، استغرب لكنو ناداها .
منير : هاااجر هااجر .
تلفتت لقات باباها يعيطلها طلقت يدو وراحت تجري عندو .
هاجر : بابا نقدرو نوصلو صديقي الجديد معانا .
منير : أكيد بنتي .
جات تدور تعيطلو لقاتو راح ، دورت لباباها وضحكت رد عليها .
منير : الظاهر صديقك حشام .
هاجر : ههههه ايه . هايل
______
عند قيس : بعد ما سمع كلامها مع باباها هرب يجري خايف ليوصلوه معاهم ويعرفو وين يسكن بقا ماشي ويزرب في خطواتو باش يلحق و واحد ما يشوفو ، حتا وين لحق لباب كبير شاف معاه وتنهد ودخل . قابلوه يلعبو في ماتش .
إلياس : قييييس ياااا قيسس ارواح تلعب معاناااا .
دارلهم بيدو لالا وكمل طريقو أصلا اكره حاجة عندو يلعب معاهم . دخل ستقبلتو بوجها الصارم وتجاعيدها الي زادو من بشاعتو و قالت .
فتيحة : داااار باباك وقيلااا رااااك في ميتم هنااا ديجا احمد ربي كي خليناك تقرا المرة الجاية تتعطل تتزعط من هاذ الميتم نهائيا .
هبط راسو ودموعو تحجرو في عينيه عمللها براسو اشارة حاضر وراح لبيتو ، او خلينا نقولو بيتهم الكل .
تخبا في سريرو و اطلق العنان لدموعو الي يوم كامل حاكمهم ، تفكر الطيحة تاعو وجعاتو ... فجأة جات في بالو ضحك وقال بصوت واطي ممممم هاجر
